[Kittu kafumeye Yerusalaamu isanjaman da]
16
Ayiwa fo be gaa taŋene fonbagandun ŋa Alla seri sennun da, n ga da Galaca isanjamon ɲaamari ke be yi, axa xa na ken me dabari. 2 Koye su koota fana, fo be senben gaa sere su yi, a na ken senbendi bakka i kitayun ŋa, kuudo fonbagandun nan maxa in riyen dugu. 3 N ga na ri, axa ga da axa saxiiraaxun ro ku sero be kanma, maxankutundibataaxen na kini i ya, i na daga deemandu ku deni Yerusalaamu yi*. 4 Selli in yinme dageyen gaa gemme, n do i su na xosi daga doome.[Terenden saatande]
5 N bakka do Maxidoona maran ya yi, nan daga axa kaara, baawo in bakka ti non ŋa ya. 6 A me ra wa ɲaana in gaa waxati ɲaana axa maxa, ma in na mullen yinme ɲa non ŋa, kuudo axakun na in silifanda katta in dagaran ŋa. 7 Ke kille, n nta a mulla nan li axa faayi baane nan dangi. Xa in jikki, n wa waxati ɲaana axa maxa, Kamanen ga na duŋe. 8 Xa in wa toqo Yefeesi yi yere ma Fateyi fanon sallen ga n'n kiɲe, 9 baawo Alla da raxa xoore wuɲi in da, n ra gaa golle dabarini, jikken gaa a yi, xa, xonnon nan gaba.
10 Timoote ga na ri*, axa na duuruxoto na a kiilun taaxundi kafiini axa du yi, baawo a gollini Kamanen ya da, xoyi in moxo. 11 Ken kuŋa, sere su n maxa a roxo. Xa da a silifanda ya, a nan toxo jamu yi i terende ke noxo, kuudo a sire na joofe in ŋa, baawo in wa a do waaxinun dukku.
12 Fi be gaa taŋene o waaxi Hapoolu yi, n da a muuru a maxa siri ti a do waaxinun nan daga axa noqu, xa a ma duŋe moxo su yi fina. Xa a ga na a moxo kita bire su, a wa dagana.
[Kuuɲinden do ɲaamarindi lagare]
13 Xa koroosindi, xa sabati danqanaaxun ŋa, xa ɲa yugu yi, xa ɲa senbento. 14 Xa da fo wo fo dabari ti xanuyen ŋa.
15 N waaxinu, axa wa a tu nan ti Sittifaana do i kan fina ya n toŋondi Haaxe maran ŋa, i ga da i du su kini Alla seri sennun xidimeyen ŋa. Ken kuŋa, n gaa ke be muurunu axa maxa, ken ni ya : 16 Xa na dumaxayanqa ku sero do i meenu da, kafiini i do sere su gaa gollini doome nan xidime.
17 N sewo ti Sittifaana do Forotunaasi do Haxikiisi riyen ŋa, baawo i da axa sigan sigi in danŋa axa falle. 18 I da inke do axakun su kiilen taaxundi. Axa nan xawa ku sero do i meenu ragana ti axa kittun filli ya yi.
19 Haasi maran isanjamon wa axa kuuɲini. Hakkiila do Pirisiika, kafiini isanjama be gaa i kaanun ŋa, i wa axa kuuɲini ti Kamanen kapanlenmaaxun ŋa, kuuɲinde be xenpa ga nta a yi. 20 Waaxi su gaa yere, i wa axa kuuɲini. Xa da kuuɲinden sanqi axa do me naxan ŋa ti meexandunsunbunden ŋa.
21 Ke kuuɲinde ni inke Pawulu yinme safandikitten ya yi.
22 Sere be ga nta Kamane Isa mulla, Alla gan na ken kaman langa. « Marana ta ! » Kamane, li !