Ɲangollu 22

« N faabanu, n maarenmu axa da in terinka in na du xurandi axa da. » 2 I ga da Pawulu mugu habaraaninxannen koono, a su kuuru toxo-toxo. 3 A ti : « Nke ni Yehuudiyan ya yi. N saare Taarisi ya yi Kiliiki maran ŋa, xa in xooro Yerusalaamu ya yi yere. N xara Gamaleeli ya maxa. A da in xaranŋundi o kisimanu ke yinme ya yi. Allanfin nan xoto in maxa moxosiri, xoyi axa gaa moxo be yi lenki. 4 N da tooran danben su saxu Kamanen da ke killi kurunba battaanon ŋa : n da yogonu kari, yugon do yaxare, na surunmen ro yogonu yi, nan daga i sedi kason ŋa. 5  do Yehuudiyanun xirisun sapa fanan su ra wa seedene ti ken ŋa. Ikun yinmenu du ya n da bataaxen kini inke yi, nan ti in nan daga a kini o maarenmu beenu gaa Damaasi yi. N daga, kuudo isanwaaxinu be gaa non ŋa, n na i raga do i nan ri yi, na i tooro.

6 « N dagante, ma in gaa tinkoono Damaasi yi, kinsigan ŋa, ma in yaaxen ga nta nooro xoore yi gilli kanmun ŋa na in kaaron su xurandi. 7 N xenu ɲiiɲen xa bura ! Fo yogo xa ti in da : “ Sawulu, Sawulu, an na in toorono manne ? ” 8 N ti a da : “ Kamane, ko ke ni an ŋa de ? ” Ken fo yogo da in jaabi nan ti : “ Nke Isa ya ni. An na inke ya toorono. ” 9 Sero beenu gaa do in batten ŋa, i yaaxen wa nooro ke yi de, xa i taron nta sefexanne ke ken ŋa. 10 N ti a da : “ Kamane, n na manne xa ɲa kuŋa ? ” Kamanen ti in da : “ Giri an nan daga Damaasi yi. An ga na kiɲe non ŋa, an ga n xawa fo wo fo dabarini, i wa a koono an da. ” 11 Nooro ke xotoyen saabu da, n yaaxon rage. Ku beenu gaa do in batten ŋa, kun ya n da in raga ti in kitten ŋa, na in geesu katta Damaasi yi.

12 « Yugo yogo wa no, a toxon ya ni Hannaani. A siginten wa Alla da moxosiri ; a wa batta. A toxosiren baane ya ni ken noqu Yehuudiyan su raqen ŋa. 13 Hannaani ri katta in ŋa nan ti : “ N waaxi Sawulu, an yaaxon wuɲi. ” Ken sigira su yi, n da Hannaani wari. 14 A ti in da xadi : “ O kisimanu Alla da an sugandi gelli lenki ga ma ri nan ti an na i sagon tu. A da an sugandi kuudo an yinme na teleŋonten wari ti an yaaxen ŋa, a yinme raqen gaa ke be koono, an na a mugu ti an taron ŋa. 15 Ken maanan ni ya, duna su jon ŋa, an na ɲaŋi a da seeda yi ti an ga da ke be mugu na a wari. 16 An na manne dukku ? Giri an nan wanqi, an junuubunun na xafari ti Isa toxon ŋa. ”

17 « Ken falle, n saage katta Yerusalaamu yi. N gaa allanbatini Allanbatikaxooren ŋa koota yogo, Kamanen da du koyi in ŋa. 18 N yinme ya n da a wari ti in yaaxen ŋa a ga ti in da : “ A soobe bakka Yerusalaamu yi, baawo an gaa seedene in da ti ke be yi, i nta saqa a yi. ” 19 N ti a da : “ Kamane, i yinmenu wa a tu nan ti inke ya n ɲi dagana Yehuudiyanun ŋa, sero beenu saxunton gaa an ŋa, n gaa i ragana na i sedi kason ŋa, n gaa i katta. 20 Sittifana ke be ga ni an seedan ŋa, i gaa a karini koota be, nke yinme ɲi non ŋa. N da a karindaano ku su ɲi xanbaane ya yi baawo inke yinme ya n tigiti i yiraamun ŋa. ” 21 Kamanen ti in da : “ Anken nan daga tan ! N na an xayini noqu laaten ya yi katta xabiilan tanan ŋa. ” »

[Pawulu moxotakonŋe sorodaasinxirisen da]

22 Jaman da Pawulu terinka ma a raqen gaa kiɲene ku sefo yi, i xenu luukeyen ŋa nan ti : « Ke yugo nan kara ya tan, a ma xawa bireene lewu ! » 23 Manqanŋen wa tallan xoorono, i wa i yiraamun sedde kanmun ŋa nan toxo xoben girindini. 24 Sorodaasinxirisen da ɲaamariyen kini ti i do Pawulu nan ri sorodaasinkan ŋa, kuudo i na a katu, jaman gaa direye ke be yi do a batten ŋa ma a ga na a maanan ko. 25 Xa i ga da Pawulu yetu bire be ti i wa a katta, a ti sorodaasinxirisen battamaxen da : « Na Roomu jamaanen renmen katu na a ɲi axa ma a kiiti, ken sariyan wa axa maxa ba ? » 26 Sorodaasinxirisen battamaxen ga da ken mugu, a wurunten daga katta xirisen ŋa nan ti a da : « An ɲi manne gollin danbe dabarini ke yi ? N ti yugo ke ni Roomu jamaanen renmen ya yi ! » 27 Ken sigira, xirise ke ri katta Pawulu yi nan ti a da : « Tonŋun-tonŋu, Roomu jamaanen renmen ya ni an ŋa ba ? » Pawulu ti : « Yabo. » 28 Xirise ke ti a da : « Kuudo inke nan ɲa Roomu jamaanen renme yi, n da xaalisi xooren ya tuga de ! » Pawulu ti : « Ayiwa inke ni Roomu jamaanen saaridon ya yi. » 29 Ku be ga ɲi a mulla na Pawulu katu ti ma a ga sefe, i da a wasa ken batte do ken batte su yi. Sorodaasinxirisen ga da a tu ti i da Roomu saaridon ya yetu ti surunmun ŋa kundu, a kanu.

[Pawulu kiitiye]

30 Sorodaasinxirisen wa a mulla na a tu ke be yinme saabu da Yehuudiyanun ga da Pawulu raga. Ken saabu da, a da surunmun wasa bakka Pawulu yi, na sadaxakiɲandaananyinmankon do su xiri meɲiyen ŋa. A da Pawulu bagandi na a sigindi i jon ŋa.