[Yaaxuba kallen do Piyeeri rageye]
12
Ken waxati ya ni,
tunka Heroodi Hagiripu fanan ga saage i kitten saqa sero yogonu kanma isanjaman ŋa na i yanganxata.
2 A da Yohanna waaxi Yaaxuba kari ti kaafan ŋa.
3 A ga da a tu ti ken liŋo Yehuudiyanun da,
a da Piyeeri xa raga.
A ɲa Buurunxecansallen yinme ya yi.
4 Piyeeri raganden falle,
i da a ro kason ŋa na feddu naxati wara a tanganden ŋa,
fedde su sorodaasinu naxati.
Heroodi wa a mulla Pesaxansallen ga na dangi,
i na a kiiti jaman su jon ŋa.
5 Sorodaasinun wa Piyeeri raqen ŋa kason ŋa.
Xa isanjaman do allanɲaageyen wa me yi Piyeeri da.
6 Heroodi do moxosironden wa me yi na Piyeeri kiiti jaman jon ŋa.
Wuron ŋa,
tangandaano filli da Piyeeri xenqenten ro me naxa,
na du do a yetu ti surunmu filli yi,
tangandaano filli xa wa fonlaqen ŋa,
7 ma Tunka Duumanten maliikan ga nta ri.
Kason noxon su xura.
Maliikan da Piyeeri sanpa i kunken ŋa nan ti a da :
« Giri jawoye.
» Ken sigira,
surunmun kuti bakka Piyeeri kittun ŋa.
8 Maliika ke ti a da :
« An dusiitaaden wutu,
an na an tepunun rondi.
» A da a dabari.
Maliikan yille tini a da :
« An doroko xooren rondi an nan sukke do in ŋa. »
9 Piyeeri bogu kason ŋa nan sukke do a yi.
Aken da,
tonŋu fe,
i na kuyin ya yi.
10 I dangi tangandaana fanon ŋa,
nan dangi tangandaana fillandin xa yi.
I ga kiɲe fonlaqe be gaa taŋene deben ŋa mexenbaafen gaa a yi,
a yinme wuɲi.
I dangi.
I ga ware killen ŋa tan,
maliikan sanku.
11 Piyeeri haqilun ga ri,
a ti :
« N da a faamu saasa nan ti tonŋun ya ni :
Tunka Duumanten yinme ya n da i maliikan wara katta in ŋa,
a na in bogu Heroodi kittun ŋa,
na in kisi Yehuudiyanun ga ɲi a mulla na toora be saxu in ŋa. »
12 I gaa Yohannantoxo ke be xilli « Maarika »,
Piyeeri haqilun ga ri a daga ken ma Maariya ya kan ŋa.
Jaman da me ɲi non ŋa na Alla batu.
13 A da fonlaqen konko,
tunbaari yaxanne yogo ri katta a yi,
a toxon ga ni Roodi.
14 Yaxanne ke da Piyeeri xannen tu.
Ɲaxaliyen maxa,
a maxa fonlaqen wuɲi.
A wuru yillene katta kan ŋa nan daga Piyeeri riyen ko kaadunkon da.
A ti :
« Axa da in musu,
n na axa gaara !
Piyeeri faayi ke sikki fonlaqen ŋa. »
15 Kaadunkon ti :
« An tuuri ya ba ?
» A ti :
« N ma tuuri,
Piyeeri ri ya de !
» I ti :
« Aayi,
Piyeeri ken fe,
a me ya ni. »¤
16 Piyeeri ga toxo fonlaqen konkono,
i giri na a wuɲi.
I ga da a wari sikki,
i kaawafi moxoburu.
17 Piyeeri koore i danŋa nan ti i nan mullin kuuru.
Tunka Duumanten ga da a bagandi kason ŋa moxo be,
a da a su koni i danŋa.
A sefe lagare,
a ti :
« Xa wuru telle a ko Yaaxuba do isanwaaxinun su da.
» Ken falle,
a bogu nan daga noqu tana yi.
18 Yillen ga kare,
tangandaanon haqilun bono.
I toxo tini :
« Piyeeri ɲa mendu moxo yi ? »
19 Heroodi da seron wara i wa a mundunu noqun su yi,
xa i ma a wari.
Ken sigira su yi,
tangandaano be ga ɲi Piyeeri raqen ŋa,
a da i kiiti na i kari.
Ken falle,
Heroodi giri Yehuuda maran ŋa nan daga Kesaariye na waxati ɲa non ŋa.
[Heroodi Hagiripu fanan kalle]
20 Sooronkon do Sidooninkon ya n gemu xanne yi,
nan ti i n daga katta Heroodi yi,
butte ke be gaa Heroodi maxa katta i ya,
ma a ra wa ɲamene.
Na a sababun ɲa,
ikun naxafan su gilli Heroodi jamaanen ya yi.
Xa,
saado ken ŋa,
i ga da feera fana be kita,
ken ni ya,
na Bilisiiti ya ɲa xana yi,
aken ni Heroodi wuyi konpen tangandaanan ya.
21 I ga gemu koota be yi,
a kiɲe.
Heroodi ro i tunkanyiraamun ŋa nan taaxu i tunkantaaxaaden kanma nan maaba jaman da.
22 Jaman geeje doome nan ti :
« Haadamarenme ra nta sefene kundu !
Ke ni alla yogo ya sefexanne yi. »
23 Ken sigira su yi,
Tunka Duumanten maliika yogo da Heroodi sanpa,
baawo a ma bara i ga da a sigindi Alla sigiran ŋa.
Ken sigira su,
xuudun da a yiga nan duguta a yi.