[Isa wundiye]
15
N waaxinu, n wa axa haqilun yanqandini do Xibaari liŋe ke be in ga da a kiɲandi axa yi, axa ga da a raga, axa tokkinton gaa a yi harisa. 2 Axa kisiini ti ken ya yi, selli axa ga na tigiti a yi xo in ga da a ko axa da moxo be. Ken ga fe, axa danqanaaxun ni xafun ya yi.3 Nke yinme ga da be xara a ga n fasu a su yi, n da axa xaranŋundini ken ya yi, ken ga ni : Sugandiyenmen kara o junuubunun ya saabu da, xoyi Safandi Sennun ga da a ko moxo be. 4 A buli, bita sikkanden koota, a wundi, xoyi Safandi Sennun ga da a ko moxo be. 5 A wundiyen falle, a da du koyi Piyeeri yi, ken falle a da du koyi faarun tanmi do fillon xa yi. 6 Ken falle, a da du koyi waaxinun ŋa doome, fo be ga n fuŋu kamo karagi sere yi. Ken fo gabe wa finna bireene harisa, xa i yogonu kara. 7 Ken falle, a da du koyi Yaaxuba yi, ken falle, a da du koyi faarun su yi. 8 A lagari du koyini inke ya yi, nke be gaa xoyi ren tinmantanbali. 9 Na a sababun ɲa, nke ya ni faarun su fo roxen ŋa. Na in xiri « faare, » n do ken yinme nta xawa, baawo inke ya n ɲi Alla jaman toorono. 10 Xa in ga ni ke be yi, Alla da in ɲa ken ŋa ti i kuyi neemanten ya yi, ken neema feti xafu. Nke du ya n golli nan xoto faarun kuttun su yi, xa Alla neema be gaa in ŋa, ken ya n da a ɲa, nke yinme fe. 11 A ga ɲa moxo su yi keeta, a ɲa inke yi wo, a ɲa ikun ŋa wo, o na ke ya gangunu, axa danqanaaxu ti ken ya yi.
[Furun wundiye]
12 Ayiwa, a gaa konini waajunden ŋa nan ti Sugandiyenmen wundi bakka furun naxa, axa yogonu katta a koono kan moxo nan ti furun nta wundiini ? 13 Selli furun ga nta wundiini, Sugandiyenmen xa ma wundi. 14 Ayiwa selli Sugandiyenmen ga ma wundi, ken ŋa, o waajunden ni xafun ya, axa danqanaaxun xa ni xafun ya. 15 Selli tonŋun ya ga ni nan ti furun nta wundiini, ken ŋa, o xa na ɲa seedanjuuro yi Alla danŋa ke, baawo o seede ti gaaren ŋa Alla kanma nan ti a da Sugandiyenmen wundu bakka furun naxa, na a ɲi a ma a dabari. 16 Ken kuŋa, selli furun ga nta wundiini, Sugandiyenmen xa ma wundi. 17 Selli Sugandiyenmen ga ma wundi, axa danqanaaxun ɲa xafu, ayiwa axa finna axa junuubun noxon ya yi. 18 Ken ya ga ni, hari ku be ga kara Sugandiyenmen killen kanma, i xa halaki. 19 Selli o jikken gaa Sugandiyenmen ŋa do ke birantaaxu baane ya batte, o ya ni seren su fo ɲaaninten ŋa.
20 Xa tonŋun ga ni ke be yi, Sugandiyenmen ya fina nan wundi bakka furun naxa, na a koyi nan ti furun kuttun xa wa riini wundi. 21 Baawo seri baane¤ ya ga sigi kallen ga ɲa du yi, seri baane¤ xa ya n sikki wundiyen gaa ɲaana du yi. 22 Seren su gaa kalla do Haadama yi moxo ke be yi de, seren su xa riini bire do Sugandiyenmen ŋa ken moxo ya. 23 Xa sere su do i yontan ya ni. Sugandiyenmen fina ya n wundi bakka furun naxa. Ken falle, ku beenu gaa a killen ŋa, a nda ɲi riini, kun xa na wundi. 24 Ken falle, duna na ri i lagarun ŋa. A ga na kandan su buruxa, na fankan su buruxa, na senben su buruxa, a na tunkaaxun saaga Baaba Alla yi. 25 Baawo waajibin ya ni, Sugandiyenmen nan toxo tooren ŋa ma Alla ga na a xonnon su ro a tanbekkon wure.* 26 Xonno lagare be gaa buruxeene, ken ni kallen ya yi. 27 Baawo a safe Jabuuri noxon ŋa nan ti :
« Alla da fo wo fo su maxayanqa a tanbekkon wure. »
Xa a ga ti : « Fo wo fo su », a xullen ya ni nan ti Alla nta ken noxon ŋa de, aken be ga da fon su maxayanqa a danŋa. 28 Fon su ga na maxayanqe a da bire be, ke be ga da fon su maxayanqa a da, a xa yinme na du maxayanqa ken da. Ken ŋa, Alla na ɲa fon su kanma.
29 Ayiwa, wundiye ga nta no, ku be gaa tuubiyinwanqiini furun batten ŋa, i na manne muurunu ? Selli tonŋun ya ga ni furun ga nta wundiini, manne ni i gaa tuubiyinwanqiini i batten ŋa kuŋa ?
