Ɲangollu 16

[Timoote do Pawulu do Siili teranlenmaaxu]

Pawulu kiɲe Dereebu, ken falle Lisitiira. Isanxaranlenma yogo wa no, a toxon ya ni Timoote, Yehuudiyanka yaxarin tuubinte yogo ya renme ni, faaben ni gerekin ya yi. 2 Isanwaaxinu be gaa Lisitiira do Yikooni, i wa a toxosiren koono. 3 Pawulu ga ɲi a mulla i do a nan ɲa teranlenma yi, a da a sunnandi. A da ken ɲa ken mara Yehuudiyanun ya saabu da, baawo a su ɲi a tu nan ti a faaba ni gerekin ya yi. 4  do xirisun ga gemu ti ɲaamarindixannu be yi, Pawulu do Siili ga daga debe su yi, i da a ko kun debu isanwaaxinun da, na a muuru i maxa i na ɲaamarindixannu ku batu. 5 Isa yinmotoonun toŋondiyen wa tallan xotoono, a seren wa tallan gabono koota su.

[Pawulu kuyiye Tooro yi]

6 Alla da Pawulu do Siili kaba Xibaari Liŋen kiɲandini Haasi maran ŋa. I bogu ti Firigi do Galaca maran ŋa nan daga. 7 I ga kiɲe Miisi maran jonkonmen ŋa, i da a faayi ma i ra wa Bituuni maran kitta, xa Isa Ruuhun ma duŋe i da. 8 I da Miisi kutu kuŋa, nan yanqa katta Tooro geejinlaqen ŋa. 9 A wuron ŋa, Pawulu da Maxidoonanka yugo yogo wari kuyin ŋa, yugo ke siginten gaa a xanjono nan ti : « Duruxoto an nan ri Maxidoona, an na o deema ! » 10 Pawulu ke kuyi falle, a da Maxidoona killen muuru ken sigira su yi. O saxunten ya na a yi nan ti Alla ya n da o xiri katta non ŋa kuudo o na kiɲandi non ŋa.

[Liidi tuubiye Filipo]

11 O da fuuren wutu Tooro nan taŋe Samutiraake dunden ŋa. Ken yillakara, o kiɲe Ɲapoolo. 12 O giri no nan daga Filipo, ken ga ni Maxidoona tunkandebe yogo yi, a kandan gaa Roomunkon maxa. O da wuce ɲa ken debe yi. 13  ŋa, o bogu ti deben fonlaqen ŋa, nan daga do fanlaqen ŋa ma o na allanbatinoqun kita. O gaa taaxunu tan, yaxaru be ga da me ɲi non ŋa, o sefe i da. 14 Yaxarin jula yogo wa kapa yaxaru ku yi, a toxon ya ni Liidi. A na purunyiraamun ya gaagana. Cateeranken ya ni, a gaa allanbatini. A da o terinka moxosiri, baawo Kamanen da a sondomen xaaya Pawulu sefon terinkanden da. 15 A do i kaadunkon su wanqi nan tuubi. A da o xanjo nan ti : « Selli axa ga da a tu keeta ti in saxu Kamanen ŋa, xa ri o n daga o kan ŋa. » A da o senbentan deni i kan ŋa.

[Pawulu kasoroye Filipo ya]

