[Muruxunten tereye]
9
Ken falle,
Isa Alimasiiwu ro fuuren ŋa na xaaren kutu,
nan daga i kaara.¤
2 A ga kiɲe non ŋa,
ma i do muruxunte yogo riyinten faayi katta a yi sanbaxan ŋa.
Isa ga da sero ku danqanaaxun wari,
a ti muruxunte ke da :
« Ba,
maxa jikkirankuti ;
an junuubunun xafari. »
3 Ken ga ɲa,
sariyanxaranmoxonu yogonu ti i du da :
« Ke da du raga Alla yi koyi ! »*
4 Isa ga da ken mugu,
a ti :
« Manne saabu da ku sinmayi buru gaa axa sondomun ŋa ?
5 Nan ti muruxunten da :
“ An junuubunun xafari ” ma nan ti a da :
“ Giri,
an nan tere ” kan nan newu ?
6 Ayiwa ken kuŋa,
axa wa a tuunu nan ti inke be ga ni Seren Renmen ŋa,
ɲaamariyen wa in maxa ɲiiɲen kanma na junuubunun xafari.
» A ti muruxunte ke da :
« Giri,
an na an sanbaxan wutu ;
an nan daga an kan ŋa. »
7 Yugo ke giri nan daga i kan ŋa.
8 Jaman ga da ken wari,
i kanu moxoburu.
I da Alla tiiga,
a be ga da ke me seye ɲa haadamarenmen da.
[Mace xirinde]
9 Isa danginte sagallitugeran ŋa,
a da sagalliragaana yogo taaxunten wari,
a toxon ga ni Mace.
Isa ti a da :
« Sukke do in ŋa.
» Mace giri nan sukke do a yi.
10 Ken falle,
Isa daga Mace kan ŋa.
Na i toxo yigene,
sagalliragaanon do junuubuɲaŋaana gabu xa ri taaxu kapa Isa do i xaranlenmon ŋa yigeyokken kanma.
11 Farisigankon ga da ken wari,
i ti a xaranlenmon da :
« He,
axakun xaranmoxo do sagalliragaanon do junuubuɲaŋaanon ya n yigene doome ? »
12 Isa da i mugu,
a ti i da :
« Sahante haajun nta jaarandaana yi,
watunton ya haajun na a yi.
13 Xa daga Alla ke digaame wure muuru na a faamu,
a ga ti :
“ N na hinneyen ya mulla ;
n nta sadaxa mulla.
”*
Ken saabu da,
ku beenu gaa du walla xo seri teleŋonto,
n ma ri kun xiri ;
ku beenu gaa du walla xo junuubunto, n ri kun ya xiri. »
[Suumiyen xibaare]
14 Ken falle,
annabi Yahaya xaranlenmon ri katta Isa yi na a tirindi ti :
« Manne saabu da oku do Farisigankon gaa suumini,
an xaranlenmon kun ga nta suumini ? »
15 A ti i da :
« [N na xoyi maaɲuyugon ya yi.]
Yaala maaɲuyugon feddanlenmon ra wa sunoono na i do a toxo doome yi ba ?
Ken ra nta ɲaana !
Xa,
koota wa riini a gaa wutiini bakka i naxan ŋa.
Ken koota ya ni,
i na suumi.
16 « Sere su nta yiran xase betelana ti yiran kurunba yi,
baawo yiran kurunba ke ga na yiran xasen fuutu,
booxeyen wa tallan xoorono.
17 Sere nta reesenjin xa roono sumalli xase yi,
baawo reesenji ke ga na buuku,
sumallen wa kareene.
Ken ŋa,
reesendolon bono,
sumallen xa na bono.
Ganta,
reesenjin roono sumalli kurunban ya yi,
ken ya na i filli su kisiini bonne yi. »
[Yaxaren jaareyen do yaxannan furen wundiye]
18 Na Isa toxo sefen ŋa,
deben xirise yogo ri ma a gaa tusiini a jon ŋa nan ti :
« N ren yaxaren ya faayi ga bono saasa,
a ga kara do i fi su,
ri an sooxen saxu a kanma,
a nan giri. »
19 Isa do i xaranlenmon giri nan sukke do yugon ŋa.
20 I daganto,
yaxare yogo,
foranjoqen gaa a yi gelli siino tanmi do fillo,
a xa ri sigi do Isa falle,
nan kati a doroken kanpen ŋa.
21 A ti i noxoodu :
« N ga na hari kati a doroken ken ŋa,
n na saha. »
22 Isa ga da i kaaran faayi,
a xosi a wari,
a ti a da :
« N ma,
maxa jikkirankuti ;
an danqanaaxun da an sahandi.
» Ken sigira su,
yaxaren saha.
23 Isa ga kiɲe xirise ke kan ŋa,
a yaaxen gaa fulutimaanon+ \fr 9.23 \fq fulutimaanon\ft :
A waxatin ŋa,
kalle tuwiini ti fulutinmen ya yi.
do jaman sunonten ŋa xaarunu,
24 a ti :
« Xa giri,
axa nan daga !
A ma kara ;
a xenqene ya.
» A ga da ke ko,
i soyi a yi.
25 I ga da jaman bagandi sellan ŋa,
a ro katta yaxanne ke yi.
A da a raga ti i kitten ŋa,
a xosi giri.
26 Xibaare ke sanqi do ken jamaane muuman su yi.
[Finkinto filli yaaxon wuɲiye]
27 Isa ga giri no,
a dagante,
finkinto filli sukke do a yi,
i gaa xaarunu nan ti a da :
« Tunka Daawuda renme,
hinne o yi ! »
28 Isa ga ro kan ŋa,
i ri katta a yi,
a ti i da :
« Axa saxunten wa a yi nan ti in ra wa axa yaaxo ku wuɲini ya ba ?
» I ti :
« Kamanyugo,
an ra wa a yi ke ! »
29 A kati i yaaxon ŋa nan ti :
« Axa danqanaaxun saabu da,
axa ga ti in na ke be ɲa axa da,
ken nan ɲa axa da. »
30 A ga da ken ko tan,
i yaaxon wuɲi.
Ken falle a da a ko na a xotondi i maxa nan ti :
« Anhan,
sere n maxa a mugu axa yi de ! »
31 Xa i ma katu a muɲini :
i ga bogu kan ŋa tan,
i da a laxami jamaanen su da.
[Muumunten sefende]
32 Finkinto ku filli bogunto,
sero tana do yugo yogo ri katta Isa yi,
jinnan ga da a muumundi.
33 A da jinnan xata bakka a yi.
Ken sigira su,
yugo ke sefe.
Ken da jaman kaawafi,
i ti :
« Ke me ma demu ɲaana Banisirayila yi abada. »
34 Xa,
Farisigankon kun wa tini :
« He,
a na jinnanun xatana ti Ibiliisa ya toxon ŋa sa,
aken be ga ni jinnanxirisen ŋa ! »*
[Jaman hinneye]
35 Fo wo fo su ga ni debi tugunne do debi xoore yi,
Isa daga a su yi.
A xaranŋundindi allanxarankaanun noxon ŋa nan waajundi Allantunkaaxun Xibaari Liŋen kanma,
na watten danben su jaara.
36 Isa ga da a wari nan ti jaman jikkirankuti,
nan tanpi xoyi jaxo be nagaana ga nta i ya,
ken hinneyen da a raga.*
37 A ti i xaranlenmon da kuŋa :
« Sanjaanen xooro,
sanjanlenmon xa nan roxa.
38 Ken kuŋa,
xa da sanjangumen ɲaaga a na sanjanlenmon gabondi sanjaanen ŋa. »