Ɲangollu 15

[Sunnanden manqanŋe]

Sero yogonu giri maran ŋa nan ri katta isanwaaxinun ŋa nan ti : « Axa ga ma sunne xoyi annabi ga da a ko moxo be, axa ra nta kisiini. » 2 Pawulu do Barinaabu ma duŋe ti sero ku da ken sefe yi. A ɲa manqan xoore yi i do me naxan ŋa. I ti sero nan kafi Pawulu do Barinaabu yi kuŋa, i nan daga katta do isanjaman xirisu be gaa yi ti ke xibaare yi.

3 Ken kuŋa, isanjama be gaa Hansooxi-siiri, i da silifandan kini i ya. I danginton ŋa Finiika do jamaanen ŋa, xabiila kuttun ga tuubi moxo be, i wa ken laxamini, isanwaaxinu be gaa non ŋa, ken da i ɲaxalindi moxosiri. 4 I ga kiɲe Yerusalaamu yi, isanjama kafiini faarun do xirisu, i da i bisimilla. Alla ga da deemande su ɲaŋi i da, i bogu ti a su moxon ŋa na a ko.

[Sunnanden manqanŋen Yaaxabagandiye]

5 Xa, be ga tuubi, i gaa kapa jama ke yi, kun ti : « Toŋondinto ku be ga feti Yehuudiyanu yi, waajibin ya ni kun nan sunne, do na i ɲaamari i na annabi Muusa batu. » 6  do xirisun da me wari kuudo na ke fi koyi me yi. 7 I dalla manqanŋa a kanma siri. Ken falle Piyeeri da sefen wutu, a ti : « N maarenmu, axa wa a tu nan ti gelli fi ke joŋaarun ŋa Alla da inke ya sugandi bakka axa naxan ŋa. Ku beenu ga feti Yehuudiyanu, n na laxami i da kuudo i ga na a mugu, i na tuubi. 8 Alla ke be gaa haadama sondomen tu, a da Alla kini i xa yi xoyi a ga da a kini o yi moxo ke be ya. 9 Alla ma fatanpansiye su ro o do i naxan ŋa. I danqanaaxun ya saabu da ni, a ga da i sondomun senondi. 10 Ken kuŋa saasa, manne xa saabu da ni, axa gaa baqa Alla yi ? Axa faayi gaa likke ya roono isanxaranlenmon kanma, oku do o faabanu su ra ga nta likke ke be wuttu. 11 Ken su falle, oku do ikun su sinmayen ni ya nan ti o kisiini ti Kamane Isa horoman ya yi. »

12 Ken bire, jaman kuuru toxo-toxo. I wa Barinaabu do Pawulu terinkana. Alla ga da kaawafi do taagumanse su ɲa na i deema ku be ga feti Yehuudiyanu noqun ŋa, i da a su laxami i danŋa.

13 I ga duguta sefen ŋa bire be, xa da sefen wutu, a ti : « Xa da in terinka, n maarenmu. 14 Simoona da o sinmandi gelli joŋaaru Alla ga da sero yogonu sugandi bakka xabiilan tananun ŋa na i ɲa i duudansero yi. 15 Ke fi kundu, a do sefen gemu me yi, baawo a wa Safandi Sennun ŋa nan ti :

16 Kamanen ti :

“ Ke falle, n wa riini,

Daawuda ka ke be ga kare, n na a sigindi,

n wa a ka gurujanten dabarini,

n wa a sigindini.

17 Ken ga na ɲaŋi, seren kutten su wa Tunka Duumanten muurunu

a do in toxon gaa xabiila su yi.

