Ɲangollu 24

[Gaaren sitiye Pawulu yi]

Bito karagi dangi falle, , ken ga ni Hannaani yi, a do Yehuudiyanun xirisu yogonu ri Kesaariye yi kafiini yugo yogo yi, a toxon ga ni Teritiilo, aken ni Yehuudiyanun sefekiɲandaanan ya yi. I daga maranyinmanke Feliixe noqu kuudo na Pawulu jalagi. 2 I ga da Pawulu sigindi Feliixe jon ŋa, Teritiilo da Pawulu jalaginden jopa nan ti : « Ee maranyinmanke Feliixe ! O gaa xeeri xoore ke be noxon ŋa lenki, a kite an ya yi. An haqili siren xa da yillayi gabe riiti jamaane ke yi. 3 O gaa ken xeeri be yi biren su yi, a do noqun su yi, o wa an tiigana na an maama ti ken ŋa, maranyinmanke Feliixe. 4 Xa kuudo o nan maxa an leelandi, o wa a muurunu an maxa an na o terinka fonne.

5 « O da a ɲi ke yugo ni masiibonta xoore ya yi. A da fitinan ro duna Yehuudiyan su naxan ŋa. ke killen yinmanke yogo ya ni. 6 A ɲi a mulla na hari o Allanbatikaxoore ke mexendi, ken ya saabu da, o ga da a raga. 7 {O ɲi a mulla na a kiiti, xa sorodaasinxirisen ri a dugutandi o yi senben ŋa. Liisi da a muuru a jalagindaanon su maxa nan ti i nan ri ɲumi an ŋa.} 8 An ra wa a yinme tirindini. O ga da a raga ti ke be yi, a na a ko. An wa a faamunu nan ti o ga da fo wo fo ko, tonŋun ya ni. » 9 Yehuudiyanun da senbe ro yugo ke sefon ŋa nan ti tonŋun ya ni.

[Sefen kiniye Pawulu yi]

10 Maranyinmanke Feliixe da sefen kini Pawulu xa yi. Pawulu ti : « N wa a tu nan ti ku siino su an ya ni o jamaane ke kiitaanan ŋa. Ken saabu da, n saxunten wa an ŋa, n wa a su koono an da. 11 A ma hari dangi bito tanmi do fillo yi, nke ga ri allanbati yi. An ra wa i tirindini. 12 Ken sere su nta kiteene, ken ra gaa tini i da in do sere wari me kutana Allanbatikaxooren noxon ŋa, ma Yehuudiyanun noxon ŋa, walla xa debe yi. N ma sere xa su do sere wara me yi. 13 Ku sero gaa fo wo fo koono inke xibaaren ŋa, i ra nta a sahandini. 14 Ganta, n ra wa a xurandini an da nan ti : i ga ti ke kille be ni gaare yi, n na o kisimanu Alla batta ti ken kille ya yi de. Fo wo fo safanten gaa do kitaabun ŋa, n saxunten wa a su yi. 15 Nke do in jalagindaano ku su jikken ya na a yi nan ti : Alla ya na furun wundunu, fo siren do fo buren su. 16 Ken ya saabu da, nke xa gaa in duruxotono nan ŋanniyisirondi katta Alla do seron ŋa. 17 N da siina gabu ɲa in gaa tuŋan ŋa. Ken falle, n saage riini n deemandifoonun kini in xabiilan ŋa Yerusalaamu yi na Allankuyun xa bagandi. 18 N seno falle ya ni, i ga da in wari Allanbatikaxooren noxon ŋa. Ken waxati, jama ma ɲi do in batten ŋa kundu, manqanŋe xa ma ɲi do in ŋa. 19 Selli golliburiɲaŋaanan ya ga ni in ŋa, Haasi maran Yehuudiyanun be ga da in jalagi Yerusalaamu yi, kun ya n xawa na in xiri katta an ŋa lenki. 20 Walla ku be gaa yere yi saasa, i ga da in xiri katta i ŋa koota be, i ga da jalagindi noqu be kita in ŋa, i na a ko ke ! 21 Kiitikutiran ŋa, n ga giri sigi nan ferenpenti i naxan ŋa, n ma fo tana su ko a ga feti nan ti : n saxunten wa karafallen wundiyen ŋa. Axa na in kiitini ti ken ya yi ba ? »

22 Feliixe wa fi gabe tu Kamanen killen kanma. Ken saabu da, a ti Yehuudiyanun da : « Axa daga fina, sorodaasinxirisen ga na ri, ken ga ni Liisi yi, n na axa kiiten dabari. » 23 Sorodaasinyinmanke be gaa Pawulu tangana a ti a da : « An do a nan daga kasonkan ŋa, an na a wara ti i yinme yi. An nan maxa a seron xa kaba fo ɲaana a da. »

[Pawulu sikke Feliixe do i yaqen jon ŋa]

24 Bito ga kara, Feliixe do i yaqen Durusiila ri, yaqe ke ni Yehuudiyan ya yi. A ti i na Pawulu bagandi a na fo ko i da Isa xibaaren kanma. 25 Xa Pawulu da sefen jopa ti teleŋontaaxun xibaaren ya yi, seren ga n xawa i du koroosini moxo be, ma a raqen gaa kiɲene yi nan ti Alla wa riini duna kiiti. Ken sigira Feliixe kanu, a ti : « A wase ke yi ! N ga na waxati be kita, n na faaren xayi an ŋa xadi. » 26 Feliixe jikken ya n ɲi a yi nan ti Pawulu na xaalisin ya kinni i ya. Ken ya saabu da, bire su a gaa a xilli i do a nan masala. 27 Siino filli falle, i da sere tana ro Feliixe batten ŋa, a toxon ga ni Pooriki Fesiite. A daga na Pawulu toxo kason ŋa kuudo Yehuudiyanun na i toxosiren ya ko.