Ɲangollu 13

[Sawulu dagaye faarannaaxun ŋa]

(13.1-21.16)

[Sawulu do Barinaabu Kiporondagaye]

Isanjaman be ga ɲi sero ya siginton ni, kun ga ni do xaranmoxonun ŋa, i toxonun faayi : Barinaabu, Simoona i gaa a xilli Nigeere, ken do Luuki ken gaa bakka , Munahaamu, ken ga ni Hantipaasi teranlenma yi leminaaxun ŋa, kafiini Sawulu. 2 Koota yogo, i gaa allanbatten ŋa nan suumi, Alla ti i da : « Xa da Barinaabu do Sawulu senbendi in da kuudo in gaa i walla fo be yi, i na a dabari. » 3 I ga duguta allanbatten do suumiyen ŋa bire be, i da i kittun saxu Barinaabu do Sawulu yinmun ŋa nan yanpa i maxa.

4 Fanka Sennen da Barinaabu do Sawulu xayi kuŋa. I daga Seluuki. I giri non ŋa, na fuuren wutu nan daga Kiporo dunden ŋa. 5 I ga kiɲe Salaama, i ro do Yehuudiyanun ŋa na Alla digaamen ko. Yohanna Maarika wa do i ya a gaa i deemana. 6 I da dunde ke su kutu nan ri Paafu. I da Yehuudiyanka yugo yogo ɲi no, a toxon ga ni Barayuusu. Yugo ke ni jinnamansan ya yi, duxayifaare ya ni xa. 7 I gaa tunkanyugo ke be xilli Seerigi Pawulu, jinnamansa ke ɲi a ya kan ŋa. Tunkanyugo ke ni haqilanta xoore ya yi. A da faaren xayi Barinaabu do Sawulu yi, a wa a mulla na Alla digaamen mugu. 8 Xa jinnamansa ke, ken ga ni Barayuusu yi, i gaa a xilli gerekinxannen ŋa ti « Yeliimu », Barinaabu do Sawulu fin nta liŋi a da. A da a xanu na i bonondi tunkanyugo ke da, kuudo a nan maxa saxu i ya a gaa tuubini. 9 Sawulu be toxon ga ni Pawulu xa yi, a fakkan ni ti Fanka Sennen ŋa moxosiri. A da i yaaxen tonto Yeliimu yi, 10 a ti a da : « Ke gaarante ke, an na haadamaaxu ke su neenene ya ! renme ke, fo wo fo ga ni fo sire, an nta ken mulla. An nta faayini an nan giri Kamanen gollun ɲengendini ba ? 11 N gaa ke be koono an da, Tunka Duumanten kitten wa an kanma, an wa finkini saasa. An wa wucu laate ɲaana, an nta kiyen walla an yaaxen ŋa. » Ken sigira su, Yeliimu yaaxon rage. A toxo tiirintiirini i batten ŋa, a wa a mulla sere na i geesu. 12 Tunkanyugon ga da ken wari, a do a ga da fiinu be mugu Kamanen kanma, kun da a kaawafi moxoburu, a toŋondi.

[Pawulu do Barinaabu Hansooxi-pisiidindagaye]

13 Pawulu da i teranlenmon ro fuuren ŋa Paafu katta Peregeemo, Panfiili jamaanen ŋa. Yohanna Maarika ken do i fate me yi Peregeemo Panfiili, a xa saage katta . 14 Ken falle, Pawulu do Barinaabu giri Peregeemo nan daga Hansooxi-pisiidi jamaanen ŋa. I kiɲe Yehuudiyanun allanxarankan ŋa ya yi. 15 I ga duguta do kitaabun xaranŋen ŋa, allanxarankan yinmankon ti i da : « N maarenmu, selli fo gaa axa maxa na butten ro jaman ŋa, sefen wa axa maxa. »

16 Pawulu giri sigi nan koore ti i kitten ŋa jaman da nan ti : « , a do ku be gaa kanna Alla yi, xa da in terinka ! 17 Ke jama Alla, a ya ga ni Alla yi, a da o jaman jiidi na i toxo mukkaaxun ŋa Misira yi, ken falle, na i bagandi non ŋa ti i senbe daren ŋa. 18 A da i muɲi gunjuran noxon ŋa tannaxate siine. 19 Ken falle, a da xabiilanu ɲeri ya buruxa bakka Kanaana jamaanen ŋa na ɲiiɲen saaga i jaman ŋa xoyi xaye. 20 Ke su ɲaŋi kamo naxati do tankarage siine me ya noxon ŋa. Ken falle a da kiitaanon bagandi i ya, ma annabi Samuyeli kiyen gaa riini. 21 Waxati yogo ri, o kisimanu da a xanu a na tunke ro i yinmen ŋa. Alla da Xiisu ren yugo Sawulu ro i yinmen ŋa, Beniyamiinakaaranken ya ni. A ɲa tunka tannaxate siine. 22 Alla ga da a tunkaaxun bonondi, a da Tunka Daawuda ro i yinmen ŋa. Alla digaamu Daawuda xibaaren kanma nan ti :

“ N da Yisaayi ren yugo Daawuda ya sugandi, a ya n gemu in liŋun ŋa, a gaa riini in sagon dabari. ”

