[Kuuɲinde]
1
Ke bataaxe wa gilli inke Pawulu do o waaxi Sositeene yi, n xiri nan ɲa Isa Alimasiiwu faare yi na a saxu Alla ramuuriyen kanma. 2 N wa bataaxe ke safana katta Alla batijama be taaxunten gaa Korinti deben ŋa. Alla da jama ke sugandi ti Isa Alimasiiwu toxon ya yi, na i xiri na i senondi, kafiini ku beenu su gaa o kaman Isa Alimasiiwu batta noqun su yi. I kaman ya ni, oku xa kaman ya ni. 3 O faaba Alla do o kaman Isa Alimasiiwu neeman do i xeerin gan na ɲa axa kanma.4 N wa a yi na Alla tiiga axa xibaaren ŋa, na a sababun ɲa Alla ga da neema be ɲa axa da ti Isa Alimasiiwu kapanlenmaaxun ŋa. 5 Baawo a kapanlenmaaxun saabu da, Alla da axa bannaaxundi ti fon su yi, ken ga ni xo sefemoxosiren bannaaxun do tuwaaxun bannaaxun su yi. 6 O ga da Sugandiyenme ke seedaaxun be ko axa da, a mini axa yi. 7 Ken saabu da, axakun be gaa kamane Isa Alimasiiwu bangeyen dukku dugunde su xenpa, axa ma konto Alla neema kuyinte su yi. 8 Alla wa sabatiyen kinni axa yi ma fiinun lagaru, kuudo jalagindira su n maxa kite axa yi o kaman Isa Alimasiiwu riikoota. 9 Alla ke be ga da axa xiri na axa do i renmen kafu, ken ga ni o kaman Isa Alimasiiwu yi, ken Alla ni duntenŋen ya.
[Korinti isanjaman booxeye]
10 Ayiwa, n waaxinu, n wa muurunu axa maxa ti o kaman Isa Alimasiiwu toxon ŋa nan ti : axa n ɲa baane yi, axa n maxa booxe. Axa gemu, axa da axa sinmeyun do axa ŋanniyun ɲa baane yi. 11 Yabo, n waaxinu, n da a mugu Koloowe sero yogonu yi nan ti genmanbalaaxun wa axa naxan ŋa. 12 N gaa a mulla na ke be ko, a faayi : yogo wa tini : « Nke ni Pawulu ya xaranlenma yi ! » Yogo tana na ti : « Nke ni Hapoolu ya xaranlenma yi ! » Ke na ti : « Nke ni Piyeeri¤ ya xaranlenma yi ! » Kiteeren xa na ti : « Nke ni Sugandiyenmen ya xaranlenma yi ! » 13 Yaala Sugandiyenmen taxandi ya ba ? Nke Pawulu ya n genge do sallibinsollen ŋa axa danŋa ba ? Yaala axa tuubiyinwanqi ti inke ya toxon ŋa ba ? 14 Alla n nawaari, nke ga ma sere su wanqi bakka axa yi, a ga ma ɲa Kirisiipu do Gaayi yi. 15 Ken moxo, sere su ra nta a koono nan ti axa wanqi ti inke toxon ya. 16 (Tonŋun ya ni, n da Sittifaana kan xa wanqi, kun ga fe, n kiilun nta yi in ga da sere tana wanqi.) 17 Baawo Sugandiyenmen ma in xayi in na seron wanqi, xa a da in xayi na Xibaari liŋen ya gangu. Sugandiyenmen ma inke xayi ke golle dabarinden ŋa ti haadamarenfontuwaaxu yi, a da ken ɲa ya, kuudo Sugandiyenmen gengende sallibinsollen kanma, ken nan maxa ɲa xafu.
[Alla senben do a fontuwaaxu]
18 Baawo nan waajundi nan ti Isa genge, sankunton maxa, tuurintaaxun ya ni. Xa oku be kisinton ga ni, oku maxa, Xibaari liŋen ni Alla senben ya yi. 19 A wa Safandi Sennun ŋa nan ti :
« N na fontuwaanon fontuwaaxun bonondi,
na tuwaanon tuwaaxun ɲa xafu.* »
20 Ken ŋa, fontuwaana na minne yi keeta ? Sariyanxaranmoxo na minne ? Ma sefanxoore xa na minne keeta ? Alla ma a koyi ya nan ti duna fontuwaaxun ni tuurintaaxun ya yi ba ? 21 Baawo dunarenmun do i fontuwaaxu su, i ma katu Alla tuunu ti Alla fontuwaaxu ke yi. Ken saabu da, i gaa Xibaari Liŋe ke be waajunden faayini tuurintansefe yi, Alla da a rakutu nan ti ku be ga toŋondi, i kisiini ti waajunde ke tuurintansefen ya yi. 22 Baawo Yehuudiyanun wa a mulla na taagumansun wari, Gereesinkon xa wa a mulla na fontuwaaxun wari. 23 Xa oku ku, Sugandiyenmen ga genge sallibinsollen kanma, o waajunden na ken ya kanma. Ken waajunde ɲa Yehuudiyanun kun danŋa finbigiden ya yi, a ɲa xabiilan tanan xa danŋa tuurintansefe yi. 24 Xa Alla ga da ku be xiri, Yehuudiyan do Gereesinkon su, ikun maxa, Sugandiyenme ke ni Alla senben do a fontuwaaxun ya yi. 25 Baawo Alla fiinu be gaa seron maxa nan ti tuurintaaxun ya ni, fontuwaaxun na kun ya yi diinanta haadamarenmun fontuwaaxun ŋa. Alla fiinu be gaa seron maxa nan ti i lanpunton ya ni, kun ya n senbenta haadamarenmun fi senbenton ŋa.
26 N waaxinu, xa sinme do Alla ga da axa xiri bire be, axa ga ɲi moxo be. Axa wa a tuunu nan ti seron maxa, ku beenu ga ni fontuwaanon ŋa, i nan loxa, senbenten nan loxa, seredaren nan loxa. 27 Xa, fiinu be gaa duna maxa xo tuurintaaxu, Alla da kun ya sugandi kuudo fontuwaanon na yaagu. Fiinu be gaa duna maxa xo lanpuntaaxu, Alla da kun ya sugandi kuudo senbenton na yaagu. 28 Ku be ga ni fi maxayanqanton ŋa duna maxa, ku be bexunton ga ni, ku be ga feti fo yi de, Alla da kun ya sugandi na fi sooben bonondi. 29 Ken moxo, sere su ra nta du koono Alla jon ŋa. 30 Aken Alla ya n da axa sabatindi Isa Alimasiiwu yi, aken Isa ɲaŋi oku da Alla fontuwaaxun sababun ŋa, a do teleŋontaaxun do sugandintaaxun do maxawaseye. 31 Ken kuŋa, Safandi Sennun ga da ke be ko, ken ni ya :
« Sere be gaa du koono, a na du ko ti Tunka Duumanten ŋa.* »