Ɲangollu 17

[Pawulu do Siili Tesaloniixedagaye]

Pawulu do Siili daganto, i bogu ti Mifipoolu do Poloona ya yi. Ken falle i kiɲe Tesaloniixe. Yehuudiyanun wa non ŋa. 2 A kiɲe i xa yi ya yi xoyi a ga demu a ɲaana noqu kuttun ŋa moxo be. A da Tuumayinkooto sikki sukka me yi a do i gaa masalana ti Safandi Sennun ŋa. 3 A da a tuyindi i ya na a xurandi i da nan ti : « N gaa ke Isa be xibaaren koono axa da kundu, a ya ni ke yi. A kallen ni waajibin ya yi, a nan wundi bakka furun naxan ŋa, ken xa ni waajibin ya yi. Baawo, a ma o ju. »

4 Yehuudiyanu yogonu saxu sefo ku yi. I do gerekin allankannaanon yogo do yaxarin kallanka gabe kafi Pawulu do Siili yi. 5 Xa Yehuudiyanun suuxu ken ŋa. I da seri xafunu yogonu kafu du yi, kuudo i na deben xooti. I senbenta ro do Pawulu do Siili ya Yasoona kan ŋa, kuudo i na i raga do i nan daga kiitikutiran ŋa. 6 I ga ma ikun kita, i da Yasoona do isanwaaxinu yogo raga na i kurunta katta kiitaanon ŋa nan ti : « Ku sero da duna su ya xooti ! I kiɲe o xa yi ! 7 I jaatigi ni Yasoona ya yi ! I na kille tana ya yi, ken do Roomu tunkanyugo Kesaari sariyan ga da me sooxi. I sinmaye, tunkanyugo tana ya na du yi, a toxon ga ni Isa. » 8 Ku sefo da kiitikutaanon do jaman su haqilun bonondi. 9 I da likken ya saxu Yasoona do kuttun kanma. I da a tuga, ken falle kiitikutaanon da i wara.

[Pawulu do Siili Beerindagaye]

10 Wuron ga ro, Tesaloniixe isanwaaxinun da Pawulu do Siili wurundi katta Beeri yi. I ga kiɲe non ŋa, i daga Yehuudiyanun allanxarankan ŋa. 11 Beeri Yehuudiyanun nan xoto Tesaloniixe xallun ŋa nuxudunxullaaxu yi. I da Xibaari Liŋen do ŋanniyi siren ya kita. Koota su, i wa Safandi Sennun xaranŋa doome na a faayi selli Pawulu sefon ga ni tonŋun ya yi. 12 Yehuudiya gabe saxu Isa yi, ken do gerekinka yaxarin kallankon do gerekinka yugu gabe. 13 Xa Tesaloniixe Yehuudiyanun ga da a mugu nan ti Pawulu wa Alla digaamen kiɲandini Beeri xa yi, i daga non ŋa na jaman xooti kuudo manqanŋen nan giri. 14 Ken sigira su yi, isanwaaxinun da Pawulu wurundi na a taŋandi ti geejin banŋen ŋa. Xa Siili do Timoote, kun toxo Beeri yi. 15 Sero beenu ga ware Pawulu kaane, i do a daga ma Hateena. I saaganto katta Beeri yi, a ti i na a ko Siili do Timoote da ti i na i ɲi Hateena yi jawoye yi.

[Pawulu Hateenantaaxe]

16 Pawulu wa Siili do Timoote dukku Hateena. A yaaxen wa deben fakkan ŋa muno yi ; ken da a tooro. 17 Ken kuŋa a do Yehuudiyanun do sero beenu gaa Yehuudiyan killen ŋa, a da i sefanlenmaaxun jopa Yehuudiyanun allanxarankan noxon ŋa. Koota su, a wa telle jaman meɲiranun xa yi do seron nan sefe. 18 Tuwaana xooro yogonu ɲi no, i xa da Pawulu laxadujaga. Yogonu ti : « Manne laxangaba ni ke yi ? » Seri tana xa ti : « Ma a na a mulla na alla tana ya xibaaren ko ? » Ken do i fi su, Pawulu ken wa Isa Alimasiiwu koono, na kallen falle wundiyen xa ko. 19 I do Pawulu daga deben finyaaxabagandaanan banŋe, a toxon ni Haripaaga, na a tirindi ti : « An gaa killi kurunba ke be xaranŋundini seron ŋa, o ra wa a tuunu ba ? 20 An gaa fiinu be koono, fi kurunbon ya ni. O wa a mulla an na i wure koni o da. » 21 Tonŋu, Hateena mukken do debinlenman su da i hanmin ɲa ku fi kurunbo ya terinkanden ŋa i gaa i laxamini.

22 Pawulu siginte jaman naxa, a ti : « Hateenanko, n yaaxen gaa axa yi moxo be, battaana xooro ya ni axa yi, 23 baawo in gaa yaalana axa debe ke noxon ŋa, n da axa munonsadaxindinoqu gabe wari. N da hari a safanten wari munonsadaxindinoqu yogo yi ti : “ Batifo be ga ma tuyi. ” Axa gaa ke be batta axa ga nta a tu de, n faayi ga ri ken ya tuyindi axa yi. 24 Alla ke be ga da duna do fo wo fo gaa a noxon ŋa taga, a ya ni kanmun do ɲiiɲen Kaman ŋa. Haadamarenme batika tagante ra nta ɲaana a wuyira yi. 25 A haaju nta haadamarenme kittidufo yi, baawo a ya ni bireyen do yonkiranwareyen do fo tana su kuyaanan ŋa. 26 A da xabiilan su taga bakka yugu baane ya yi na i sanqi do ɲiiɲen kanma. A da gingen ro i du baananbe su do i funen naxan ŋa na waxatinun rakutu i da. 27 A da ken ɲa ya, kuudo i ga na a muuru moxon danbe su yi, i na a wari. Tonŋun ga ni ke be yi, o du baananbe su do Alla ma laato. 28 O bireye, o daganansaageye, a su na ti a ya yi. Xoyi axa tuwaanon yogonu ga ti : “ A renmun ya ni o yi. ”

29 « Ayiwa, baawo allanlenmun ya ga ni o yi, o ma xawa a sinmana nan ti Alla do seron muno dabarinton nan baana, ken ga na ɲa hari kanŋen ya yi, ma xaalisi xulle, ma gidi segunten yinme yi. 30 Haadamarenmun ga da wuce su ɲa tuwanbalaaxun ŋa, Alla nta ken jaatene. Xa, a waajibinten ya ni be su kanma, an gaa noqu su yi, an nan nimisi na an jikkunun faraaxu na an tan bogu battaran fin su yi. 31 A da koota rakutu kuŋa. Ken koota ga na kiɲe, a da sere sugandi, ken gaa duna su kiitini ti teleŋontaaxu yi. Ken ya saabu da a ga da a wundu bakka furun naxan ŋa na a koyi nan ti i da a ya sugandi. »

32 I ga da Pawulu mugu wundiyin xibaaren koono, yogonu soyi a yi, xa kuttun ti : « An ga na ɲi ke fi koono ta tana o na an terinka ! » 33 Pawulu do i toxo non ŋa ke ya yi. 34 Ken do i fi su, yogonu toxo do Pawulu yi, nan saxu Isa yi. Yugun ŋa, Joniisi wa kapa i ya, ken ga ni Haripaaga feddanlenma yi, ken do yaxare yogo a toxon ga ni Damaari ken do sere tananu.