Ɲangollu 27

[Pawulu xayinde telle Roomu yi]

I ga kande nan ti i wa o rondini fuuren noxon ŋa katta Yitaali jamaanen ŋa koota be, i da Pawulu xa do kasoranko yogonu kini sorodaasinyinmanke yogo yi a toxon ga ni Yuuli a gaa Kesaari kurunkitten ŋa. 2 Daramiteena fuure be ga n xawa dagana Haasi jamaanen ŋa, o ro ken ya yi nan daga. Lisitarooxo wa kafiini o yi. Aken ni Maxidoonanken ya yi nan bogu Tesaloniixe maran ŋa. 3 Ken bitafilla, o kiɲe yi. Pawulu ɲi tigitindimoxo sire yi Yuuli maxa. Ken saabu da, a duŋe Pawulu nan daga bogu i tuwanlenmon ŋa debinnoxon ŋa ma a wa fo kitana i ya. 4 Ken falle, o daga. O bogu ti Kiporo dunden falle ya yi na a sababun ɲa fanken ŋa. 5 Ken falle, o da Kiliiki bologaanen do Panfiili bologaanen kutu nan kiɲe Miira yi, Liiki jamaanen ŋa. 6 Sorodaasinyinmanke ke da Lekandooronkanfuure yogo kita non ŋa, a gaa dagana Yitaali yi. A do o ro ken noxon ŋa.

7 Fanken saabu da, o fuuren kori jawoono. O da bita gabu ɲa. O gaa kiɲene Niidi bologaanen ŋa a xoto moxosiri. Xa fanken saabu da, o maxa katu dagana ti ken kille yi. O da Kireeti dunden ro o do fanken naxan ŋa kuŋa nan bogu ti Salimoona kinxennan ŋa. 8 O ma laato bakka doŋan ŋa. O da o duruxoto nan kiɲe noqu yogo yi Laase deben kaaran ŋa i gaa non xilli « Bologansiru ».

9 Xa, o leele moxoburu. Ken bire ken xa terenden ma ɲa, baawo dangi. Pawulu da i gongo kuŋa nan ti : 10 « N maarenmu, nke sinmaye, saasa terenden na kasaara xoore ya kiɲana o yi de ! Kasaara be ga nta xenpene fuuren do yokken baane yi, xa a wa kiɲene hari oku yinmenu yi. » 11 Xa, sorodaasinyinmanke ke ken saxunten na fuurawurundaana ke do fuuragume ke ya yi diinanta Pawulu yi. 12 A fillandi, ken bologaane ma ɲa mullen ŋa. Ken saabu da, jaman fankan da a koyi nan ti i na a faayi ma i ra wa kiɲene Finiixa yi. Ken Kireetinkan bologaanen wa taŋene banboxun kinxennan do saahelin kinxennan ŋa. I ti i ga na kiɲe no, i na mullen ɲa non ŋa.

[Dundun gille geejin kanma]

13 Banboxun fanka mulle yogo giri. Sero beenu gaa fuuren ŋa i da a sinma nan ti i ŋanniyen siro. I da fuuren geresaaden wutu, nan daga do Kireeti dunden raqen ŋa. 14 Xa wucinne, i gaa dundo ke be xilli ti : « Saahelin kinxennan fanke », a giri ti dunden ŋa, a senben xoore. 15 A da fuuren raga a ra ntaxa wurunu. O ga konto, o da fuuren toxo dundon maxa. 16 I gaa dunde ke be xilli « Kayidi », o da a ro o do fanken naxa. Furanlenmen be gaa xiilini do fuura xooren ŋa, o da o duruxoto na a rondi fuura xoore ke noxon ŋa na a yetu. 17 O ga da a rondi bire be, fuurawurundaanon da fuura xooren nereme ti kacun ŋa. I kanu dundon nan maxa fuuren sedi Libi seyiŋen kanma. Ken saabu da, i da fuuren xoqedunkacen do gurudan yanqandi jin ŋa na a wara fanken maxa kuudo dundon na waase a jawondini. 18 Ken yillakara, i da fuuren kanmudunyokkun yogo sedi geejin ŋa, baawo dundon wa finna o kanma. 19 Bita sikkandi, i da fuuren yinme surumaadun sedi geejin ŋa. 20 O da bita gabu ɲa o ma kiye wari, o ma saane wari. Fanken xa na moxo baane ke ya yi. O da o jikken bogu bireyen ken ŋa lewu.

