[Kuuɲinde]
1
Ke bataaxe wa gilli inke Pawulu yi, Isa Alimasiiwu faare ga ni in ŋa, na a saxu Alla liŋun kanma. Bataaxe ke giri in do in waaxi Timoote ya yi. A wa katta Alla isanjama be gaa Korinti deben ŋa, a do Alla sere su gaa Haaxe maran ŋa. 2 O faaba Alla do o kama Isa Alimasiiwu neeman do i xeerin gan na ɲa axa kanma.[Pawulu buttuxotondiye]
3 Tiigeyen wa Alla da, o kama Isa Alimasiiwu faaba. A ya ni hinneyen faaba, a ya ni Alla ke be gaa kiilutaaxe kinni o yi waxatin su yi. 4 O tooran su, a ya na kiilutaaxe kinni o yi, ken ŋa, toora gaa ku be kanma, o xa na katu i kiilunun taaxundini ti o ga da kiilutaaxe be kitta Alla yi. 5 O ga da toora xoori xoore ke be kita do Sugandiyenmen ŋa de, o na kiilutaaxiyi xoori xooren xa kitta ti a horoman ŋa ken moxo baane ya yi. 6 Selli o gaa toora yi, ken ni do axa na kiilutaaxe do kisiye ya kita. Selli o gaa kiilutaaxe yi, ken ni do axa xa na kiilutaaxe ya kita, kuudo o gaa toora su muɲini, axa xa na katu ken me muɲini. 7 Ayiwa jikke be gaa o maxa axa fin kanma, fo wo fo ra nta ken bonondini. Baawo o na a tu ya nan ti axa ga da taqe kita tooran ŋa moxo be yi de, axa na taqe kitta kiilutaaxen xa yi ken moxo ya yi.
8 N maarenmu, o na a mulla axa na a tu ya nan ti : o da toora gabe kita Haasi maran ŋa. Toora ke xooro, ma a gaa dangini o senben ŋa. A xooro ma o na o jikken bagu bireyen ŋa. 9 Oku yinme maxa, kiiten da o kari ya dubaane. Xa ken ɲaŋi ya kuudo o nan maxa o jikke saxu o yinme kanma. O n xawa o jikken saqa Alla ya kanma, a be gaa furun girindini. 10 Aken Alla ya n da o kisi ken karamoxo bure yi, a wa riini o kisi a me yi xadi. Yabo ke, o jikken wa a yi nan ti ken Alla baane ya n wa riini o kisi a me tana yi xadi. 11 Axa xa yinme da o deema ti allanɲaageyen ŋa. Ken kuŋa, o gaa riini neema be kita, ken wa ɲaana sababu yi sere gabe gaa Alla tiigana ti o xibaaren ŋa.
[Pawulu terendun banteye]
12 O gaa o kunkun wuttu ti ke be yi, o yonkinun ga seede ti a yi, ken ni o ga tere katta seron ŋa, sakkati katta axakun ŋa, ti Alla ga da nuxudunxullaaxu be do sondonlaabantaaxu be kini o yi ya. Xa haadamarenfontuwaaxu feti ken ŋa, Alla yinme ya neema ni. 13 Saasa, o ma fo wo fo safa katta axa yi, a ga ma ɲa axa ga n katta ke be xaranŋa na faamu ya ga fe. N saxunten wa a yi xa nan ti axa wa a faamunu moxo siri, 14 xoyi axa ga da o faamu fonne nan ti axa wa axa kunkun wuttu ti oku yi, o xa na o kunkun wuttu ti axa yi o kaman Isa rikoota. 15 Ken saxiiraaxu ya saabu da ni, n ga da a saata xadi nan ti in riini axa noqu ke ya yi fina, kuudo axa na neeman fillankita. 16 N ɲi a mulla nan bogu ti axa noqu, ken falle in na daga Maxidoona maran ŋa. N ga na giri Maxidoona, n na saage katta axa noqu, kuudo axa na in silifanda katta Yehuuda maran ŋa*. 17 Ayiwa, n ga da dagaye ke be saata, n ma jaatirage ya ba ? Ma haadamarenmun gaa saatandini moxo be, n saatandi kundun ya yi ba ? N da « yabo » do « aayi » ko doome yi ba ? 18 Alla ga ni duntenŋen ŋa moxo be, o ga da sefo be ko axa da, i ma ɲa « yabo » do « aayi » doome. 19 Baawo inke do Siliwaano, kafiini Timoote yi, o ga da Allanlenme ke be xibaaren kiɲandi axa yi, ken ga ni Isa Alimasiiwu yi, aken feti « yabo » do « aayi », aken ni « yabo » ya yi tannu. 20 Alla laayidu wutunten ga gabo moxo su yi, a su ni « yabo » ya yi Sugandiyenmen kapanlenmaaxun ŋa. Ken ya saabu da, o gaa tini « Anmiina » ti a toxon ŋa na darontaaxun saaga Alla yi. 21 Alla ya na senben roono oku do axakun su yi Isa Alimasiiwu kapanlenmaaxun ŋa, na o sugandi. 22 A da i maaran ro o yi, na i Fanka Sennen ro o sondomun ŋa xo daliilu, ken gaa a koyini nan ti taqe tana wa o da kaane.
23 Ke be ga sigi in ga ma saage katta Korinti yi, ken ni in nan maxa axa tallan sunondi ya. Selli in ga da gaaren ya ko, Alla wa in seeda, a gan na in yonkin raga. 24 Fi be gaa taŋene axa danqanaaxun ŋa, oku kanda nta ken kanma, baawo axa danqanaaxun sabatinten ya ni. Xa o na a mulla o do axa n golli doome ya kuudo axa na sewo.