Ɲangollu 21

[Pawulu dagaye Yerusalaamu yi]

O do Yefeesi xirisun ga duguta me yi bire be, o da fuuren wutu nan xosi daga Kosi yi. Ken bitafilla, o kiɲe Roodi yi ; ken falle, o daga Paatara yi. 2 O da fuure yogo ɲi no, a gaa dagana Finiika yi. O ro ken ya yi nan daga. 3 O gaa fuuren noxon ŋa, o ga tinko Kiporo yi, o bogu ti dunden banboxun ŋa nan daga jamaanen ŋa. O ga kiɲe yi o sigi, baawo fuuren likkun nan xawa yanqana non ŋa. 4 O da isanxaranlenmo yogo ɲi Sooro yi. O da koye ɲa non ŋa. Alla da i ɲonqi. I ti Pawulu da : « Maxa daga yi. » 5 Ken do i fi su, o koyen ga tinme, o sukke do o killen ŋa. Yugon do yaxare, kafiini leminu, a su giri do o yi na o bagandi. O ga bogu deben ŋa, o ri bera xoore yogo yi geejinxannen ŋa. O su tusi nan allanbati doome. 6 Ken falle, o sare me yi. Oku ro fuuren ŋa, o bagandindaanon xa saage katta i kaanun ŋa.

7 O ga giri Sooro yi, o lagari Toleema ya yi, isanwaaxinu beenu gaa non ŋa, nan daga i kuuɲi. O da koota baane ɲaŋi i maxa non ŋa. 8 Ken yillakara, o taŋe yi, o yanqa Filipu ya yi, i gaa a xilli Xibaari Liŋen kiɲandaana. I ga da sero ɲeri be sugandi Yerusalaamu yi kuudo i nan ɲa faarun deemandaano yi, Filipu ni kun du baananbe ya yi. 9 Ren yaxaru naxati ya na a maxa, i gaa allanfaarinsefene, i ma yaxi abada. 10 O da bito ɲa non ŋa. yogo giri maran ŋa, a toxon ya ni Hagaabu. 11 A ga kiɲe o yi, a da Pawulu naxaadusiitaaden wutu na i taanun do i kittun siiti ti a yi nan ti : « Fanka Sennen jaabun faayi : sere be fo ga ni ke naxaadusiitaade yi, Yehuudiyanun riini a kaman siiti kundu ya yi Yerusalaamu yi, na a ro xabiilan tananun kittun ŋa. » 12 O do Kesaarinko ga da ku sefo mugu, o su da Pawulu xanjo nan ti a nan maxa daga Yerusalaamu yi. 13 Xa, Pawulu ti o da : « Axa wuunu manne yi axa gaa in butten roxondini ? Nke, n moxo sironten ya ni koyi ! I ga na in yetu Yerusalaamu yi na in kari, a bure fe. N kara do Kamane Isa toxon ya yi. » 14 O konto a yi ; o da a wara. O ti Kamanen liŋun ga ni ke be, ken nan ɲa.

15 Bito ga kara, o da o moxo sirondi nan daga Yerusalaamu yi. 16 Kesaariye isanxaranlenmo yogo daga o tunsi. I daga o yanqandi Mansoonantoxo yogo ya kan ŋa Kiporonken ya ni, a dalla isanxaranlenmaaxun ŋa, o wuyi ken ya kan ŋa.

[Pawulu kasorankaaxu Kesaariye do Yerusalaamu do Roomu yi]

(21.17-28.31)

[Pawulu do Yaaxuba me wariye]

17 O ga kiɲe Yerusalaamu yi, isanwaaxinun ɲaxalinta xooron da o bisimilla. 18 Ken yillakara, Pawulu daga do o yi kan ŋa. O da xirisun su ɲi me kanma non ŋa. 19 Kuuɲinden dangi falle, Alla ga da a wara fo wo fo su dabarinden ŋa xabiilan tananun debun ŋa, a da a su laxami i da baane-baane. 20 Yinmankon ga da ken mugu, i da Alla tiiga nan ti Pawulu da : « O maarenme, an da a wari, Yehuudiya gabe ya n tuubi mene. I wa batta moxosiri. 21 Seron gaa fo wo fo koono i da an xibaare ke yi, ken ni ya Yehuudiyanun be gaa do xabiilan tanan noxon ŋa, an na i xaranŋundini nan ti i na annabi ke ya wara, i nan maxa i renmun sunnandi, i na yehuudiyan laadan wara. 22 Sikka su nta a yi, i na a mukku nan ti an ri ya, o na manne xa dabari kuŋa ? 23 Saasa, o gaa feera be koono an da, duŋe ken ŋa. Sero naxati wa yere, i ga da tekken wutu, 24 an na kafu i ya an do i su na daga senoyinsadaxan bagandi. A ga na ɲa haqe su, an na a tuga i na i yinmun siyi. Ken ŋa, a su wa saqa a yi nan ti seron gaa ke be koono an xibaaren ŋa, gaaren ya ni. I wa a tuunu nan ti anken yinme wa Tawureeta batta. 25 Xa ku beenu ga feti Yehuudiyanu yi i ga saxu Isa Alimasiiwu yi nan tuubi, o da bataaxen xayi i ya nan ti i da : “ Xa maxa mununsadaxantiyen yiga ; xa maxa fore yiga ; xa maxa jiiba yiga ; xa maxa jeeni. ” »