Tunka Duumanten da ke ya ko :

a na i digaamun tuyindini kundu ya yi,

18 A tuyinten ya ni gelli ganni. ” »

19 Yaaxuba ti xadi : « Nke sinmaye, xabiilanu ku be ga duŋe ti Alla digaamen ŋa, o ma xawa fin xotondini i kanma. 20 Ganta, o na bataaxe xayi i ya nan ti i nan maxa mununsadaxantiye yiga, a sobinten ya ni ; i na du tanga jeeniyen ŋa ; i nan maxa jiiba yiga, i nan maxa fore xa yiga. 21 Gelli gannin xase, seron ɲi Muusa Sariyan koono do debun ŋa ; su i wa a xaranŋa Yehuudiyanun noxon ŋa. »

[Bataaxen xayiye]

22 Ken kuŋa do xirisu, kafiini isanjaman su, i gemu ti a yi i na sero sugandi na i do Barinaabu do Pawulu xayi yi. Kun ɲa , i gaa a xilli Barisaabu, a do Siili. Ku ni sero ya yi, kandan wa i maxa isanwaaxinun naxan ŋa. 23 I ga da bataaxe be kini i ya, a sefon faayi :

« Faarun do xirisu, kun ga ni axa maarenmun ŋa, i wa axa kuuɲini, axakun isanwaaxinu be ga feti Yehuudiyanu yi, axa taaxunton gaa Hansooxi-siiri deben do Kiliiki maran ŋa. 24 O da a mugu nan ti sero giri o kaara nan daga axa haqilun ɲaxami ti sefo yi, oku ma i xayi. 25 Ken ya saabu da, o ga da sero sugandi na i kafu o liŋun seron ŋa, kun ga ni Barinaabu do Pawulu yi, na i xayi axa yi. 26 Sero ya ni, i ga da i yonkinun ro Kamane Isa Alimasiiwu toxon boten ŋa. 27 O da Yehuuda do Siili xayi o ga da sefo be ko ke bataaxe noxon ŋa, i na i kiɲandi axa yi. 28 Fanka Sennen do oku su gemu ti a yi nan ti likke nan maxa ro axa kanma, ke be ga ma ɲa waajibin ya yi ga fe, kun ga ni : 29 axa nan maxa mununsadaxantiye yiga, a sobinten ya ni ; axa nan maxa fore yiga ; axa nan maxa jiiba xa yiga ; axa na du tanga jeeniyen ŋa. Axa ga na ku batu, axa fiinun wa sirono. Axa nawaari. »

30 I ga da killen kini Barinaabu do Pawulu yi bire be, i daga Hansooxi-siiri. I ga kiɲe non ŋa, i da isanjaman su kafu me yi na bataaxe ke kini i ya. 31 I ga da bataaxe ke xara, a sefon da i sewondi moxosiri a ga da duruxotoye be kini i ya saabu da. 32 Yehuuda do Siili kun ga ni ŋa, i xa da sefe gabe ko i da na duruxotoyen do senben kini i ya toŋondiyen noxon ŋa. 33 I da wuce ɲa non ŋa, ken falle, isanwaaxinun da killen kini i ya nan duwa i da : Alla gan na i siru saagandi katta ku beenu ga da i xayi. 34 {Xa Siili ken da non toqen ŋanniya.} 35 Pawulu, ken do Barinaabu toxo Hansooxi-siiri. I do sere tananu, i wa xaranŋundindini, na do Kamanen digaamen ko seron da.

[Pawulu do Barinaabu fateye]

36 Wuce dangi falle, Pawulu ti Barinaabu da : « O ga da Kamanen digaamen kiɲandi debe su yi, o n saage katta i ya, o na a tu i gaa moxo be. » 37 I gaa Yohanna ke be xilli « Maarika », Barinaabu wa a mulla i do a nan daga doome yi. 38 Xa Pawulu ma duŋe ken ŋa baawo Yohanna Maarika booxe bakka i ya gelli Panfiili. Gelli ke, a maxa i deema i gollen ŋa. 39 A ɲaŋi i naxan ŋa manqan xoore ma i gaa fatene bakka me yi ; baane su nan daga ti i kille. Barinaabu do Maarika da fuuren wutu, i daga Kiporo. 40 Isanwaaxinun ga duwa i da bire be, Pawulu xa do Siili daga doome. 41 I da Siiri jamaanen kutu nan ro Kiliiki jamaanen ŋa i gaa duruxotoyen kinni isanjamon ŋa.