[Bireyi kurunba ti Isa Alimasiiwu yi]
[Xeerikiteye do Alla yi]
5
O ga baari ti danqanaaxun ŋa ke moxo yi kuŋa, o wa xeeri noxon ŋa do Alla batte, ti o kamanyugo Isa Alimasiiwu yi. 2 O da ken neema kuyen kita ti aken Isa ya yi danqanaaxun kanma, o bireene ken neema ya noxon ŋa. O sewonton ɲaxalinton wa o jikken roono Alla nooron kitayen ŋa. 3 Nan kafi ken ŋa, o wa sewoono ti hari o tooran xa yi, na a tu nan ti tooran xa na muɲun ya saarana. 4 Muɲun na duntenŋaaxun fo tinmanten ya saarana, duntenŋaaxun fo tinmanten na jikken ya saarana. 5 Jikken ken xa nta neenendini, baawo Alla da i xanuyen ya guuji o sondomun noxon ŋa ti Fanka Senne ke be ga kini o yi.6 Na a toxo ti xadi, waxati ke be senbe ga ma ɲi o yi, Sugandiyenmen kara allankannanbalinun da ken waxati rakutunte ya yi. 7 A xoten ya ni sere gaa duŋene kalla seri teleŋonten da ; xa, a me wa du, a wa wakkilene kalla seri siren ken da. 8 Xa Alla ga da i xanuyen bangandi o da moxo be, ken ni ya : Sugandiyenmen ga kara o da, na a toxo o ɲi junuubunto ya yi. 9 Baawono saasa a foren ya ga da o baari, o kisiini Alla yanganxata riyinte ke yi ya ti a sababun ŋa, sikka nta ken ken ŋa. 10 Selli bire be o ga ɲi allanxonnaaxun ŋa, o do Alla naxan ga liŋo ti a renmen kallen ya yi, ken ken ya ga ni, o kisiini ti renme ke bireyen ŋa ya. 11 Ken baane fe, o wa sewoono ti Alla yi xa, na a sababun ɲa o Kaman Isa Alimasiiwu yi, o do Alla naxan ga liŋo ti aken be yi keeta.
[Baaba Haadama do Isa Alimasiiwu]
12 Ken ya ni, seri baane ga ɲa sababu yi na junuubun riiti duna yi, junuubun xa da kallen riiti. Kallen da seren su kita do ken ya yi, baawo a su allankute ya. 13 Junuubun ɲi duna yi ya ma annabi Muusa Sariyan gaa riini bire be. Xa, bire be sariya ga ma ɲi du yi, junuubu xa ma ɲi jaateene do seron ŋa. 14 A xa de, nan giri Baaba Haadama yi katta Muusa, kallen da senben kita seron kanma ya de, hari sero beenu ga ma Haadama kuteyen me dabari. Sere ke be ga n xawa riini, Haadama ni a xawaaran ya. 15 Xa Alla neema kuyinte ke do junuubu ke nta baana de ! Baawo seri baane junuubun ga da kallen joofa jamon ŋa, ken ya ga ni, Alla neeman ken guujini jamon gabun ya kanma ti seri baane sababun ŋa, ken ga ni Isa Alimasiiwu yi. 16 Ken neema nta xo seri baane ke yangon moxon ŋa de, baawo seri baane ke yangon saare ti yanganxatan ya yi. A na a ɲi xa junuubu gabu ɲaŋi falle ya ni neema kuyinte ke ga saare ti baariyen ŋa. 17 Selli kallen ga da senben kita ti seri baane junuubun sababun ya yi, ken ken ya ga ni, sero beenu gaa baariyen do neema guujinten kitta kuye yi, i xa bireene nan toori ti Isa Alimasiiwu baananne ke ya yi de !
18 Keeta ken ken kuŋa, Haadama junuubu baane ke ga da yanganxatan kiɲa seron su yi moxo be de, Isa Alimasiiwu golli siri baane ke xa na baariyen kiɲana seron ŋa ken moxo ya yi, baariye be gaa bireyen kinni. 19 Seri baane ke allankuteyen ga da jamon ɲa yangoburugumu yi moxo ke be de, ken moxo baane saanan ya ni, seri baane allanbatiyen xa gaa jamon baarini. 20 Annabi Muusa Sariya ke ri junuubun ya fuumundi, xa junuubun ga fuumu su, neeman ken ŋaamini ya. 21 Ken kuŋa junuubun ga da kandan kita ti kallen ŋa ya ke moxo yi, ken moxo ya ni neeman xa gaa kandan kitta ti baariyen ŋa katta bireyi duumanten ŋa, na a sababun ɲa o Kaman Isa Alimasiiwu yi.