[Misikiina yaxaren sadaxan xibaare]
21
Isa Alimasiiwu gaa Allanbatikaxooren noxon ŋa,
a da a wari bannanun gaa i sadaxan roono sadaxanrofon noxon ŋa.
2 A da kiinakariido yogo wari,
misikiinen ya ni,
ken xa da godo miso filli ro a yi.
3 A ti :
« Tonŋu,
n na a ko axa da,
ke kiinakariido misikiine ga da fo be ro a yi,
a ya n fasu a su yi,
4 baawo kuttun haaju ga nta xaalisi be yi,
i da ken ya sadaxi.
Xa ke yaxare ken xa do i misikiinaaxu su,
a da i naaburen su ya ro a yi. »
[Allanbatikaxooren kareyen do Seren Renmen riye]
5 Ken da a ɲi sero yogonu wa Allanbatikaxooren digaamen ŋa,
nan ti a tage ti gidi faranparon ya yi.
Ayiwa fo sadaxinton xa da a talla a faranparondi.
Isa ti :
6 « Axa yaaxen gaa ke ka be yi kundu,
koota wa riini,
a su riini guruje ya,
hari gidi baane nta toqo gidi baane kanma. »
7 I da Isa tirindi nan ti :
« Xaranmoxo,
ken ɲaana kan bire ?
Kan taagumanse na a koyini o yi ti ku fiinu ɲaŋi waxatin tinko ? »
8 Isa ti :
« Xa da du koroosi axa n maxa sanku,
baawo seri gabe wa du xayini ti in toxon ŋa nan ti :
“ Nke ya ni Kisindaanan ŋa,
waxatin kiɲe.
” Xa maxa sukke do i ya de !
9 Axa ga na fitinanun do murutiyun xibaaren mugu,
axa haqilun nan maxa bono !
Waajibin ya ni kun fina gaa ɲaana,
xa duna gille fe fina. »
10 A yille tini i da :
« Xabiilanun wa gilli me xannen maxa ;
jamaanun na giri me xanne maxa ;
11 ɲiiɲen na saralle saralleyi xoto ;
dullu xooron na kutundi noqunu yi ;
taawoonen na ri noqunu yi ;
kanunta fiinun do taagumansi xooron na ɲaŋi kanxotten ŋa.
12 Xa saado ke su gaa ɲaana,
i wa axa ragana ;
i na axa yanganxata ;
i do axa na daga allanxarankaanun noxon ŋa na axa kiiti,
na axa ro kason ŋa.
I wa axa ragana na axa deni tunkanyugun do fankamanun banŋe do in batten ŋa.
13 Ken wa ɲaana sababu yi,
axa gaa seedene ti in ŋa.
14 Ken kuŋa,
axa ga n xawa sefo beenu koono na axa du bogu kittu yi,
ken hanmi nan maxa axa raga,
15 baawo inke yinme wa digaamun roono axa raqun ŋa,
na haqile xa kini axa yi,
fo be gaa ɲaana sababu yi,
axa xonnon gaa kontono axa yi,
walla xa na axa kuta.*
16 Hari axa maanu do axa faabanu,
a do axa waaxinun do axa maarenmu,
kafiini axa menjanŋun ŋa,
i wa riini janbayen siiti ti axa yi,
na axa yogonu kari.
17 Seren su wa xonnaaxun wuttu katta axa yi inke saabu da.
18 Xa hari yintifunsu baane nta sankunu bakka axa yinmanyintun ŋa,
19 xa muɲi,
ken ya ni,
axa yonkin na kisi. »
20 Isa ti :
« Axa ga na a wari kuranlenmon ga da Yerusalaamu yoori na a raga,
axa na a tu ti a kare waxatin tinko.
21 Ken bire ga na sere be ɲi Yehuuda maran ŋa,
an nan wuru dagana gidi gillun ŋa.
A ga na sere be ɲi Yerusalaamu noxon ŋa,
an xa nan bogu.
A ga na sere be xa ɲi gunnen ŋa,
an nan maxa ri kaanun ŋa.
22 Baawo kun waxatinu ya ni,
Alla gaa seron yanganxatana,
kuudo fo wo fo ga koni Safandi Sennun ŋa,
ken na ɲaŋi.
23 Bone wa nuxunton do sugundindaanon da kun waxatinu yi,
baawo toora xoore ya n ɲaana ɲiiɲen kanma,
Alla wa buttu ku sero wure.
24 Seron wa kalla ti labon ŋa ;
seron wa rageene nan daga i ɲa komo yi xabiilanu tananu naxa.
Mukkunun wa riini Yerusalaamu kara nan tere a kanma,
ma i waxatin ga n tinme bire ke be yi.
25 « Taagumansun wa ɲaana kiyen do xason do saanun ŋa.
Geeji direxannen do banbuusen manqanŋen wa xabiilanun su lasamana ɲiiɲen kanma,
na i kanundi.
26 Fo be gaa riini ɲiiɲen kita,
ken wa yanqana i haqilun ŋa i na kanu ma i ga xiti,
baawo kanmun senbun su ya n sarallene.
27 Ken bire,
nke be ga ni Seren Renmen ŋa,
i na in wari riini xaban noxon ŋa,
n do senben do nooro xoore.*
28 Axa ga na a wari ku fiinu ga jope ɲaana,
axa na axa yinmun wutu na kanmun faayi,
baawo axa kisiyen waxatin ya n tinko. »
29 Ken falle Isa da ke masayila ko i da nan ti :
« Xa da turon do yittun kuttun faayi i gaa moxo be :
30 axa ga na i wari i ga funti,
axa na a tu ti kandaaran kiɲe.
31 Ken moxo baane ya ni,
axa ga na ku fiinu wari,
axa na a tu ti Allantunkaaxun tinko.
32 Tonŋu,
n na a ko axa da :
ku sero nta kalla na a ɲi ku fiinu ga ma ɲaŋi.
33 Kanmun do ɲiiɲen wa buruxeene,
xa inke sefen nta buruxeene abada.
34 « Xa da du koroosi !
Xa maxa duŋe sangen do dolominnen do duna hanminun gaa roono axa yonkinun ŋa.
Ken ga fe Seren Renmen riyen na axa juunu ya.
35 Baawo sere wo sere gaa ɲiiɲe ke yaaxen kanma,
a riyen na a kaman juunu ya xo ɲexen gaa juwintan roono jalan noxon ŋa moxo ke be yi.
36 Ken kuŋa,
xa maxa xenqe ;
xa da Alla ɲaaga waxatin su yi,
kuudo fo be gaa riini,
axa gaa senben kitana nan kisi a yi moxo be.
Axa na Alla ɲaaga,
axa gaa senben kitana moxo be nan sigi Seren Renmen jon ŋa. »