Yohanna 12

[Ten daariye Isa Alimasiiwu taanun ŋa]

(Mace 26.6-13 ; Maarika 14.3-9)

Bito tunmi saado gaa riini, Isa Alimasiiwu daga , Lajaara ga ɲi debe ke be yi. A da ken Lajaara ya furen wundu nan xaso. 2 I da baasi xoore dabari Isa da. Maarata wa do gollen ŋa, Lajaara yinme wa do yigaanon ŋa, a taaxu kafiini Isa yi yigeyokken ŋa. 3 Maariya da te timiliŋi xalasinten liitara taxande wutu, jonko xote, i gaa a xilli « naari », na a su daari Isa taanun ŋa, na i suusa ti i yinten ŋa. Te ke timiliŋen kiɲe kan su yi. 4 Isa xaranlenma ke be gaa riini a janba, ken ga ni Hisikarooti, a ti : 5 « O gan da ke te gaaga, o ra ɲi kamo sikki godoxulle ken kinni misikiinun ŋa, ma kan moxo ? » 6 A ma ke ko ti misikiinu ku yi de, a da a ko ya baawo fayaanan ya ni. Jaman xaalisin taaxunu a ya maxa, tejonko ke gan n kafi a yi su, a ɲi a wuttu ya. 7 Xa Isa ti : « A wara a na i gollen dabari, a da in waxari katta in firindikootan ya yi. 8 Misikiinu ku be ga ni, axa do kun na doome yi ya koota su ; axa do inke ken xa nta toqo doome yi. »

[Yinmankon kandeye Lajaara karinden ŋa]

9 Ken da a ɲi, a mugi nan ti Isa wa Beyitaani. Jama xoore giri maran debun ŋa, nan daga a sagata, i na Lajaara xa wari, Isa ga da a wundu bakka kallen ŋa. 10 Ken ga ɲaŋi, kande na Lajaara xa kari, 11 baawo Lajaara ya n ɲa sababu seri gabe ga bogu i jaman ŋa nan sukke do Isa batten ŋa.

[Tunkanyugon roye Yerusalaamu yi]

(Mace 21.1-11 ; Maarika 11.1-11 ; Luka 19.28-40)

12 Ken yillakara, jama xoore ke be ga ri sallen ŋa yi, i da a mugu nan ti Isa ya na killen ŋa riini. 13 Jaman da tamarikingun kutu ken ya yi nan daga gemu Isa yi, i gaa luukene nan ti :

« Hosanna ! Tiigeyen wa Alla da !

Tunka Duumanten gan na bareke ro ke be gaa riini ti a toxon ŋa, tunka ! »

14 Isa da farinlenme kita, nan setu a kanma, xoyi Safandi Sennun ga da a ko moxo be nan ti :

15 «  debidunko, maxa kanu, baawo an tunkanyugon wa riini. A setu faren ŋa. »

16 A xaranlenmon ma a faamu fina fi be gaa du yi, xa Isa ga ro i tunkaaxun noxon ŋa, i sinme nan ti ku fiinu su ɲi Safandi Sennun ŋa a fin kanma. Ayiwa, i ɲaŋi xa. 17 Isa ga da Lajaara xiri bakka xaburan ŋa na a birandi, sere su ga ɲi do a batten ŋa, i seede ti i ga da ke be wari. 18 Jama ke be yinme ga ri katta a yi, ken ni i ga da a kaawafi ɲaŋunte ke mugu ya. 19  ti me da kuŋa : « Axa da a wari, axa ra nta fo wo fo su da keeta, baawo seren su ya faayi ga sukke do a yi. »

[Darontaaxun do kalle]

20 Sero beenu ga ri allanbati Yerusalaamu yi sallen ŋa, dantanto ɲi i ya Yehuudiyanu ga fe. 21 I daga katta Filipu yi, aken ga bakka yi maran ŋa, na a tirindi ti : « N maarenme, o wa a mulla na Isa wari. » 22 Filipu daga a ko Handere da ; i sero filli daga katta Isa yi. 23 Isa ti i da : « Kootan kiɲe, gaa roono i tunkaaxun noxon ŋa. 24 Tonŋun-tonŋu, n na a ko axa da ti, yillifunse be ga ma kaawa nan tifi, a toqo ken funsu baanaaxu ya yi tannu. Xa, a ga na kaawa nan tifi ya ni, a na katu funtini na funsu gabe bagandi. 25 Sere wo sere ga xoto do i yinme yonkin ya yi, a wa bonno a yi. Xa sere wo sere ga na duna ke bireye raga fonne ya yi, a wa bireyi duumanten kitana. 26 Sere be gaa a mulla nan golli in da, a nan sukke do in ŋa. N ga daga noqu su yi, n golliɲaŋaanan xa wa telle non ŋa. Sere be ga na golli in da, n Faaba wa a kanman darono.

