Ɲangollu 28

[Pawulu kiɲaye Meliite yi]

O kisiyen falle ya ni, o ga da a mugu nan ti dunde ke toxon ni Meliite ya yi. 2 Non seron siro katta o yi moxosiri. I da yinbi xoore kumu o da na o bisimilla a xannen ŋa. Baawo kanmen ya n ri, mullen gabo. 3 Pawulu da suwon sagara na i ro yinbe ke yi. A gaa yinben ɲoqo, ken da a ɲi kooso yogo wa suwan ganmen ŋa. Tewoyen ga kiɲe a yi, a bogu na Pawulu sopi i kitten ŋa. 4 Non seron yaaxen gaa kooson logganten ŋa Pawulu kitten ŋa, i ti : « Ke yugo faayi de, serikallan ya ni. A kisi geejin ŋa, xa Tonŋunten da kiiten kara, a ra ntaxa bireene keeta. » 5 Xa Pawulu ma a tu nan ti fo da i sopi du. A ga da i kitten giji-giji, kooson yere yinben noxon ŋa. 6 I da a sinma nan ti Pawulu kitten yitini ya walla a na xenu nan kara. Xa wucen ga laato, i da a tu nan ti a ma fo wo fo tooro Pawulu yi. I da i sefon yillandi nan ti : « Ke ! Alla yogo ya ni. »

7 Jamangume ke toxon ya ni Popili, o do a kan ma laato. A da o yanqandi i kan ŋa na o bisimilla moxosiri. O da bito sikki ɲa non ŋa. 8 A faaba wa saqa a maxa non ŋa fatantewoyen do togotokken gaa a yi. Pawulu ga daga katta a yi na i kitten saxu a yinmen ŋa na Alla ɲaaga, a selle. 9 Ken falle deben xajinten su ri Pawulu sagata, a su selle. 10 I da o daro moxosiri. O gaa saagene, o haajun gaa fo wo fo yi o terende ke noxon ŋa, i da o deema ti a su yi.

[Pawulu kiɲaye Roomu yi]

11 Xasu sikki falle ya ni, o ga da fuure yogo wutu, ken fuure da mullen ɲa dunde ke ya yi. Lekandooro ya fuure ni. I ga da taagumanse be ro a yi, ken ni munonu filli yogo ya toxon ŋa ti : Kasatooro do Polluxu. 12 O ga kiɲe Sirakuusi yi, o da bito sikki ɲa non ŋa. 13 O ga giri no, o da geejinlaqen raga ma o gaa kiɲene Leegi yi. Ken bitafilla, banboxunfanken giri. Bito filli tan, o kiɲe Pocolo yi. 14 O da isanwaaxinu yogo ɲi non ŋa, kun da a muuru o maxa nan ti o na koye ɲaŋi i maxa. O dagamoxon faayi ke ya yi yi. 15 Gelli o gaa ken debe yi, isanwaaxinu be gaa Roomu yi, i ga da o riyen mugu, yogonu ri gemu o yi ma Hapinsaxa yi. Yogonu ri gemu o yi ma debe yogo yi, i gaa non xilli « Mukkunun Yanqaranun sikki ». Pawulu ga da i wari, a da Alla tiiga, a butten tallan xoto.

16 O ga kiɲe Roomu yi, i da ɲaamariyen kini Pawulu yi a na duran konpe wutu, sorodaasi baane na a tanga.

17 Pawulu riye bita sikkandi, a da faaren wara Yehuudiyanun yinmankon ŋa. I da me ɲi, a ti i da : « N maarenmu, n ma fo wo fo ɲa o xabiilan ŋa. N ma fo xa ɲa, fo be do o laadan ga nta genme. Xa i da in raga yi, na in ro Roomunkon kittun ŋa. 18 Maranyinmanken ga da in fiinun koroosi na a tu nan ti in ma fo ɲa in ga n xawa kalla, i da a xanu na in wara. 19 Xa Yehuudiyanun ma duŋe ti ken ŋa. Nke xa ti ken ya ga ni, tunkanyugo Kesaari yinme ya na in kiiten kuttu keeta. Ken wure feti nan ti na in xabiilan toxindi de. Aayi ken fe lewu ! 20 Ken ya saabu da, n ga da axa xiri kuudo o na sefe doome. A tonŋu, su jikken saxunten gaa ke be yi de, surunmun ro in ŋa do ken ya batten ŋa. » 21 I da a jaabi nan ti : « Yehuudiya su ma bataaxe xayi o yi an xibaaren kanma. O maarenmu beenu ga ri, sere su ma fo bure ko o da nan ti an da a dabari. 22 Xa, o wa a mulla an yinme na an sinmayen ko. Oku kun wa a tu tan, an gaa kille ke be yi, a nta liŋi seren su da. »

23 I do a su gemu ti a yi na koota raga. Ken koota ga kiɲe, Yehuudiyanun da me kafu jama xoore, nan daga Pawulu sagata i kan ŋa. Gelli suxuba ma lelle, Pawulu wa a kanma na ko i da. A da i duruxotoyen su ɲa a gaa sefene ti do kitaabun ya yi Isa Alimasiiwu fin kanma, kuudo i na i ni. 24 Yogonu duŋe a da ; yogonu ma saxu a yi. 25 I toxo ken me waalinde ya yi, ma i gaa fateene bakka me yi. Pawulu da sefe baane ko nan ti : « Alla ga da annabi xayi katta axa kisimanu yi ti sefexanne be yi, jaxa tonŋun ya ni, 26 a ga ti :

“ Daga katta ke xabiila yi an nan ti i da :

Tarun wa axa yi, axa gaa terinkene de, xa axa nta mugini.

Yaaxon wa axa yi, axa gaa faayindini, xa axa nta warini.

27 Baawo ke jama sondomun beexi ya,

i tarun suti, i yaaxon finki,

kuudo i yaaxon nan maxa wari

i tarun nan maxa mugi,

i sondomun nan maxa faami.

Ken ga n maxa fe, i na i du rasaaga,

n na i sahandi. ” »

28 Pawulu saage tini : « Axa nan xawa a tuunu ya nan ti ku beenu ga feti Yehuudiyanu, kisiyen faare xayi katta i ya yi. Ikun riini a faamu ya de ! »

29 {Pawulu ga da ku sefo ko, Yehuudiyanun daganton da me waali moxosiri.} 30 Pawulu ga da konpe be wutu, a da siino filli ɲa a noxon ŋa. Sere su ga na ri katta a yi, a wa an darontanbisimillana. 31 A wa Allantunkaaxun fin koono i da, na i duruxotoyen su dabari na Kamane Isa fin xaranŋundi seron ŋa, sere su ma a kaba.