Ɲangollu 18

[Pawulu Korintindagaye]

Ken falle, Pawulu giri Hateena nan daga Korinti. 2 A do Pontinka yugo yogo da me ɲi no, a toxon ga ni Hakkili, a do i yaqe Pirisika girinten gaa Yitaali jamaanen ŋa. Baawo tunkanyugo ken ga ni Koloodi, a ti Yehuudiyan su nan xate bakka Roomu deben ŋa. Pawulu daga katta i ya do i nan kafi, 3 baawo i su ni gollinlaxa baane ya yi, ken ga ni tilliisidabariyen ŋa. 4  su, Pawulu wa waajundini Yehuudiyanun noxon ŋa, kuudo i na katu Yehuudiyanun do Gerekinkon faamundini.

5 Siili do Timoote ga giri Maxidoona, Pawulu da i gollen su ɲa waajunden baane yi, na a koyi Yehuudiyanun ŋa nan ti Isa ya ni ke yi. 6 Xa Yehuudiyanun ma duŋe ti a sefon ŋa, i toxo a diganburunu. Ken ga ɲa, Pawulu da i dorokokanpon konko, a ti i da : « Ayiwa saasa ke, axa fi wa axa maxa de ! N raqen ntaxa a yi. Gelli waca, n faayi telle xabiila tana waaju. » 7 A giri non ŋa nan daga yanqa yugo yogo noqun ŋa ken toxon ga ni Tiiti Yuusiti. Allanbattaana ya ni, a kan do Yehuudiyanun allanxarankan wa me kaaran ŋa. 8 Kirisiipu, ken ga ni allanxaranka ke yinmanken ŋa, a do i ka, kafiini Korintinka jama gabe, i ga da Pawulu terinka, i saxu Kamanen ŋa, i tuubi nan wanqi.

9 Wuro yogo yi, Pawulu da Kamanen wari wuraaxun ŋa a ga ti i da : « Maxa kanu de ! Sukke do an sefen ŋa, maxa kuuru, 10 baawo in wa do an batten ŋa, sere su kitte nta an ŋa. Seri gabe wa in maxa ke debe yi. » 11 Pawulu da siine do taxande ɲa Korinti yi a gaa seron xaranŋundini Alla digaamen ŋa.

[Pawulu sikke Galoona jon ŋa]

12 Galoona gaa Haaxe maran yinmankaaxun ŋa bire be yi, Yehuudiyan su solinten ya ni katta Pawulu yi ken bire yi. I da a raga do a nan daga katta kiitikutaanan ŋa. 13 I ti : « Ke yugo na a mulla na seron wara allanbatikilli kurunba ya yi, ken xa do o nta genme. » 14 Pawulu ti i wa moxotakonini, xa Galoona yinme ti Yehuudiyanun da : « Yehuudiyanu ! A gan da a ɲi lenki ke yugo ga da fo buru xoore tana ya ɲa, n ra wa muɲini na axa terinka. 15 Xa ke ni axa Yehuudiya duuru ya xibaare yi de, baawo axa na me yi do fontuwaaxun do sefon do axa ya batten ŋa. Nke ra wa ɲaana axa da kiitaana yi ken ŋa ba ? » 16 A da i xata bakka kiitikutinoqun ŋa. 17 Ken sigira su yi, Sositeene be ga ni allanxarankan yinmanken ŋa, i da jiiren xenu a yi na a katu kiitikutiran raqen ŋa. Galoona ma hari i faayi du.

[Pawulu saageye katta Hansooxi-siiri yi]

18 Pawulu da wucu gabe ɲa Korinti yi. Ken falle a sare isanwaaxinun ŋa. A do Pirisika do Hakkili da fuuren wutu nan daga jamaanen ŋa. Saado ken ŋa, a da i yinmen siyi Kekkeere, baawo a ga da tekke be wutu, a tinme. 19 I ga kiɲe Yefeesi yi, a da Pirisika do Hakkili toxo no. Saado a gaa telle, a bogu ti Yehuudiyanun allanxarankan ŋa nan manqa. 20 Kun ti a danŋa : « Toxo o maxa yere yi ke ! » Xa Pawulu ma duŋe. 21 A dagante, a ti i danŋa : « Alla ga na duŋe, ma in ga saage katta axa yi. » Ken falle, a da fuuren wutu nan bogu Yefeesi yi. 22 A ga kiɲe yi, a sege katta Yerusalaamu yi na isanjaman kuuɲi. Ken falle, a yanqa katta Hansooxi-siiri yi. 23 A da wuce ɲa non ŋa. Ken falle a giri non ŋa na Galaca maran do Firigi maran su wura debe ti debe. A wa isanxaranlenmon waajunu ti i nan duruxoto.

[Hapoolu dagaye Yefeesi do Korinti yi]

24 Yehuudiya yugo yogo, a toxon ga ni Hapoolu nan saare Lekandooro, a joofe Yefeesi. Sere ya ni, a sefeneenen xalasinten ga ni moxosiri, Safandi Sennu ku xa tuwaaxun wa a maxa. 25 I da a xaranŋundi Kamanen killen ŋa. A haqilen siren ni, a wa seron xaranŋundini Isa fin ŋa ti duruxotoye yi, xa a ɲi annabi Yahaya wanqinden baane ya tu. 26 A haqilen taaxunten da sefen jopa Yehuudiyanun allanxarankan noxon ŋa. Pirisika do Hakkili wa a terinkana. Ken falle, i do a daga, a ga ma ɲi fo wo fo tu Alla killen ŋa, i da a su ko a da na a xurandi. 27 A da Haaxe dagayen ŋanniya. Isanwaaxinun ti a da fo sire ŋanniya, i xa da bataaxen xayi katta non isanxaranlenmon ŋa nan ti i na a daro moxosiri. A ga kiɲe non ŋa, a da i deema Allanxibaaren ŋa moxosiri ti Alla horoman ŋa. 28 A na sefen xullen ya koono duna su taanun kanma, ken ya saabu da Yehuudiyanun ga ma bote kita a sefon ŋa baawo a na a koyini ti Safandi Sennun ya yi nan ti Alimasiiwu ke de, Isa ya ni !