[Ibirahiima ɲanŋe misaale yi ti danqanaaxun ŋa]
4
O na man koono Annabi Ibirahiima xibaaren ŋa kuŋa, o seri fana ke ti fategankaaxun ŋa ? A katu manne kitta ti du yi ? 2 Ibirahiima gan n baari ti i ɲangollun ya yi, a ra ɲi i kunkun wuttu seron jon ŋa ke, xa Alla jon me naxan fe de ! 3 Safandi sennun da man ko kuŋa ? « Ibirahiima toŋondi ti Tunka Duumanten ŋa, Tunka Duumanten xa da a jaate baarinte yi. »* 4 Sere be nda golle dabari, ken tugaaden nta jaateene xo kuye yi de ! A do a n xawa ya. 5 Xa sere be danqanaaxun ya gaa an maxa, na a ɲi ɲangolle kanma fe, an wa jaateene baarinte yi, na a ɲi an ɲangollun saabu da fe, xa Tunka Duumante ke be gaa allankannanbalin baarini, an danqanaaxu ti ken ya yi. 6 Ke moxo saanan ya ni tunka Daawuda gaa yenmun xeerin suugunu, ku beenu Alla gaa i jaatene baarinto yi, na a ɲi golle kanma fe, nan ti :7 « Ku beenu allankuteyun ga yanpe, i junuubunun xa ga xafari, wulluliŋontaaxun wa i da.
8 Wulluliŋontaaxun wa seren da, sere ke be Tunka Duumanten ga nta junuubun jaatene do a batten ŋa lewu. »*
9 Ke wulluliŋontaaxu koninte kundu na do Yehuudiyanun baane ya yi ba, ma xabiila kuttun¤ xa wa a yi ? O na ti kuŋa : « Ibirahiima toŋondiyen ya n sigi a ga jaate baarinte yi. »* 10 Xa in na an tirindi : Alla da ken ɲa kan waxati ? A sunneyen kaane ma a falle ? Sunneyen falle fe de, a kaane ya ni ! 11 Sunneye ke taagumansen kini a yi xo liimaanagankaaxun daliilu ti a danqanaaxun ya yi. Ken daliilu kini a sunnantanbalin ya yi de ! Ken moxo ya ni, sunnantanbalinu beenu ga liimaanagankaaxu xoyi a moxo, a ga ɲaŋi i su faaba yi, kuudo i na jaate baarinto yi. 12 A ɲa sunnanton xa faaba yi, ku beenu ga sunne Yehuudiyanun jaman ŋa baane fe de, xa i ga sukke do o faaba Ibirahiima taabattun ŋa liimaanagankaaxun killen kanma, saado a gaa sunneene.
13 Ibirahiima baari ti danqanaaxun ya yi, ken ya n sigi laayidun ga wuti a da, walla xa a bonsonŋun da, nan ti i wa duna xeyene, xa sariyan saabu da fe. 14 Selli xeyimantanlenmon gaa xeyene ti sariya ke ya yi, maana ntaxa liimaanagankaaxun ken ŋa, ayiwa nafa ntaxa laayidun ŋa. 15 Baawo annabi Muusa Sariyan ken na butten ya saarana ; noqu be sariya ga nta no, sariyakuteye xa nta no. 16 Laayidu ke xeyimaxantanlenmaaxun xa kiteene ti liimaanagankaaxun ya yi. Ken ni ya kuudo a na ɲa kuye yi, nan sabati Ibirahiima bonsonŋen su da. Ken feti ku beenu baane ga ni sariyadunkoonun ŋa de ; ku beenu xa ga liimaanagankaaxu xoyi o su faaba Ibirahiima moxo, kun xa wa a yi. 17 Safandi Sennun ti : « N da an ɲa xabiila xoora gabe faaba yi. »* A ga danqanaaxu ti ke Alla be yi, ken be gaa furen birandini, na fi sabatindi fi be ga nta du yi, o faaba ya ni Ibirahiima yi aken Alla ya jon me naxa. 18 Jikkirankutiyen biren ya ni Ibirahiima ga jigintaaxu, nan danqanaaxu, a xosi ɲa xabiila xoora gabu faaba yi, xoyi a ga ri daalen ŋa moxo be nan ti : « An bonsonŋun riini gabo kundu ya. »* 19 A danqanaaxun ma lanpu ti kallen ri i ya xasoyen saabu da : a wuyin ɲi katta ma kamen siinen ya yi ; ken da a ɲi Saaratu xa saarenuxunlenmen kara. 20 Ibirahiima ma sikka Alla laayidun ŋa hari fonne ; xa a danqanaaxun tallan senbe ya, na darontaaxun saaga Alla yi. 21 A danqanaaxunta xooren ya ni nan ti ke be laayidun ga wuti, a yaaxen baganden senben wa Alla yi. 22 Ke ya n sigi a ga jaate baarinte yi. 23 A ga safe nan ti : « Tunka Duumanten da a jaate baarinte yi »*, ken nta katta aken baane yi de, 24 a na katta oku xa yi ya ; baariyen wa jaatene oku xa da, na a toxo ti Alla be ga da o Kaman Isa wullu gilli furun naxa, o danqanaaxu ti ken ya yi. 25 O yangoburugumaaxun ya n da a ro kittu yi na a toxindi ; a wundi ya kuudo o na baari.