23 « Isa ke be ga ɲa Banisirayila kisindaana yi xoyi Alla ga da a laayidun wutu moxo ke be yi de, Daawuda ya bonsonŋe ni. 24 Saado Isa gaa riini, annabi Yahaya do waajunden ɲi me yi nan ti Banisirayilagankon su na du rasaaga na i jikkunun faraaxu, i nan wanqi. 25 Yahaya ga ɲa xoyi i faayi dugutana i gollen ŋa, a saage tini seron da : “ Axa gaa a sinmana nan ti inke ni sere ke be yi, nke feti ken ŋa. A faayi de, sere ke be gaa riini, n nta xawa ɲaana hari a kome yi, n gaa a tepunun bagandini a da. ”

26 « N maarenmu, axakun be ga ni annabi Ibirahiima bonsonŋun ŋa, a do xabiilan tanan seron be gaa kanna Alla yi, Alla ke kisiye kitayen digaame be ga ni ke yi, a da a kini oku ya yi. 27 Yerusalaamunko do deben xirisun ma Isa alimasiiwunnaaxun tu. I gaa annabinyinmun digaamu be xaranŋa Tuumayinkoota su xa yi, i ma kun xa faamu. Xa, i da i tinmandi ti Isa jalaginden ya yi. 28 Isa ma fi xa ɲa a ga n xawa kalla ti fi be yi. Xa ken do i fi su, i da a muuru maxa a na a kari. 29 Safandi Sennun ga da fo wo fo ko Isa Alimasiiwu xibaaren ŋa, i ga da ken su tinmandi bire be ya ni, i ga da a yanqandi bakka sallibinsollen ŋa na a firindi gidinkumen ŋa. 30 Xa Alla da a wundu bakka furun naxan ŋa. 31 A do ku be ga giri yi doome nan daga Yerusalaamu, i ya ga ɲaŋi a da seeda yi Banisirayilagankon jon ŋa, a kara falle, a da du koyi kun ŋa bita gabu. 32 Alla ga da ke be laayidun wutu o kisimanu da, o xa wa a koono axa da, 33 nan ti a da a tinmandi o da, oku be ga ni i bonsonŋun ŋa, a ga da Isa wundu bakka furun naxan ŋa. A wa yi, soora fillandin ŋa nan ti :

“ N renmen ya ni an ŋa,

nke ya ni an faaba yi lenki. ”

34 « Nan xaso Alla da a ko nan ti i wa riini a wundu bakka furun naxa, a ntaxa kalla. A ti :

“ N ga da fo sennu be laayidun wutu Daawuda da,

n wa i kinni axa yi sooben ŋa. ”

35 « Ken ya saabu da, a ga da a ko noqu tana nan ti :

“ An nta an seri senne walla motto xaburan noxon ŋa. ”

36 « Na a ɲi Daawuda da i bireyen su ɲa a gaa Alla sagon dabarini. A ga kara, i da a bulu i kisimanu kaaran ŋa, a moti. 37 Xa, Isa ken ma moti ; Alla da a wundu bakka furun naxan ŋa. 38 N maarenmu, junuubu xafariye be digaamen gaa a kanma nan koni axa da kundu, Isa ya ɲa ken sababun ŋa. Axa da annabi batu, xa axa ma ken me kita a yi. 39 Sere wo sere ga saxu Isa yi, an kisi. Ken ɲaŋi ti a baane ya yi. 40 Xa da axa du koroosi : annabinyinmun ga da digaame be ko, a nan maxa axa kita. I ga ti :

41 “ Dunderu, xa faayindi,

nan kaawafi, axa nan kara.

N faayi fo dabarini axa jon ŋa,

sere ya gan da a laxami axa da,

axa nta saqa a yi lewu ! ” »

42 I bogu falle xarankonpen ŋa, i da a muuru Pawulu do Barinaabu maxa, Tuumayinkoota tana, i nan saage ke noqu yi. 43 Jaman bogu falle, Yehuudiyanun do xabiilan tana be seron ga ro yehuudiyaaxun ŋa, jama xoore da Pawulu do Barinaabu tunsi. Pawulu do Barinaabu ti i nan duruxoto do allanbatten ŋa, i na Alla horoman kita.

[Pawulu do Barinaabu waajunde katta xabiila tana yi]

44 Tuumayinkootan ga kiɲe, deben su da me ɲi na Kamanen digaamen terinka. 45 Yehuudiyanun ga da ken jama wari, i suuxu. I saage Pawulu kutana na a ka. 46 Pawulu do Barinaabu ti i da kuŋa : « O da Alla digaamen ko axa fina ya da, axa bara a yi. Axa yinmenu da a xurandi nan ti axa do bireyi duumanten nta xawa. He ! Manne ni o ga nta taŋene xabiila tana yi. 47 Kamanen ti ya :

“ N da an ɲa nooro yi xabiilan su ya da

ma duna xenpa, kuudo i na kisi. ” »

48 Ku be ga feti Yehuudiyanu yi, i ga da ku sefo mugu, a su sewo na Kamanen tiiga ti i diganxannen ŋa. Alla ga da bireyi duumanten rakutu fo wo fo da, a su tuubi. 49 Kamanen digaamen sanqi do jamaanen su yi. 50 Xa battaana yaxaru be ga ni yinmankon ŋa kafiini deben xirisu, Yehuudiyanun da i ɲonqi katta Pawulu do Barinaabu yi ma i gaa i xatana bakka i ɲiiɲen ŋa. 51 Pawulu do Barinaabu xa da i taaranɲiiɲon konko nan daga Yikooni. 52 Isanxaranlenmo be ga toxo i falle, i fakkon wa ti Fanka Sennen ŋa, i sewonto.