[Kallen do bireye ti Isa Alimasiiwu yi]
6
O na man koono ke su falle yi kuŋa ? Nan ti o n toxo yangoburugumaaxun ŋa kuudo neeman nan tallan ŋaami ba ? 2 Ken fe wala ! O kara nan fate bakka yangon ŋa ya, o yillene bireene yangon noxon ŋa kan moxo yi xadi ? 3 Ma axa ma a tu ya nan ti oku beenu ga tuubiyinwanqi ti Isa Alimasiiwu yi, a na xo o ga kara kafiini a yi ti o tuubiyinwanqiye ke yi ya ? 4 Ken kuŋa, o ga kara kafiini a yi ti tuubiyinwanqiye ke yi, a na xo o do a su buli xaburan ŋa doome yi ya, kuudo aken Sugandiyenme ga wulli bakka furun naxan ŋa ti Baaba Alla nooron ŋa, o xa na bireyi kurunba bira.5 Selli o ga kara do a batten ŋa do a nan ɲa baane yi, o wullini do a batten ŋa ya xa do a nan ɲa baane yi ! 6 Ken tuyi nan ti : i ga ɲi a tontono sallibinsollen kanma yi waxati be, o xa biremoxo fana ke tonte do a batten ŋa ya, kuudo okun fati junuubunto na buruxe, ken moxo yi, o ntaxa ɲaana yangon da komo yi. 7 Sere be ga kara, ken baari bakka yangon kittun ŋa. 8 Xa selli o ga kara do Alimasiiwun ŋa ya, o saxunton wa a yi nan ti o riini bire do a yi ya xa.
9 O wa a tu xa nan ti : Alimasiiwun ga wulli gilli furun naxan ŋa, a ntaxa kalla. Kallen ra ntaxa a niyini. 10 A ga kara, a kara do yangon ya batten ŋa ta tinmanta baane yi a su da. A gaa bireene kuŋa, a bireene Alla ya da. 11 Axakun xa be ga ni, xa da a faamu nan ti axa kara bakka yangon ŋa ya nan bire do Isa Alimasiiwu yi Alla da.
12 Ken kuŋa, anken fate be gaa kalla, a ma xawa marene yango yi, an nan maxa daga yonkiliŋun batu. 13 Xa maxa axa suufunun wara yangoburungolle yi keeta na fi buren dabari. Xa, xa nan ɲa xo biranto be ga giri bakka furun naxa, axa suufunun nan ɲa fi teleŋonten dabarindaano yi. Xa da du kinni Alla gollen ŋa. 14 Ken ŋa, kandan ntaxa yangon maxa yi axa kanma, baawo sariyan kanda ntaxa axa kanma, ganta Alla neeman kandan ya na axa kanma.
[Teleŋontaaxun komaaxu]
15 N na axa tirindi kuŋa : yaala o na yangon dabarini ya ba, nan ti baawo neeman kandan ya na o kanma, sariyan kanda ntaxa o kanma ? Ken fe wala ! 16 Axa ma a tu ga ni nan ti an ga na du wara komongolle yi sere da na a batu, an ɲaŋi a kaman da kome yi ? A na ɲa yangon kanma, ken na an kanda katta kallen ŋa, ma a na ɲa batiyen kanma ken na an kanda katta baariyen ŋa. 17 Tiigeyen wa Alla da, axa ɲi yangon komaaxun ya yi, xa, xaranŋundu ku beenu ga kini axa yi, axa da i batu ti axa sondomun su yi. 18 Alla da axa bogu yangon komaaxun ŋa, axa ɲa teleŋontaaxun da komo yi. 19 Axa haqilun lanpuntaaxun ya n sigi n gaa seransefene axa da ti misaalu ku yi kundu. Axa da axa suufunun komaaxu sobintaaxun do allankuteyen ya da, kun gaa axa kandana roono murutiyen ŋa katta Alla yi. Saasa kuŋa, xa da axa suufunun komaaxu teleŋontaaxun da ken moxo baananne ya yi, ken ya na axa kandana katta senontaaxun ŋa. 20 Bire be axa ga ɲi yangon komaaxun ŋa, axa do teleŋontaaxu ma ɲi me da kille. 21 Axa da kan nafa kita kuŋa ? Yaagun faayi axa yi lenki, baawono kun fiinu saare ti kallen ya yi. 22 Xa saasa ke, yangon komonkacen kuti bakka axa yi, axa ɲa Alla da komo yi ; ken ya n saarene ti senontaaxun ŋa axa da, nan yillekare ti bireyi duumanten ŋa. 23 Baawo yangon muson ni kallen ya. Xa Alla neema kuyinte, ken ni bireyi duumanten ya yi kafiini Isa Alimasiiwu yi, o kama.