30 Selli furun ga nta wundiini, manne ni o yinmenu gaa du kinni kasaaran ŋa waxatin su ? 31 N waaxinu, n na kallen raqen ya yi koota su, xoyi in gaa in kunkun wuttu ti axa yi o kaman Isa Alimasiiwu kapanlenmaaxun noxo. 32 N gaa Yefeesi deben ŋa, n do seron fanqe, i gaa xo fonyaatu, haadamarenxibaare baane ga na ɲi, ken na manne sirono in ŋa ? Selli furun ga nta wundiini, ken ŋa :
« O n yige, o n mini, baawo xunbane o kalla ya.* »
33 Xa maxa du sankundi de !
« Teranlen buren na jikku siren bonondini ya.¤ »
34 Xa yille axa du maxa ti soobaaxu yi, xa nan fate junuubun ŋa ! Baawo axa yogonu nta Alla tu. Ken ni axa yaagun ya, n na a ko axa da.
35 Yogo ra wa tini : « Furun wundiini kan moxo ? I do kan fate n gilli ? » 36 Ke haqilanloxe ke ! An ga na ke be tifi, a nta bireene wo, na a toxo a ga ma kara ya fina. 37 An gaa ke be tipi, yitte ke faten fe wo, an na funsu duuro ya tipi, ken ra wa ɲaana yille walla fo tana yi. 38 Ken falle ya ni, Alla na faten ro a yi, xo a gaa a mulla moxo be, soxoodi su do i duran fate. 39 Fate su do i funen nta baana : seren do i fate, daaban do i fate, yeliŋen do i fate, ɲexen xa do i fate. 40 Kanmun tagefoonun faton xa do ɲiiɲen tagefoonun fato, baane su do i funen nta baana, i nooron xa nta baana. 41 Kiyen duran nooron ya na a yi, xason xa do i duran nooro. Saanun duran nooron ya na a yi. Xa hari saanu ku, baane su do i funen nooron bagu me wure ya.
42 Furu ku wundiyen xa na ken moxo baane ya yi. Ke be gaa buliini, a na moti, xa ke be gaa wundiini, motintanbalin ya ni. 43 A buli ɲaanin ŋa, a wundi nooron ŋa. A buli senberanloxaaxun ŋa, a wundi senben ŋa. 44 A buli fato do tiyu, a wundi fata ŋalinte yi, haadamarenfaten wa du yi, fankasenninfaten xa wa du yi. 45 Tonŋu ya ni, a safe Tawureeta noxon ŋa nan ti :
« Seri fana, o faaba Haadama, a ɲa tagefo birante yi.* »
Haadama lagare ke¤, aken ɲa yonkin ya, a gaa bireyen kinni.* 46 Fankasenninfate ke ma joŋa. Haadamarenfate ke ya n joŋa, ken falle, fankasenninfaten ri. 47 Seri fana ke, Haadama, a tage bakka ɲiiɲen seyijuran ya yi. Seri fillande ke giri kanxotten ya yi. 48 Ke be ga tage bakka ɲiiɲen seyijuran ŋa, ɲiiɲedunkon do ken ya nan baana. Ke be ga giri kanmun ŋa, kanmudunkon xa do ken ya nan baana. 49 O ga da ɲiiɲedunke ke sawuran wutu moxo be yi de, o na kanmudunke ke xa sawuran wuttu ken moxo ya yi.
50 N waaxinu, n gaa ke be koono axa da, ken ni ya : Tiyen do foren ra nta Allantunkaaxun xeyene. Ke be gaa motto, a xa ra nta motintanbali xeyene.
51 N faayi gundon koono axa da : O su nta kalla, xa o su faraaxiini ya. 52 Ken ɲaana sigira baanen ya yi, yaaxe teqe do a wuɲiye, buutuxan lagare. Baawo buutun ga na timi, furun gilli motintanbalinu ya yi. Oku xa na faraaxi. 53 Baawo ke be gaa motto, ken feetufateene ti motintanbalaaxun ya yi. Ke be gaa kalla, ken feetufateene ti kallinbalaaxun ya yi. 54 Ke be gaa motto, ken ga na feetufate ti motintanbalaaxun ŋa, ke be gaa kalla, a xa ga feetufate ti kallinbalaaxun ŋa, ken bire, annabinyinmun ga da ke be safa, ken na tinme, i ga ti :
« Niyindun da kallen toni yandu,* »
55 « Kalle, an niyindun na minne ? Kalle, an karindibunnun na minne* ? »
56 Kallen karindibunnen ni junuubun ya, junuubun xa senben ni annabi Muusa Sariyan ya. 57 Xa, tiigeyen wa Alla da, aken be gaa niyinden kinni o yi ti o kaman Isa Alimasiiwu yi.
58 Ken kuŋa in maaren liŋu, xa sabati, fo wo fo nan maxa axa dinba, axa nan tallan sigi Kamanen gollen ŋa. Axa yinmenu wa a tu nan ti axa gaa golle su ɲaana ti Kamanen ŋa, ken feti xafu yi.