[Pawulu sikke maranyinmanke Fesiite xa jon ŋa]
25
Fesiite taaxen dangi falle ti bito sikki yi,
a da yiileyen jopa Kesaariye katta Yerusalaamu yi.
2 Sadaxakiɲandaananyinmankon do Yehuudiyanun seri xooron da a sagata na i do Pawulu naxan ko a da na a xotondi a maxa nan ti i do a wa me yi.
3 I da a muuru Fesiite maxa nan ti a na Pawulu riiti Yerusalaamu yi.
Jaxa,
i na a mulla na a janbantankari ya saado a gaa kiɲene.
Ken saabu da i da a xotondi a maxa moxosiri.
4 Xa Fesiite ti i da :
« Pawulu na kason ŋa Kesaariye ya yi,
nke yinme daganten ya ni non ŋa.
5 Axa xirisun gaa a mulla,
i nan ri do in batten ŋa !
Selli yugo ke ga da fo ya ɲa,
i na a jalagi non ŋa. »
6 Fesiite ma dangi bito segi walla bito tanmi Yerusalaamu yi,
a saage katta Kesaariye yi.
Ken yillakara,
a taaxu kiitikutitaaxaaden kanma na ɲaamariyen kini ti i na Pawulu riiti.
7 Pawulu ga ri,
Yehuudiyanu be ga giri Yerusalaamu yi,
i da a yoori nan toxo jalagindi xooron koono a xibaaren ŋa.
Xa daliilu su nta i maxa,
ke be gaa a koyini nan ti i da tonŋun ya ko.
8 Pawulu gaa du faasana,
a ti :
« N ma fo bure su ɲa Yehuudiyanun sariyan noxon ŋa,
n ma a ɲa Allanbatikaxooren noxon ŋa,
n ma a ɲa tunkanyugo Kesaari xa yi. »
9 Fesiite gaa a mulla na du sirondi Yehuudiyanun da,
a ti Pawulu da :
« An wa duŋene telle Yerusalaamu yi,
nke yinme na an kiiti non ŋa ba ? »
10 Pawulu da a jaabi nan ti :
« Ee !
N feti ke Tunka Kesaari kiitikutiran ya yi,
n nan xawa kiitiini yere ya yi.
Nke xa ga ma fo ɲa Yehuudiyanun ŋa,
an yinme wa ken tu.
11 Selli golliburiɲaŋaanan ya ga ni in ŋa,
n ga da golle ya ɲa in ga n xawa nan kara,
n nta balla kalla.
Ku sero gaa fo wo fo koono in xibaaren ŋa selli gaaren ya ga ni,
sere su ra nta in roono i kittun ŋa ti i na in kari.
Ken ya ga ni,
n wa a mulla Roomu tunkanyugo Kesaari yinme na in kiiten kutu. »
12 Fesiite do i jaman da me wari.
Ken falle a ti Pawulu da :
« An ma ti an na a mulla Roomu tunkanyugon Kesaari yinme ya na an kiiten kutu ba ?
Ayiwa,
an wa telle katta a yi kuŋa. »
[Pawulu sikke Tunka Heroodi Hagiripu jon ŋa]
13 Bito dangi falle,
Tunka Heroodi Hagiripu fillandin do i gidanyaxare Beriniixa ri Fesiite kuuɲi Kesaariye yi.
14 I ga da bito ɲa non ŋa,
Fesiite da Pawulu xibaaren koni i danŋa,
nan ti :
« Yugo yogo wa yere,
Feliixe ga da a toxo kason ŋa.
15 N ga daga Yerusalaamu yi,
sadaxakiɲandaananyinmankon do Yehuudiyanun xirisun ri a xiri kiite yi.
I da a muuru in maxa nan ti in nan maxa tonŋu kini a yi.
16 Xa inke ti i da,
Roomunko laada feti na sere kiiti kundun ŋa.
A do i jalagindaanon su ya n sikki me kanma,
ɲaamariyen na kini a yi a na i moxo ko.
Ken ga ma ɲa,
fo wo fo su ra nta sikki a gaa jalagini.
17 I ri do in batten ŋa.
N xa ma leeleye ro a yi :
ken yillankaran su n taaxu kiiten ŋa na ɲaamariyen kini ti i do yugo ke nan ri.
18 A jalagindaanon ri sigi do a kaaron ŋa,
xa in ga ɲi jalagindu be sinmana,
a maxa ɲa kun ŋa.
19 I do a na me yi do i diinan xibaaren do isantoxo yogo ya xibaaren ŋa a ga kara.
Pawulu ken ti a biranten ya ni.
20 Nke konto a tuunu in ga n xawa ke be ɲaana.
N da a koyi a yi selli a gaa a mulla nan daga Yerusalaamu yi a na kiiti non ŋa.
21 Xa Pawulu ma duŋe ken ŋa.
A ti ike na a mulla Roomu tunkanyugon yinme ya na i kiiti.
Ken ya n sigi in ga da ɲaamariyen kini ti i na a toxo kason ŋa saado in gaa a walla katta Kesaari yi. »
22 Ken bire,
Hagiripu ti Fesiite da :
« N yinme wa a mulla na yugo ke sefon mugu ti in taron ŋa.
» Fesiite ti a da :
« An wa a sefexannen mukku xunbane su yi. »
23 Ken yillakara,
Hagiripu do Beriniixa do dawula xoore ri meɲiran ŋa,
i do sorodaasinyinmankon do deben seri xooro.
Fesiite ɲaamariyen kanma,
i da Pawulu riiti.
24 Ken falle,
Fesiite da sefen wutu nan ti :
« Tunka Hagiripu,
kafiini jama ke danman su yi,
xa da axa haqutoxo.
Axa yaaxen gaa yugo ke be yi kundu,
Yehuudiyan su ya n ri katta in ŋa ti a xibaaren ŋa.
Gelli Yerusalaamu nan ri a wara yere,
i ti a nan kara ya tan.
25 Nke xooni ma fo wari a yi,
a ga n xawa nan kara ti fo be.
Xa,
xoyi a yinme ga ti i wa a mulla Roomu tunkanyugon yinme ya na i kiiti,
ken ya saabu da in ga da a wara katta a yi.
26 N kori fo kitana in gaa a safana a bataaxen noxon ŋa katta Tunka Kesaari yi.
Ken saabu da,
n da a sigindi axa su jon ŋa,
na a sigindi anken Tunka Hagiripu yinme jon ŋa.
A me wa du,
ke meɲiye falle,
o na katu fo safana a bataaxen noxon ŋa.
27 Ken ga fe,
na kasoranke wara katta sere yi an ma a ragemaanan ko,
nke maxa ken ma faranparo. »