26 Ken yillakara, Pawulu do sero ku naxati daga. A kafi i ya i su da senoyen laadan dabari. Ken falle, a daga Allanbatikaxooren noxon ŋa, senoyen ga n xawa ɲamene koota be, na a ko. Ken koota ya ni, i gaa sere baane su sadaxan bagandini.

[Pawulu rageye Allanbatikaxooren noxon ŋa]

27 Senoyen biton ɲeri gaa tinmene, Haasi maran Yehuudiyanun da Pawulu koroosi Allanbatikaxooren noxon ŋa na jaman su janba a yi, i na a raga. 28 I luuke nan ti : « He  ! Xa da o deema ya de ! Yugo ke be gaa xaranŋundindini noqun su yi na o jaman bonondi, na bonondi, na ke Allanbatikaxoore xa bonondi, a faayi ke. A da hari Gerekinkon xa rondi ke Allanbatikaxoora senne noxon ŋa na a sobindi. » 29 Yefeesinka yugo ke be toxon ga ni Torofiimu, Yehuudiyanun ga da Pawulu do a wari doome Yerusalaamu yi, i da a sinma nan ti a do a ro Allanbatikaxoore ke noxon ŋa ya. 30 Manqanŋen xooro deben noxon ŋa, haadamaaxun su ri. I da Pawulu raga na a kurunta bakka Allanbatikaxooren noxon ŋa. Ken sigira su yi, i da fonlaqun texe. 31 I do Pawulu kallen feeran wa me yi. Roomu sorodaasinxirisen da a mugu nan ti manqan xoore wa Yerusalaamu yi. 32 Ken sigira su yi, a da i sorodaasinun do i sorodaasinyinmankon xooro, na i yinmen faga jaman gaa noqu be yi. Jaman ga da sorodaasinun do i xirisen riyinten wari, i da Pawulu katunden wara. 33 Sorodaasinxirisen tinko Pawulu yi na a girindi. A da sorodaasinun ɲaamari nan ti i na a yetu ti surunmu filli yi. Ken falle a ti : « Ko ni ke yugo yi ? A da manne ɲa ? » 34 Jaman ken wa luukene tan ; sere do sere nta me faamunu. Sorodaasinxirisen ga konto fo faamunu manqanŋen maxa, a ti sorodaasinun do Pawulu nan daga sorodaasinkan ŋa. 35 Pawulu ga kiɲe segemaaden ŋa, ma sorodaasinun gaa a wuttu ya jaman jaagoyen saabu da. 36 I do luukeyen wa me yi nan ti : « Xa da a kari ! »

[Pawulu moxotakonŋe Yehuudiyanun da]

37 I do Pawulu gaa roono sorodaasinkan ŋa bire be, a ti sorodaasinxirisen da : « N ra wa sefene ba ? » Sorodaasinxirisen ti a da : « An wa gerekinxannen mukku ya ? 38 Misiranke ke be ga da jaman murutindi waxati danginte ke, a do wujunu naxati serikallaana ga daga gunjuran ŋa, anken ya feti ken ŋa ba ? » 39 Pawulu ti : « Nke ni Yehuudiyan ya yi, Taarisi be ga ni Kiliiki debe xooren ŋa, a saaridon ya ni in ŋa. N da an ɲaaga, duŋe in nan sefe jama ke danŋa. » 40 Sorodaasinxirisen duŋe. Pawulu siginte segemaaden kanma, a koore jaman da ti i kitten ŋa. Ken sigira, a su deeje. Pawulu da du toxo i da habaraaninxannen ŋa nan ti :