Ɲangollu 23

Pawulu da i yaaxon tonto Yehuudiyanun ŋa nan ti i da : « N maarenmu, nke da in bireyen su dabari ti ŋanniyi siren ya yi Alla da ma lenki gaa riini. » 2 Xa, Hannaani, ken ga ni ŋa, a ti ku be gaa Pawulu kaaran ŋa, i na a fentellen kara. 3 Pawulu ti kuŋa : « Alla ya ni anken fentellen karana, ke munaafaxi ke ! ya n da anken taaxundi yere, an ti i na inke fentellen kara an ma hari in kiiti. » 4 Ku be gaa a kaaran ŋa ti a da : « An na Alla sadaxakiɲandaananyinmanken ya kaana kundu ! » 5 Pawulu ti : « N maarenmu, n ma a tu nan ti sadaxakiɲandaananyinmanken ya ni. Ken ga fe, a safanten wa Tawureeta noxon ŋa nan ti :

“ An nta xawa an xabiilan yinmanken kaana. ” »

6 Pawulu ga da a tu ti Kiitikutaanon sapa ke yogo ni ya yi, a yogo ni ŋa, a ferenpenti nan ti : « Ee in maarenmu ! Nke ! N faaba ni Farisiganken ya yi, n yinme xa ni Farisiganken ya yi. Oku Farisiganko jikken gaa karafalle ke wundiyen be yi de, i da in raga do ken ya yi. » 7 Pawulu ga da ke ko tan, manqanŋen sigi Farisigankon do Saduukagankon naxan ŋa, jaman taxandi. 8 Saduukagankon kun ti kallen falle wundiyen wo, maliika wo, jinna wo, a su gaare. Farisigankon kun xa saxunten ya na a yi nan ti ke su ni tonŋun ya yi. 9 A ɲa manqan xote yi. Farisigankon yogonu giri sigi nan sonqo ti : « O ma lonjuuru su wari ke yugo yi. A ra wa ɲaana jinna ma maliika xa ya ga sefe a danŋa. » 10 Manqanŋen xooro ma sorodaasinxirisen yinme gaa kanna i nan maxa Pawulu kasaara. A ti i sorodaasinun do Pawulu nan daga sorodaasinkan ŋa.

11 Ken wuru filla, Kamanen da du koyi Pawulu yi nan ti a da : « Maxa jikkirankuti ! An ga seede in da yi moxo ke be, an nan seede in da xa yi kundun ŋa. »

[Yehuudiyanun janbaye ti Pawulu yi]

12 Ken yillakara, Yehuudiyanun da janbayen yetu ti Pawulu yi. I takki me da nan ti i nan maxa yige, i n maxa mini ma i ga nda Pawulu kita na a kari. 13 Sero be ga takki ti ke yi, a n fuŋu tannaxate sere yi. 14 I daga katta sadaxakiɲandaananyinmankon do xirisun ŋa nan ti : « O takki me da nan ti o nta yigene, o nta minni o ga ma Pawulu kita na a kari ya ga fe. 15 Axa xa do Kiitikutaanon sapan gaa ke be dabarini ken ni ya na a muuru sorodaasinxirisen maxa ti a do Pawulu nan ri xoyi axa gaa a fiinun ya duuxurana moxosiri. Oku moxosironten ya ni na a kari saado a gaa kiɲene axa yi yere. »

16 Xa Pawulu gidanyaxarinlenmen da janbaye ke mugu. A daga sorodaasinkan ŋa na a ko a da. 17 Pawulu da sorodaasinxirisen battamaxen xiri nan ti a da : « An do in ke gidanyaxarinlenme nan daga katta sorodaasinxirisen ŋa ; sefe wa a raqen ŋa katta a yi. » 18 Sorodaasin do a daga katta xirisen ŋa kuŋa. A ti : « Pawulu ke be gaa kason ŋa, a ya n ti in do ke yugunne nan ri. Sefe wa a raqen ŋa katta an ŋa. » 19 Sorodaasinxirisen da a raga ti i kitten ŋa do a nan senbe nan ti a da : « An ti kan moxo ? » 20 A ti : « An na a tu nan ti Yehuudiyanun gemu ti a yi nan ti i wa riini a muuru an maxa an do Pawulu nan ri Kiitikutaanon sapan jon ŋa xunbane kuudo i na a fiinun duuxura moxosiri. 21 An moxo tu de ! A nan fuŋu tannaxate sere yi, i takki me da nan ti i n maxa yige, i n maxa mini, ma i ga nda Pawulu kita na a kari. I da i moxo su sirondi. I na an baane ya dukku. » 22 Sorodaasinxirisen ti a da : « Fo wo fo ga n xoto, maxa a ko sere wo sere da nan ti an ri in taron boto ti ke janbaye yi de ! » Ken falle, a yanpa a maxa, a daga.

[Pawulu sikke maranyinmanke Feliixe jon ŋa]

23 A da i battamaxo filli xiri kuŋa nan ti i da : « Xa da kamo filli sorodaasi do tanɲere siigume moxo sirondi, kafiini kamo filli bundangume yi. Ɲaaxamon ga na yige, n wa axa xayini yi. 24 Axa na setufoonun moxo sirondi Pawulu da kuudo o do a sire na kiɲe maranyinmanke Feliixe yi. » 25 A da bataaxen safa na a kini i ya, a sefon faayi :

26 « Nke, Koloodi Liisi ya n da ke bataaxe xayi katta in xirise, maranyinmanke Feliixe yi, n wa an kuuɲini. 27 N ga da ke yugo be wara katta an ŋa kundu, Yehuudiyanun ya n da a raga, i ɲi a mulla na a kari ya. N ga da a mugu nan ti Roomu jamaanen renmen ya ni, n do in sorodaasinun da feera kutu na a dugutandi i ya. 28 N da a sigindi Kiitikutaanon sapan jon ŋa kuudo i ga da a jalagi ti fi be yi, n na a tu. 29 N da a faamu nan ti i ya manqanŋe na i do Pawulu naxan ŋa, xa ken ma kiɲe ma a ga n kara, walla na a ro kaso yi. 30 Sere ya n ri in taron boto ti a yi nan ti Yehuudiyanun wa a mulla na a janbantankari. Ke saabu da, n da a wara katta an ŋa na a ko a jalagindaanon da selli i haaju gaa a yi, i nan daga katta an ŋa. »

31 Sorodaasinu ku xirisen ga da i ɲaamari ke be yi, i da a ɲa. I do Pawulu daga Hantiripaati yi do wuron ŋa. 32 Sorodaasinu beenu ga ɲi i taanun ŋa, a yillakara kun saage katta sorodaasinkan ŋa, siigumun do Pawulu daga. 33 I ga joofe Kesaariye yi tan, i da Pawulu ro maranyinmanke Feliixe kitten ŋa, na bataaxe ke kini a yi. 34 Maranyinmanke Feliixe ga da bataaxen xara, a da Pawulu tirindi a gaa bakka mara be yi. Pawulu ti ike bakka Kiliiki maran ya yi. 35 Feliixe ti : « An jalagindaanon ga na ri bire be, n na an tirindi. » Xooren ga da buuru ka xoore be taga nan xaso, a ti i nan daga Pawulu wara non ŋa.