21 Sere su gaa fuure ke noxon ŋa, a su faama yigeyen ŋa hanmi saabu da. Pawulu giri sigi nan ti jaman da : « N maarenmu, n ga ti axa da o nan toxo Kireeti axa gan n duŋe, ke kasaara ma ɲi o kitta. 22 Xa ken do i fi su, a su na i kiilun taaxundi. Sere su nta kalla ma ganta fuure ke baane gaa ɲaana bonofon ŋa. 23 N gaa gollini Alla ke be da, a ya fo ga ni in ŋa, a maliikan da du koyi in ŋa wuri 24 nan ti in da : “ Pawulu, maxa kanu. Waajibin ya ni an gaa telle sigi Roomu tunkanyugo Kesaari jon ŋa na an moxo koni a da. An do sere su gaa fuure ke noxon ŋa xa mene, Alla da axa su yonkinun kisi do an sababun ŋa ! ” 25 Ken kuŋa, duruxotoye de ! N saxunten wa a yi nan ti Alla ga da a ko moxo be, a na a ɲaana ken moxo ya yi. 26 Xa fuure ke bonno dunde yogo ya kaaran ŋa, o gaa kisiini. »

27 Bito tanmi do naxato, fanken gaa o nexin-nexini Mediteraanigeejin kanma. Bita tanmu do naxatandin kaananan ya ni, fuurawurundaanon ga da a tu nan ti o tinko dunde yogo yi. 28 I ga da i jiixensaaden yanqandi jin ŋa, i da a jinjufoyen ɲi tanjikke do metaranu ɲeri. I ga dangi ken sigira yi, i yilla a yanqandini, i da a jin ɲi tanpille do metaranu segi. 29 I kanu, i da fuuren geresaadun naxati yanqandi jin ŋa do falle, kuudo a nan maxa daga gide takki. I wa Alla ɲaagana yillen nan kare jawoye yi. 30 Fuurawurundaanon gaa do wurufeera yi, i da fuuranlenmen yanqandi jin ŋa na du ɲa xoyi i faayi ke fuuren geresaaden ya yanqandini jin ŋa fuuren kaane yi. 31 Ken noqu Pawulu ti sorodaasinun do i yinmankon da : « Ku sero ga ma toxo fuure ke noxon ŋa, axa du baananbe su nta kisiini. » 32 Kacu be ga ɲi fuuru ku filli naxan ŋa, sorodaasinun da i kutu na a wara telle.

33 Saado yillen gaa kareene, Pawulu da a muuru haadamaaxun su maxa nan ti i nan yige, a ti : « Ke ni o bita tanmun do naxatandin ya yi a su do jooten gaa taaxunu. Sere su ma hanmi do yigeye yi hari saasa. 34 N da a muuru a su maxa, axa nan yige dullen nan maxa axa kari. N na saage a yi axa da nan ti yonki baane nta toqo ji ke yi. » 35 A ga duguta ku sefo konŋen ŋa, a da Alla tiiga na buurun kutu-kutu na yigeyen jopa. 36 Ken bire jaman kutten saako, i xa yige. 37 O kamo filli do tanɲere do sero tunmi ya n ɲi fuure ke noxon ŋa. 38 A su ga yige nan fogu, o da naxafan kutten sedi jin ŋa kuudo fo na bogu fuuren likken ŋa.

[Fuuren yooleye]

39 Yillen gaa kareene fuurawurundaanon ga da dunde ke wari i ma i tuyira kita a yi. Xa i yaaxen wa jin kille yogo yi, i da a xanu nan daga fuure ke sigindi non ŋa. 40 Geresaadu be gaa fuuren sigindini, i da kacun kutu bakka i ya na i wara telle do jin ŋa. I da sunbaaden xa kacun wasa na yiraamen banba fuuren kaane kuudo fanken na i yonto katta dunden ŋa. 41 Xa fuuren sinsi, a ma katu gilli i batten ŋa. Kaane lori seyiŋen noxon ŋa, a ma katu bakka. Banbuusen senben da falle xoso.

42 Sorodaasinun da a xanu na kasorankon kari kuudo sere su n maxa xini a gaa firini. 43 Xa sorodaasinyinmanke ke wa a mulla na Pawulu ken kisi. A da sorodaasinun kaba i ŋanniyen ŋa. Sero beenu ga n katta xinini, a da kun fina ɲaamari ti i nan bonte bakka fuuren ŋa, i nan xini katta dunden ŋa. 44 Seren kutten na taaxu fuure ke yinme dunŋun do a kettun kanma nan sukke do i ya. A su kisi ke moxo ya yi i ga kiɲe dunden ŋa.