Mace 23

[Diinanyinmankon botoburunde]

(Maarika 12.38-39 ; Luka 11.43, 46 ; 20.45-46)

Ken falle, Isa Alimasiiwu da sefen taŋandi i xaranlenmon do jaman ŋa 2 nan ti : « Alla ga da sariya ke be kini annabi Muusa yi, do ya n fatanta ken tuyindini seron ŋa. 3 Ken kuŋa, i gaa fo wo fo koono sariyan xibaaren ŋa, xa da ken ya dabari de. Xa, axa maxa i golli ɲaŋunton faayi de ! Baawo i na fon ya koono, i ga nta a ɲaana. 4 Likki xoore be wutunden xoten ga ni, i na ken ya yette na a taaxu seron xannun ŋa, ikun yinmenu nta katini a yi, sakkati i na i deema. 5 I gaa fo wo fo ɲaana, dukoyintaaxun ya ni. Ken ya saabu da, i gaa safayi xooron siitini i taŋon do i kittun ŋa, na doroko xooro sinqinton rondi. 6 Yigenoqunun ŋa, i na a mulla nan taaxu serixoorantaaxuranun ya yi ; noxon ŋa, i na a mulla nan taaxu sapa kaanankon ya yi, 7 na i darontankuuɲi do beddun ŋa, nan toxo i xilli “ Xaranmoxo. ” 8 Xa, axakun nan maxa duŋe sere gaa axa xilli “ Xaranmoxo ” yi de, baawo xaranmoxo baane ya ni axa maxa ; axa kuttun su ni waaxinun ya yi. 9 Ke ɲiiɲe kanma, axa maxa sere su xiri “ N faaba ”, baawo axa Faaba ni baane ya yi, Faaba kallanke. 10 Axa maxa duŋe sere gaa axa xilli “ Yinmanke ”, baawo axa yinmanken ni baane ya yi, ken ga ni ŋa. 11 Axa seri wuruginten ɲaana axa su da kome ya yi. 12 Sere wo sere ga na du wurugi, Alla wa an maxayanqana ; sere wo sere xa ga na du maxayanqa, Alla wa an wurugini.

[Isa butuye diinanxirisun wure]

(Maarika 12.40 ; Luka 11.39-52 ; 20.45-47)

13 « Bone wa axa da, axakun sariyanxaranmoxonu do axakun Farisiganko, ku munaafaxinu ku. Sero beenu gaa a mulla nan ro ŋa, axa wa fonlaqen teqe i kaane, axakun yinmenu xa nta roono. Ku be gaa a mulla nan ro, axa wa i kabana. 14 

15 « Bone wa axa da, sariyanxaranmoxonu do Farisiganko, ku munaafaxinu ku, axakun be ga da geeji kara na duna su wura kuudo axa na hari seri baane kita na a ro axa diinan ŋa. A ga na ro, axa na saage a sankundini ma a ga da axakun yinmenu dunfillon kita.

16 « Bone wa axa da, axakun geesundaana finkinto ku, axa ti : “ Sere be ga na kuna ti ŋa, ken feti kunaye ; xa sere be ga na kuna ti Allanbatikaxooren kanŋen ŋa, an xobe. ” 17 Xa maxa ɲa haqilanloxo, nan saage finkini ! Ken bire ku filli, kan nan fasu i funen ŋa ? Kanŋen ya ni, ma Allanbatikaxooren be ga da kanŋen senondi ya ni ? 18 Axa ti xadi : “ Sere be ga na kuna ti sadaxindinoqun ŋa, ken feti kunaye ; xa sere be ga na kuna ti sadaxa be gaa a kanma, an xobe. ” 19 Ku finkinto ku ! Sadaxindinoqun do sadaxa, kan nan fasu i funen ŋa ? Sadaxan ya ni, ma sadaxindinoqun be ga da sadaxan senondi ya ni ? 20 Na a ɲi xa, sere be ga na kuna ti sadaxindinoqun ŋa, an kuna ti a do fo wo fo gaa a kanma ya yi. 21 Sere be ga na kuna ti Allanbatikaxooren ŋa, an kuna ti Allanbatikaxooren do Alla ke be gaa a noxon ŋa ya. 22 Sere be ga na kuna ti kanmun ŋa, an kuna ti laareesi ya yi, a do Alla ke be gaa laareesi kanma.

