[Seren su ni allankutaanan ya]
3
Ken kuŋa waca, nan ɲa Yehuudiyan ŋa, a tonon ni manne ? Sunnanden nafan ni manne ? 2 Yabo ke, a nafan gaben ya ni ! Fon fana, Alla diganxannun xaliife Yehuudiyanun ya yi. 3 Manne xa n koniini kuŋa selli yogonu ga ma ɲa duntenŋu yi ? I duntenfuyintaaxu ke wa Alla duntenŋaaxun bonondini ba ? 4 Ken fe wala ! Alla ni tonŋunten ya, seren ya ni gaarante, xoyi a gaa Safandi Sennun ŋa moxo be nan ti : « Anken Alla tonŋuntaaxun nan xawa tuyini an digaamun noxon ŋa ya ; i ga na an kiiti xa, an nan niyindi ya. »*5 Xa selli o teleŋontanbalaaxun ga na Alla teleŋontaaxun koyi, manne n koniini ? O teleŋontanbalaaxun ga na sigi Alla ga na o raga ti i butten yanganxatan ŋa, ken ŋa Alla teleŋontanbalaaxu ya ba ? N sefene ti seranfaamuyen ya yi. 6 Ken fe wala ! Alla teleŋontanbalaaxun ga n ɲi kuŋa, Alla na duna kiitini kan moxo yi xadi ? 7 Xa selli in gaaren ya ga na Alla tonŋuntaaxun bangandi kuudo na a nooron koyi, ken ŋa manne ni in gaa kiitiini xadi xo junuubunte ? 8 Ken ya ga ni kuŋa, manne ni o ga nta fo buren ɲaana na fo siren kita, xo sero yogonu gaa o jalagini moxo be nan ti o da ken ya ko ? Ku sero do i yanganxatan nan xawa ya !
9 Manne xa ni kuŋa ? Oku Yehuudiyanu wo, duran fasanŋuntaaxu wa oku maxa harisa ? Ken nta du ! Baawo o da a ko nan ti seren su, Yehuudiyan do xabiila tana, a su na yangon komaaxun ya yi. 10 A safanten ni ke moxo ya yi nan ti :
« Teleŋonte nta du yi,
hari baane kolooti.
11 Haqilante nta du yi,
haadamarenme su nta Alla muurunu.
12 A su killinware,
nan ɲa battaranseron ŋa doome.
Baane nta i ya ke be gaa fo sire ɲaana,
hari baane kolooti.*
13 Karadigaamun ya na i raqun ŋa ;¤
i wa seron sankundini ti i neenun ŋa.*
Samantooxen wa i soomonfaton wure.* ¤
14 I raqun fakkon ni langanden do digan xaxacen ya.*
15 Serikallen nan newu i maxa ;
16 bonondinden do bonen ya na do i taabattun ŋa ;
17 ayiwa fo be ga ni xeerin killen ŋa, i nta ken tu.*
18 Allankanne nta i yaaxon ŋa. »*
19 Na a ɲi o wa a tu xa nan ti Alla sariyan gaa fo wo fo koono, ku beenu gaa sariyan kandan wure, a na a koono kun ya da, kuudo loojurukonŋen na kuti, kiiten na duna danman su fanqa Alla jon me naxa. 20 Baawo sere su nta baarini Alla jon me naxa* ti sariyan gollen dabarinden ŋa ; sariyan ken na yangon ya tuyindini tannu.
[Tunka Duumanten baarindimoxo]
[Baariye ti liimaanagankaaxun ŋa]
21 Saasa yi kuŋa, Alla da baariyen killen koyi o yi, ken ga feti sariyan killen ŋa de ! Muusa Sariya ke do annabinyinmun seede ti ken ŋa. 22 Alla ken baarinde na danqanaaxuntayenmun ya da, ku beenu su ga liimaanagankaaxun ti Isa Alimasiiwu yi. Baawo fatanpansiye nta seron do me naxa : 23 a su ya n da yangon kita, ayiwa i wa kumeene Alla nooron ŋa. 24 Xa i baari ti Alla fonnansiraaxun ya yi, na a sababun ɲa Isa Alimasiiwu ga da i maxawasa. 25 Sero beenu ga liimaanagankaaxu ti Isa kallen ŋa, Alla da a rakutu a foren nan ɲa xafarigeesimuurisadaxan ŋa kun ya da, Alla lafi i yinme teleŋontaaxun ya koyini ken moxo yi, na a sababun ɲa a ga muɲi junuubunun maxa nan xaso. 26 A na ken moxo ya yi harisa. A da i teleŋontaaxun ya bangandi saasa ke kiye da, ken na a teleŋontaaxun ya koyini, a na seren xa baari, ke be ga liimaanagankaaxu ti Isa yi.
27 Ken kuŋa, yaala kunkuwutte na minne yi xadi ? Ken ken senbe fonkaaran ŋa ! Baariyen kiteene ti kan kille ? Ɲangolle ba ? Aayi ken fe. Danqanaaxun ya ni. 28 Oku kun maxa, seron baariini ti danqanaaxun ya yi, sariyan gollen dabarinde fe. 29 Ken ga fe xa, Alla ɲaana Yehuudiyanun baane ya Alla yi ba ? Xabiila kuttu ku xa Alla fe ya ba ? Yabo ! Xabiila kuttu ku xa Alla ya ni. 30 Baawo Alla baane ya na du yi, aken be gaa Yehuudiyanun baarini ti liimaanagankaaxun ŋa, a ya na xabiila kuttu ku xa baarini ti liimaanagankaaxun ŋa. 31 Ken kuŋa, yaala liimaanagankaaxun na sariyan maxayanqana ya ba ? Ken fe wala ! O du na sariyan talla sabatindini ya !