16 Koota yogo o gaa dagana allanbatinoqun ŋa, tunbaari yaxanne yogo gemu o yi killen ŋa, jinnagumen ya ni. A jinnanfaayinden ya n ɲa sababu yi a ga da naaburen gaben kinni i kamannu yi. 17 A toxo sukkene do o do Pawulu yi, a gaa tini : « Ku sero ni Alla wuruginte komon ya yi ! I na kisiyen killen ya koono axa da ! » 18 Bita gabu, a gaa a kanma na ke ɲa. Lagaru, Pawulu ma katu a muɲini, a tiirinbe na a jinna ke faayi nan ti a da : « Ti Isa toxon ŋa, n da an ɲaamari an nan bogu ke yaxare yi. » Ken batte su, jinnan bogu a yi. 19 Jinnagume ke kaman yugun ga da a tu ti fo ya n bogu ikun kiteraqen ŋa, i da Pawulu do Siili raga na i kurunta katta deben bera xooren ŋa nan daga i sigindi kiitikutaanon jon ŋa. 20 I da i koyi kiitikutaanon ŋa nan ti : « Ku ni Yehuudiyanun ya yi, i gaa a kanma na o deben bonondi. 21 I wa laadanu xa xaranŋundini seron ŋa, oku Roomunko ga ma xawa nan duŋe i ya sakkati na i batu. » 22 Jaman dire katta i ya. Fankamanun ti i na i yiraamun bagandi i ya, i na i katu ti gaɲanun ŋa. 23 I ga da i katu sirin ŋa bire be, i da i sedi kason ŋa nan ti tangandaanan na i koroosi moxosiri. 24 I ga da ke ko tangandaanan da, a xa da i ro kason konpon su fo jupen ŋa na i ro xarun ŋa.

25 Katta wuron naxaane, Pawulu do Siili gaa Alla batta nan suugu, kasorankon kuttun su wa i terinkana. 26 I gaa ken ŋa tan, ɲiiɲen xosi saralle, saralleyi xote, na kasonkan tagayun tinŋun yonko. Ken sigira kasonkan fonlaqun su wuɲi, surunmen wase bakka kasorankon su yi. 27 Tangandaanan giri. A ga da kasonkan fonlaqun wuɲinton wari, a da tanmen buusu ti i wa du karini, baawo a sinmaye kasorankon su wuru ya. 28 Xa, Pawulu xaaru a yi nan ti : « Maxa fo bure ɲa du yi de ! O su wa yere ! » 29 A da ɲooman ragandi nan wuru roono kasokonpen ŋa, a faten danman su gaa sarallene. A da du sedi Pawulu do Siili taanun ŋa. 30 Ken falle, a da i bagandi nan ti i da : « N kamanyugu, n nan xawa manne xa ɲaana a ra gaa in kisiini ? » 31 I ti a da : « Saxu Kamane Isa yi an do an kan su na kisi. » 32 I da Kamanen Xibaari Liŋen kiɲandi a yi na a kiɲandi sere su gaa a kan ŋa. 33 Ken wuru kutte su yi, a do i daga na i tugun wanqi. Ken falle, a do i kan su wanqi nan tuubi. 34 A do Pawulu do Siili daga i kan ŋa na i yigandi. Yugo ke do i kan su sewo na a sababu ɲa i ga saxu Kamane Alla yi.

35 Yillen ga kare, Roomunkan kiitikutaanon da polisinun xayi tangandaanan ŋa nan ti : « Ku sero wara ! » 36 Tangandaanan ri a ko Pawulu do Siili danŋa nan ti : « Kiitikutaanon da polisinun riiti nan ti in na axa wara, axa ra wa bakka nan daga jamu do xeeri yi. » 37 Xa Pawulu ti polisinu ku da : « Roomu renmun ya ni o yi. I da o katu duna su naxan ŋa ; i ma hari o kiiti ; i da o sedi kason ŋa. I wa a mulla na o mullin wara saasa. Ken xa katta ɲaana kan moxo yi ? I yinmenu ya n riini o wara ! » 38 Polisinun daga ku sefo ko kiitikutaanon da. I ga da a tu ti Pawulu do Siili ni Roomu renmun ya yi, i do polisinun su kanu. 39 I ri yanpaye muuru i maxa kuŋa, na i wara na i ɲaaga i nan bogu deben ŋa. 40 I ga bogu kason ŋa, i daga Liidi kan ŋa. I do isanwaaxinun da me wari na duruxotoye kini i ya, i daga.