23 « Bone wa axa da, axakun sariyanxaranmoxonu do axakun Farisiganko, ku munaafaxinu ku. Axa wa hari soxofoonun su fo roxon jakkan bagandini, na a ɲi ku be ga ni fo xoton ŋa, axa wa kun toqo no, kun ga ni : teleŋontaaxu, hinneye, a do liimaanagankaaxu ; axa nta ku ɲaana. Axa ɲi ga n xawa joŋana ku fina ya yi, ken bire, axa na kutte ke sukka a yi. 24 Ku geesundaana finkinto ku, axa wa jin tette koota su, kuudo suwanen n maxa daga axa xorun ŋa, na a ɲi, axa wa ɲogome tonno do a yi !

25 « Bone wa axa da, axakun sariyanxaranmoxonu do axakun Farisiganko, ku munaafaxinu ku, axakun beenu gaa jiranxollon do yigexollon falle ya wanqini, na a ɲi i fakkon wa axa maxa fayifoonun do wandi tanpiyen ŋa. 26 Axakun Farisiganka sondonfinkinto ku ! Xa da jiranxollon noxon senondi fina, ken ya ni i falle xa na seno.

27 « Bone wa axa da, axakun sariyanxaranmoxonu do axakun Farisiganko, ku munaafaxinu ku. Axa na xoyi xaburan ya, i ga da a kanma faranparondi, na a ɲi a noxon fakkan ni xotti xason do timi buren baane ya yi. 28 Axa na kundu ya yi. Seron yaaxen gaa axa siginton ŋa, i na a sinma axa teleŋonton ya ni. Ken xa, axa noxonun fakkon ni munaafaxaaxun do allankutayen baane ya yi.

29 « Bone wa axa da, axakun sariyanxaranmoxonu do axakun Farisiganko, ku munaafaxinu ku, axakun beenu gaa xaburon tagana, na teleŋonton xaburon jago, 30 axa gaa tini : “ Oku gan gemu o seri fanon kiyen ŋa, o ma ɲi duŋene i da annabinyinmun foren joqen ŋa. ” 31 Axa yinmenu seede ti a yi nan ti axa ya ni annabinyinmun kallaanon bonsonŋun ŋa de ! 32 Ken kuŋa, axa seri fanon ga da golle be ɲa, xa da a tinmandi ke ! 33 Ku samanburu ku ! Kooson soxoodinu ! Axakun katta kisiini Jahannaba yanganxatan ŋa kan moxo ?

34 « Ken kuŋa axa terinke : nke wa annabinyinmun walla katta axa yi, ken do fintuwaano, kafiini sariyanxaranmoxonu. Axa wa i yogonu karini, axa wa i yogonu ŋa, na yogonu katu axa allanxarankaanun noxon ŋa, axa wa i yogonu xatana debe ti debe. 35 Ayiwa, Alla seri sire su foren ga joxi ɲiiɲe ke kanma, ken su haqen tiŋeene axa ya yi, na a wutu foren joxinden ŋa, aken be ga ni Alla seri teleŋonta xoore yi, nan ri a wara Baraaxi ren yugo Jakkariyaawu yi, axa ga da aken be kari Allanbatikaxooren do sadaxindinoqun naxan ŋa. 36 Tonŋu, n na a ko axa da, ke su haqen riini ɲa ku seran meenu ya kanma.

[Isa jikkirankutiye Yerusalaamu xibaaren ŋa]

(Luka 13.34-35)

37 « , ee, Yerusalaamu ! An wa karini ; Alla ga da sero beenu xayi katta an ŋa, an wa i xa gididunwalla. Taanu manime ni in ga da a xanu na an renmun kafu me yi xoyi selinjaaxen gaa i renmun kapa me yi i kanpon wure moxo be, xa an bara ! 38 Saasa ke, Alla faayi ga da an batikan duuron toxo an maxa. 39 Ayiwa, n na a koni an da xa nan ti : an ntaxa in walla keeta ma koota be an ga n ti :

“ Tunka Duumanten gan na bareke ro ke be gaa riini ti a toxon ŋa. ” »