27 « N gaa noqu be saasa, n butten bono. N tini kan moxo : “ N Faaba, n kisi ke koota yi ” ? N xa ri yinmen ni ke koota xa yinme ya da. 28 N faaba, an nooron koyi. » Ken noqu, sefexanne giri kanmun ŋa nan ti : « N da in nooro koyi ga n xasa, n wa riini a koyi xadi. » 29 Sero beenu ga ɲi non ŋa, i ga da sefexanne ke mugu, i da a sinma kanmen direyen ya ni. Yogonu ti : « Maliikan ya faayi ga sefe a da kundu de ! » 30 Xa Isa ti i da : « Ke sefexanne tonon nta inke da, a na axa ya da. 31 Ke duna kiiti biren ya faayi ga ri. Yabo, dunadunkamane, ken ga ni Ibiliisa yi, a xate biren ya faayi ga ri keeta. 32 Ke be ga ni inke yi, n ga na wuti bakka ɲiiɲen kanma, n wa seren su kiɲana in du yi. » 33 A faayi ga da i kara moxon ya ko kundu. 34 Jaman da a jaabi nan ti : « Muusa ti o da, ke toqo bireene ya. An katta tini kan moxo Seren Renmen wa wutiini bakka ɲiiɲen kanma ? Ken ŋa, ke Seren Renme ni ko yi de ? » 35 Isa ti i da : « Xurayen wa finna axa naxan ŋa waxati lamaane. Xoyi xurayen gaa axa maxa saasa, xa tere, biten nan maxa axa ju. Baawo sere be gaa bitadunterene ya, a nta i dagaran tu. 36 Xurayen gaa axa maxa bire be, axa saxu a yi, ken moxo axa na ɲa xurayen renmu yi. » Isa ga da ke ko, a laato bakka i ya nan daga muxu.

[Yehuudiyanun toŋondiyiballaaxu ti Isa yi]

37 Hari Isa ga da ke taagumanse su dabari i jon ŋa, Yehuudiyanun ma toŋondi ti a yi. 38  ga da fo be ko, a tinme ke moxo ya yi a ga ti :

« Kamane, ko baane n saxu o waajunden ŋa ;

an da an senben tuyindi ko yi, Alla ? »

39 Mannen ni i ga konto toŋondini ? Yesayaahu ti xadi :

40 « Alla da i finkindi,

a da i ɲa tuwanbalinu yi,

kuudo i yaaxon nan maxa wari,

i sondomun nan maxa faami.

Ken ga n maxa fe, i na du rasaaga katta Alla yi,

a na i sahandi. »

41 Yesayaahu da ke ko ya, baawo a da Isa darontaaxun ya wari, a ga sefe a fin kanma. 42 Na a ɲi xa de, hari yinmanko ku yogonu, fo gabe toŋondi ti a yi. Xa i wa kanna Farisigankon ŋa ; i ra nta bangeene ti a yi i nan maxa i xata bakka allanxarankan ŋa. 43 I gaa darontaaxu be kitta seron ŋa, i na ken ya mulla diinanta i gaa ke be kitta Alla yi.

[Isa xirindi lagare]

44 Isa xan xooren ti : « Sere be ga na saxu inke yi, a ma saxu inke baane yi, xa ke be ga da in xayi, a saxu ken ya yi. 45 Sere be yaaxen gaa in ŋa, a yaaxen wa ke be ga da in xayi. 46 N ri duna yi nan ɲa xurayen ya yi, kuudo sere wo sere ga na saxu in ŋa, a na waase toqo biten ŋa. 47 N gaa ku be koono, sere be gaa i mukku, xa a ga nta gollini ti i ya, nke feti a kiitindaana yi. Baawo in ma ri duna kiiti ; n ri a kisi ya. 48 Sere be ga na nexu inke yi nan bara in sefon ŋa, a do i kiitindaanan ya ni. Baawo in ke sefe ya na a kaman kiitini koota lagaren ŋa. 49 N ma in yonkin liŋu ko, n faaba ke be ga da in xayi, ken ya n da ɲaamarindixannen kini in ŋa, n nan sefe nan xaranŋundindi. 50 N wa a tu xa mene nan ti in faaba ɲaamarindixanne ke ya ni bireyi duumanten ŋa. Ayiwa, ke be ga koni in da, n na ken yinme ya koono. »