[Sadaxindi moxo]
6
« Axa maxa axa diinan ɲa dukoyintaaxu yi seron jon ŋa de !
Axa ga na ken ɲa,
muson ntaxa axa da axa Faaba kallanken noqu.
2 « Ken kuŋa,
an ga na ɲi misikiinun sadaxini,
maxa a ɲa ti dukoyintaaxu yi.
Munaafaxinun ya golle ni ken ŋa allanxarankaanun do killinxannun ŋa,
kuudo seron na a ko.
Tonŋu,
n na a ko axa da :
i da i gollen muson kita.
3 Anken ga na ɲi sadaxindini ti an tayen ŋa,
an noogen nan maxa bogu a xala.
4 Ken moxo yi,
an sadaxinden na toxo sutura yi ;
an Faaba Alla ke be gaa gundon ŋa,
a tuwaaxun wa a yi ;
a wa riini an tuga.
[Allanbati moxo]
5 « Axa ga na ɲi Alla batta,
xa maxa a batu xoyi munaafaxinun gaa a sigintanbatta allanxarankaanun do killinxannun ŋa moxo be kuudo seron na i wari.
Tonŋu,
n na a ko axa da ti :
i da i gollen muson kita.*
6 Xa anke,
an ga na ɲi Alla batta,
an na ro an konpo fallanken noxon ŋa,
an na fonlaqen texe,
an na a batu.
An Faaba Alla ke be gaa gundon ŋa,
a tuwaaxun wa a yi ;
a wa riini an tuga.
7 Axa ga na ɲi Alla ɲaagana,
xa maxa toxo sefene xoyi munubattaanon moxo,
baawo ikun na a sinmana sefe gaben ya n jaabini.
8 Ken kuŋa,
xa maxa i yaaxa,
baawo axa Faaba wa axa hanmirafin tu axa ɲaaganden kaane.
9 Axa gaa a batta moxo be,
a faayi,
axa na ti :
“ O Faaba kallanke,
an toxon nan seno seren su maxa.
10 An tunkaaxun nan ri,
an sago nan ɲaŋi ɲiiɲen kanma xoyi a gaa ɲaana kanmun ŋa moxo ke be yi.
11 O lenki biraadon kini o yi.
12 Yanpa o tanbu burun ŋa,
xoyi oku yinme gaa yanpana o tooɲondaanon tanbu burun ŋa moxo ke be yi.
13 O kisi jaarabiyen ŋa,
an na o kisi Ibiliisa xa yi.
{Baawo,
abadan tunkaaxun do senben do nooron ni an ya fo yi.
Anmiina.}¤ ”
14 « Ken ya ni,
axa ga na yanpa seron maxa i junuubunun ŋa,
axa Faaba kallanken xa na yanpa axa maxa.
15 Xa,
axa ga ma yanpa seron maxa,
axa Faaba kallanken xa nta yanpana axa junuubunun ŋa de.
[Suumen moxo]
16 « Axa ga na suumi,
axa maxa axa diinan misondi xoyi munaafaxinun moxo,
kuudo seron na a tu ti axa suuminton ya ni.
Tonŋu,
n na a ko axa da :
i da i gollen muson kita,
na a sababun ɲa i ga da i suumen tuyindi seron ŋa.
17 Xa,
anken na an yinmen do an yeeson daari ti timiliŋen ŋa.
18 Ke moxo yi,
sere nta an suumen tuunu ma a ga nta ɲa an Faaba ke be gaa gundon ŋa,
a tuwaaxun wa a yi ;
a wa riini an tuga.
[Naaburen xibaare, duna noxon do Alla banŋe]
19 « Axa maxa duna ke naabure kafu me yi du da taqe yi,
baawo fayaanon ga ma konpen kara na a wutu su,
xaasun ya na a yigana ma a na xaaxi xa.
20 Xa,
axa da naaburen kafu me yi du da taqe Alla banŋe,
noqu ke be fayaana do xaase ga nta a kitta,
sakkati a na xaaxi,
21 baawo an naaburen gaa noqu be yi,
an sondomen xa na non ya yi.
[Faten lanpa]
22 « Faten lanpan ni yaaxen¤ ya yi.
Sere su yaaxen siren ga ni,
an faten danman su na xurayen ya yi.
23 Xa,
an yaaxen ga ma ɲa,
an faten danman su na biten ya yi.
Lanpa be gaa anken ŋa,
ken yinme gaa biten ŋa,
xenpa nta ken bite yi de !
[Alla do naabure]
24 « Sere su ra nta kamanu filli batta :
an na baane ya xonno na baanen xanu,
ma ken ga fe,
an na baanen daro,
na baanen roxo.
Axa ra nta Alla do naaburen batta doome.
[O hanminun jaareye]
25 « Ken saabu da,
n wa a koono axa da ti :
xa maxa hanmi axa bireyen ŋa,
xa gaa fo be yigana,
a do axa gaa fo be minni.
Xa maxa hanmi do axa faton ŋa,
axa gaa fo be rondini.
Yaala bireyen ya n nta xoto biraadon ŋa ba ?
Faten nta xoto feetufataadon ŋa ba ?
26 Xa da kanmu ke yeliŋun faayi ke :
i nta tifini ;
i nta fatene ;
i nta sagarene roono maro yi.
Xa axa Faaba kallanken na i birandini ya xa de !
Xoyi axa ya nta fasu yeliŋu ku yi ba ?
27 Ko na axa yi,
hanmi saabu da,
an ra gaa hari subure kapa an wuyin ŋa ?
28 « Manne xa saabu da,
axa gaa hanmini do feetufataado yi ?
Xa da gunnen sokkun faayi,
i gaa funtini nan fuugu moxo be :
i nta gollini sakkati i na miri.
29 N na a ko axa da nan ti :
hari Tunka Sulemaanu do i kame bannaaxu,*
a ma demu yiran faranpare rondini,
a gaa sokku ku baananbe fuugen faranparoyen bakka.
30 Gunnen sokkun be ga ni ku yi lenki,
Alla ga da i feetufata,
xunbane i sediini yinben ya yi.
A nta axakun ya feetufatana diinanta sokku ku yi ba ?
Axa danqanaaxun roxen ni de !
31 Ken kuŋa,
xa maxa hanmi nan ti :
“ O na manne yigana,
ma o na manne minni,
ma o feetufetene kan moxo ? ”
32 Semunton ya n hanmini ku fiinu muurunden ŋa waxati su.
Xa,
axa Faaba kallanken wa a tu axakun haajun gaa fo be yi !
33 Xa da Allantunkaaxun do teleŋontaaxun ya muuru fina ;
a na kutten su kafu axa maxa.
34 Ken kuŋa,
xa maxa hanmi do xunbane yi,
baawo xunbane xibaaren ni xunbane ya xibaare yi.
Koota su likken da ken koota baga.