Ɲangollu 26

[Pawulu moxotakonŋe Hagiripu da]

Hagiripu ti Pawulu da : « Sefen wa an maxa. » Pawulu kitten wutunte kanmun ŋa, a ti : 2 « Tunka Hagiripu, n sewo na a sababun ɲa in gaa in moxo koono an ya danŋa ti Yehuudiyanun ga da in jalagi fiinu beenu kanma lenki. 3 N sewo baawo an wa Yehuudiyanun laadan su tu. Kutande su gaa o naxan ŋa Allanfin kanma, an wa a su tu. Ken saabu da, n wa a muurunu an maxa, an na in terinka fonne.

4 « Gelli in tugunne, Yehuudiyan su wa inke tu. N ga ɲi in xabiila naxan ŋa moxo be, i wa a tu. N ga ɲi yi moxo be, i wa a xa tu. 5 I wa in tu nan xaso. I ga na duŋe, i ra wa seedene ti a yi nan ti in ɲi ŋa, a be ga n xoto yehuudiyandiinan su yi. 6 Alla ga da laayidu ke be wutu o kisimanu da, nke jikken saxunten na ken ya kanma. I da in xiri kiite do ken ya yi. 7 O xabiilanu ku tanmi do fillon su jikken ya na a yi nan ti Alla laayidu wutunte ke ɲaana ya, ken ya saabu da i gaa a batta wuron do kiye. N xa jikken na ken ya yi, Tunka Hagiripu. N maaren Yehuudiyanun da in xiri kiite yi do ke ya yi de. 8 Axakun Yehuudiyanu, axa katta tini kan moxo Alla ra nta furun wundunu ?

9 « Nke yinme ɲi sinmene yaaxe su kanma ma in ra wa Isa ke toxon bonondini. 10 N da ken golle dabari Yerusalaamu yi. N da Alla seri gabe raga na a ro kason ŋa, baawo da ɲaamariyen kini in ŋa. I ɲi kun kasoranko karini inke yinme liŋun ya kanma. 11 N wa dagana do Yehuudiyanun ŋa, na i tooro kuudo i na Isa diganburu. Tooxen saabu da, n ɲi dagana do i batten ŋa hari debu tananun ŋa na i tooro.

12 « Koota yogo, n daga Damaasi xa yi. Sadaxakiɲandaananyinmankon yinme ya n da ɲaamarindibataaxen kini in ŋa in ga daga. 13 Tunka Hagiripu, kinsigan bire, n gaa do killen ŋa, n da nooro xoore wari gilli kanmun ŋa, a nan xuranta kiyen ŋa, n do sero ku beenu gaa doome, ma nooro ke gaa riini o yoori. 14 O su ɲa xa bura ɲiiɲen ŋa. Fo yogo sefe in da habaraaninxannen ŋa nan ti : “ Sawulu, Sawulu, an na in toorono manne ? An ballen ŋa inke yi, an na an du ya toorono. ” 15 N xa ti a da : “ Kamane, ko ken ni an ŋa de ? ” Kamanen da in jaabi nan ti : “ Nke Isa ya ni. An na inke ya toorono. 16 Xa giri an nan sigi ! Fo be ga sigi in ga sukke do an ŋa na du koyi an ŋa, n faayi a koono an da : n da an sugandi ya, kuudo an na ɲaŋi in da golliɲaŋaana yi. An ga da in wari moxo be xa yi lenki, an na seede ti ken xa yi. N gaa riini fiinu be koyi an ŋa, an na seede ti kun xa yi. 17 N wa an xayini katta an yinme xabiilan do xabiilan tanan ŋa. N wa an kisini i masiibon ŋa. 18 N na an xayini ya kuudo na i yaaxon ya wuɲi, na i bogu sankuntaaxun biten ŋa na i ro nooron ŋa, na i bogu mareyen ŋa na i ro Alla mareyen ŋa. I ga na saxu in ŋa, i junuubunun na xafari. I na taaxura xa kita Alla seri sennun naxan ŋa. ”

19 « Tunka Hagiripu, gelli in na ken nooro wari, n maxa katu a kutana. 20 N xosi joŋa Damaasinkon fina ya waajunu. Ken falle, n da Yerusalaamu waaju nan waajundi do jamaanen su yi. Ken falle, nan daga katta xabiilan tananun ŋa. N ga da i waaju ti fo be yi ken ni ya : i na i jikkunun ya faraaxu, na du rasaaga katta Alla yi, na fisirontaaxun dabari ke be gaa i durasaageyen koyini. 21 Ke ya saabu da Yehuudiyanun ga da in raga Allanbatikaxooren noxon ŋa, i ga ɲi a mulla na in kari. 22 Xa Alla deemanden saabu da, hari ke lenki in wa seedannaaxun kiɲandini a su kafumanten ŋa, seri wuruginten do seri maxayanqante. Fo wo fo ga n xawa nan ɲa, do annabi Muusa da a ko ; nke ntaxa fo kapa ken ŋa. 23 I ti : “  wa riini toore nan kara, a fina ya n wundini bakka furun naxan ŋa, a na kisiyen nooron kiɲandi Yehuudiyan do xabiilan tanan ŋa. ” »

24 Pawulu gaa sefen noxon ŋa kuudo na du xurandi, Fesiite xiribe a yi nan ti : « An tuuri ya ba ? An xara ma an gaa tuurini ! » 25 Pawulu da a jaabi nan ti : « N xirise Fesiite, n ma tuuri. N gaa fo wo fo koono, a su ni tonŋun ya yi, haqilantansefon ya ni. 26 N gaa sefene tunkanyugo ke be da, n saxunten wa a yi nan ti a wa ku fiinu xala, baawo fiinu ku ma ɲaŋi noqu muxunte yi. 27 Tunka Hagiripu, an saxunten wa annabinyinmun ŋa ba ? A xullen wa in da nan ti an saxunten wa i ya. » 28 Hagiripu ti kuŋa : « An faayi in ɲaana Isa xaranlenma yi koyi ! » 29 Pawulu ti : « Ee ! A jawo wo, a leele wo, nke ken wa a muurunu Alla maxa, anke Tunka Hagiripu do fo wo fo gaa in terinkana lenki, axa xa nan ɲa xoyi in gaa moxo ke be yi, na a ɲi surunmu ma ro axa yi xa. »

30 Tunkanyugo ke yinme, maranyinmanke, kafiini Beriniixa, ken do i seron kuttu, i su giri. 31 I bogu nan daga me wari falle, i ti : « Ke yugo ma fo wo fo ɲa, a do kaso ga n xawa, sakkati kalle. » 32 Hagiripu ti Fesiite da : « Yugo ke yinme ga da Tunka Kesaari taqen ro golle ke yi ya ni mene, ken ga n maxa fe, a ra ɲi warene. »