Ɲangollu 14

[Pawulu do Barinaabu dagaye Yikooni]

Fo wo fo ga ɲa Hansooxi-pisiidi, Pawulu do Barinaabu ga kiɲe Yikooni yi, ken me ya n ɲa non xa yi : i ro Yehuudiyanun noxon ŋa nan waajundi. Yehuudiyanun do Gerekinko, seri gabe toŋondi ti Isa Alimasiiwu yi. 2 Xa, Yehuudiyanu yogonu ma tuubi. I da xabiilanu tananu ɲonqi na i janba isanwaaxinu ku yi. 3 Ken do i fi su, Pawulu do Barinaabu toxo non ŋa wucu laate nan waajundi ti Kamanen neeman ŋa. Kamanen da senben kini i ya, i ra gaa kaawafiinun do taagumansun dabarini, ken gaa a koyini nan ti i waajunden ni tonŋun ya yi ti Kamanen horoman ŋa. 4 Deben taxandi : yogonu kafi Yehuudiyanun ŋa, yogonu kafi Isa ŋa. 5 Yehuudiyanun do xabiila kuttun do i yinmankon da i moxo sirondi ti i na Pawulu do Barinaabu roxondi na gidingullon sedi i ya na i kari. 6 Pawulu do Barinaabu ga sobi ken ŋa, i wuru nan taŋe Lisitiira do Dereebu, kun ga ni Likooni maran debu yogo yi, a do kun fonkaaro. 7 I da Kamanen kiɲanden jopa non xa yi.

[Muruxunten tereye]

8 Yugo yogo ɲi Lisitiira, gelli a nan saare a muruxunten ya ni i batten ŋa. 9 Yugo ke da i taron sigindi na Pawulu terinka siri. Pawulu ga da i yaaxen tonto a yi, a da a tu nan ti danqanaaxun wa yugo ke yi a ra gaa sahana nan tere. 10 A xiribe yugon ŋa nan ti : « Giri an nan sigi an xaren ŋa ! » Yugo ke dire gilli nan tere. 11 Jaman ga da Pawulu gollen wari, i xaaru na a ko likooninxannen ŋa nan ti : « Ku allanu filli da haadamaren sawuran ya wutu nan ri katta o yi ! » 12 I da Barinaabu xiri Juusu, na Pawulu xiri Heereme baawo a ya ni digaamun kiɲandaanan ŋa. 13 Juusu batikan ni deben roraqen ya yi. Juusu be gaa non ŋa, ken do gunbunun ri batika ke raqen ŋa, a su bennen jogonten ya ni ti yittifuugen ŋa. A do jama ke su ɲi a mulla na sadaxa dabari Pawulu do Barinaabu da. 14 Barinaabu do Pawulu ga da ken mugu, i da i nan wuru katta jaman ŋa nan ti : 15 « He ! Axakun na manne dabarini yere kundu ? Axa me haadamarenmu ya feti o yi gani ? O da Xibaari Liŋen kiɲandi axa yi kuudo axa na ku fi xafunu ya wara, axa nan ri katta Alla ŋalinten ŋa, aken be ga da kanmun do ɲiiɲen taga, na geejin taga a do fo wo fo gaa i noxon ŋa. 16 Gannin xase, Alla da i fi bogu seranxabiila ke su maxa, i da i liŋun batu. 17 Ken do i fi su, Alla ɲi du koyini ti i fi sirun ya yi : kanmen wa texeene, sanjaanun wa liŋoono, naxafan wa kiteene, ma axa ga ɲaxali. » 18 Pawulu do Barinaabu da ke sefe su ko, xa kuudo na i kaba i nan maxa ikun sadaxi xoyi munonu, fo wo fo ma xoto na ken baga.

19 Yehuudiyanun giri , do Yikooni na jaman haqilen faraaxu na i kafu du yi. I da gidingullon sedi Pawulu yi kuudo na a kari. Ken falle, i da a xiili bakka deben ŋa xoyi fure. 20 Xa isanxaranlenmon ga ri sigi a kanma, a giri do i nan daga doome kaanun ŋa. Ken yillakara, a do Barinaabu daga Dereebu.

[Pawulu do Barinaabu saageye katta Hansooxi-siiri yi]

21 Pawulu do Barinaabu da Xibaari Liŋen kiɲandi Dereebu na xaranlen gabe kita. Ken falle, i saage katta Lisitiira do Yikooni do Hansooxi-pisiidi yi. 22 I da isanxaranlenmon butten tallan xotondi nan ti i nan duruxoto danqanaaxun noxon ŋa. I ti i da : « Waajibin ya ni o nan toore kuudo o na ro noxon ŋa. » 23 I da xirisu ro isanjama su yinmen ŋa, na Alla ɲaaga nan suumi, na yinmanko ku do jama ke su xaliifa i ga da i jikken ro Kamane ke be yi.

24 I da Pisiidi kutu, nan ro Panfiili ɲiiɲen ŋa. 25 I da Xibaari Liŋen kiɲandi Peregeemo, nan yanqa katta Hataali. 26 I da fuuren wutu non ya yi nan daga Hansooxi-siiri, i ga da terenden jopa noqu ke be yi. I ɲi ga da i xaliifa Alla yi ken Hansooxi-siiri baane ya yi xadi, Alla na i neema, i nan katu ke golle dabarini. 27 I ga kiɲe, i da isanjaman kafu me yi. Alla ga da i deema moxo be, a ga da kandayen killen koyi xabiila kuttun ŋa moxo be i ga toŋondi ti Isa yi, i bogu ti a su moxon ŋa na a ko. 28 I da waxati ɲa non isanxaranlenmon maxa.