Ɲangollu 19

[Pawulu Yefeesindagaye]

Na Hapoolu toxo Korinti yi, Pawulu xa da Haasi jamaanen segendanun su kutu nan yanqa katta Yefeesi yi. A da isanxaranlenmo yogo ɲi non ŋa. 2 A ti i da : « Axa ga tuubi, axa da Alla kita ba ? » I ti a da : « Fanka Senne ? Oku ma ken xibaare yinme mugu. » 3 Pawulu ti i da : « Axakun wanqi kan moxo nan tuubi ? » I ti : « Annabi Yahaya ga da seron wanqi moxo be, o xa wanqi kundun ya yi nan tuubi. » 4 Pawulu ti i da : « Yahaya ɲi seron wanqini ya, ken gaa a koyini nan ti i da i jikkunun faraaxu nan saage katta Alla yi. A da a ko Banisirayilagankon da nan ti sere ke be gaa riini i falle, i nan saxu a yi, ken ga ni Isa Alimasiiwu yi. » 5 I saxu a sefon ŋa. I wanqi ti Kamane Isa toxon ŋa. 6 Pawulu da i kitten saxu i yinmun ŋa. Fanka Sennen yanqa i kanma, i saage xan kurunba tana koono ken do i yinmenu xannen ga nta baana, nan saage allanfaarinsefene. 7 I sero tanmi do fillo ya ni.

8 Xasu sikki noxo, Alla koota su ma Pawulu ga daga Yehuudiyanun noxon ŋa, a haqilen taaxunte, na maxankutu seron da, na i duruxotoyen su dabari ku beenu gaa a terinkana ma i ga n da a faamu nan duŋe ti a yi. 9 Ken do i fi su, xandunxoto wa jama ke yi, i gaa Kamanen killen beqe a su jon ŋa. Pawulu laato bakka i ya, a do isanxaranlenmon daga Tiranna xarankan ŋa, i do non seron wa me tirindini koota su. 10 I toxo ken moxo yi xaaxu filli, Haasi jamaanen muuma, Yehuudiyan do Gerekinko, a su da Kamanen Xibaari Liŋen mugu.

[Sikeewu renmun xibaare]

11 Alla kafunten wa Pawulu yi na kaawafi xooron dabari moxosiri. 12 Seron saage Pawulu golliɲanyiraamun wutu nan daga i suusa i watunton ŋa, i na saha, jinnan na bogu i ya.

13 Yehuudiyanu yogonu xa wa yaalana do noqunun ŋa nan ti i wa jinnan xatana ti Kamane Isa toxon ŋa xoyi firijen ya ga ni. I na ti jinnan da : « Jinna ! Bogu ti Isa toxon ŋa, Pawulu gaa Isa ke be koono ! » 14 Sadaxakiɲandaana xoore yogo ya ni, a toxon ga ni Sikeewu, a ya ren yugun ɲeri golle ni ke yi. 15 Xa koota yogo, jinnan ti i da : « N wa Isa tu, n da Pawulu xa toxon mugu, xa axakun ni ko baane yi ? » 16 Jinnagume ke dire katta i ya nan xenu i ya na i guma. I ga duguta a yi, i wurunton bogu a kan ŋa i duuru, i feton banŋe wo banŋe joogiye. 17 Yefeesinkon ga da xibaare ke mugu, Yehuudiyan do Gerekinko, i kanu moxosiri. A su saage Kamane Isa toxon darono.

18 Jama ke be ga toŋondi, fo wo fo gaa golli bure be kanma biten ŋa, a su ri xiire ti a yi jaman jon ŋa. 19 Jinnamansanjama be gaa tuubinton ŋa, i do i jinnamansankitaabun ri na i buyi a su yaaxon ŋa. I ga da kitaabu ku jaate, a xiiman gemu tankarage wujune maxanbaane kiye tugaaden ya.

20 Ken moxo ya ni Kamanen daalen ga sanqi nan senben kita ti a raniyen ŋa.

[Yefeesi murutiye]

21 Ku fiinu falle ya ni, Fanka Sennen ga da Pawulu ɲonqi a ga da Maxidoona do Haaxe kutunden ŋanniya, kuudo nan daga yi. A ti : « N ga na daga non ŋa, waajibin ya ni in nan kiɲe xa yi. » 22 A da i golliɲanlenmo filli wara dagana Maxidoona, kun ga ni Timoote do Harasiite yi. Xa aken yinme da fonne ɲa Haasi maran ŋa.

23 Ken bire yinme, manqan xoore ɲa Yefeesi yi do Kamanen killen xibaaren ŋa. 24 Sawaaxe yogo ɲi non ŋa, a toxon ga ni Demeteeri, Yefeesinkon muno yaxare be toxo ga ni Hariteemi, a wa a batikan xaalisi xulunma bucinnun dabarini. Sero beenu ga ɲi ken golle dabarini a da, a wa nafa xoore kitta i ya. 25 A golliɲaŋaanon do sere su ra gaa ken golle me tana da, a da i su kafu me yi nan ti i da : « N maarenmu, axa wa a tu nan ti o xeerin bakka o ke golle ya yi. 26 Xa ke be gaa du yi, axa da a wari ; axa da a mugu : Pawuluntoxo ke ti haadamarenmen yinme kitten gaa fo wo fo dabarini, kun feti batifo siru yi. A da i duruxotoyen su dabari na jaman fo gabe haqilen yilla. Yefeesi baane feti ken ŋa de ! A faayi Haasi maran su kitana. 27 Ken riini ti o toxon bononden ya yi, a nta xenpene ken xa baane yi. A wa o munon Hariteemi ke xa darajan xenundini, na a batikan xa loxoso. Haasi do duna muuman ken xa su na a ya batta. »

28 Jaman ga da ken mugu, i butu nan toxo xaarunu nan ti : « Oku Yefeesinko da ke muno, ken ga ni Hariteemi, a me nta duna muuman su yi ! » 29 Ken manqanŋe ro do deben su yi. Jaman danginte, i da Gaayi do Lisitarooxo raga, kun ga ni Pawulu teranlenmon ŋa, i gaa bakka Maxidoona yi, do i nan xosi daga deben meɲira xooren ŋa. 30 Pawulu da a xanu nan daga non ŋa, ma i ra wa i kisini, xa isanxaranlenmon ma duŋe a da. 31 A xananun ga ni non fankama xooro be yi, kun xa da faaren xayi a yi na a xanjo ti a nan maxa daga non ŋa. 32 Ken da a ɲi, jama ke yinme do me kutanden wa me yi. Yogonu wa xanne, yogo tananu wa xanne. A fo gabe ken nta a tu fo be yinme saabu da i ga da me ɲi. 33 Yehuudiyanun ga da Lekandoorontoxo be wara du kaane, jama ke yogo wa xibaare ke moxo koono a da. Lekandooro da i kitten wutu kanmun ŋa, a wa a mulla na a ko jaman da nan ti ikun taqen nta a yi. 34 Xa a ga xura jaman da nan ti Yehuudiyan ya ni, i da beeteye haqe me ɲa holokan ŋa, i gaa sefe baane ke wonjono nan ti : « Oku Yefeesinko da ke muno, ken ga ni Hariteemi yi, a me nta duna muuman su yi ! »

35 Fi falle, sere ke be siginten gaa deben faarun ŋa, a katu jaman sabarindini. A ti : « Yefeesinko ! Ko baane na yere a ga nta a tu nan ti o ke muno xoore Hariteemi batika ke do ike sawura be ga giri kanmu ŋa, i xalifanton ni oku Yefeesinko ya yi ? 36 A su tuwaaxun gaa ken ŋa, o nta a faayini o nan deeje, o nan maxa fo dabari, fo be ga nta xawa. 37 Axa da ku sero raga do i nan ri yere, i ma fo fayi o batika ke noxon ŋa, i ma fo bure ko o muno ke xa da. 38 Selli fi gaa Demeteeri do i golliɲanlenmon do sere tana ya naxan ŋa, kiitiranun wa no, i nan daga kiitaanon sagata ke ! 39 Fi tana ya gaa axa maxa, xa da a ko, jaman na a maarensafa. 40 O ga ma o haqilen toxo o yinme yi, Roomunkon wa o jalagini do o lenki ke golle yi de, meɲiye be o ra nta hari a maanan koono seron gaa a faamunu ! » A ga duguta sefen ŋa, a da jaman sanqi.