[Allanxibaarinden do xannu]
14
Ken kuŋa, xa da axa duuruxoto axa na xanuyen ya muuru fina. Xa da Alla Fanka Sennen kuyun xa muuru, sakkati allanxibaarinde. 2 Sere be gaa sefene ti xan tanan ŋa, a nta sefene seron da, a sefene Alla ya da, baawo seron nta a faamunu. A na Alla gundon xa ya koono ti Fanka Sennen senben ŋa. 3 Xa sere be gaa allanxibaarindini, a sefene seron da na i taga ya, na i duuruxotondi, do na i kiilunun taaxundi. 4 Sere be gaa xan tana koŋini, ken na i yinme ya tagana. Xa sere be gaa allanxibaarindini, ken na isanjaman ya tagana. 5 N wa a mulla axa su nan sefe ti xan tanan ŋa. Xa, axa ga na allanxibaarindi, ken ya n fasu a su yi. Allanxibaarindaanan ya n xoora xan konŋaanan ŋa, ma a ga na i xan koŋinton fasari de, kuudo isanjaman na tage.6 N waaxinu, selli in ga na ri katta axa yi, nan sefe axa da ti xanne yi, axa ga nta xanne be mukku, nafa wa in ŋa axa danŋa ba ? Aayi, nafa nta in ŋa, ma in ga na gundo farasa axa danŋa de, walla xa tuwaaxu sefe, ma allanxibaarinde, walla xaranŋunde. 7 Misaale : timindifoonu ku be yonki ga nta i ya, xo fule, walla ganbare, i ga ma timindita xerexerente wutu, kun timindifoonu suugutan tuyiini kan moxo ? 8 Taballen ga na kati, a xannen ga ma laabe, ko na i moxo sirondini telle kuren ŋa ? 9 Axa yinmenu xa na ken moxo ya yi : axa xan koŋinton bitanton ga na ɲi, axa sefon faamiini kan moxo ? Axa sefene do fanken ya ! 10 Duna xannen nan gaba, xa baane nta i ya, wure ga nta a ya. 11 Xa xanne ke be gaa koniini, a ga nta faamiini, ken konŋaanan na inke maxa wande ya yi, n xa na a maxa wande ya yi. 12 Axakun xa be ga ni, axa na ken moxo ya yi : xoyi Fanka Sennen kuyun tun gaa axa yi, ke be gaa isanjaman tagana, xa toxo ken ya muurunu Alla yi.
13 Ken kuŋa, sere be gaa sefene ti xan tanan ŋa, a na Alla ɲaaga i nan katu i fasarini. 14 Baawo in gaa Alla ɲaagana ti xan tanan ŋa, n yonkin ya na Alla ɲaagana, xa in haqilen nta gollini. 15 N na manne ɲa kuŋa ? N na Alla ɲaagana ti in yonkin ya yi, n na a ɲaagana ti in haqilen xa ya yi. N suugunu ti in yonkin ya yi, n suugunu ti in haqilen xa ya yi. 16 Ken ga fe, an ga na Alla tiiga ti an yonkin ya yi tannu, sere be gaa terinkene jaman ŋa, a katta tini : « Anmiina » ti an allantiigeyen ŋa kan moxo ? Baawo an gaa ke be koono, a nta a tu. 17 An ken allantiigeye ken siren ya ni ke, xa a ma sere kuttun taga. 18 N wa Alla tiigana, baawo in wa sefene ti xan tanan ŋa nan xoto axa su yi. 19 Xa, n ga na ɲi isanjaman noxo, n na digaamu karagi ko i gaa faamini, kuudo na seron xaranŋundi, ken ya n liŋi in da diinanta in na wujuunu tanmi digaame ko ti xan tanan ŋa.
20 N waaxinu, xa maxa sinme xo leminan lamaanun gaa sinmene moxo be. Xa fi be gaa taŋene buroyen killen ŋa, xa ɲa xo leminan lamaanu yi ken ŋa, xa, xa sinme xo sere xooron moxo. 21 Annabi Yesayaahu ga da fo be safa Kitaabi Sennun ŋa, a faayi :
« Tunka Duumanten daali :
“ N wa sefene ke jama da ti sero yi, ku be gaa xan tana koono,
n wa sefene i da ti wandi raxanfaton ŋa,
xa hari ken ŋa, i nta in terinkana.* ” »
22 Nan sefe ti xan tana yi, Alla taagumansen ya ni toŋondintanbalinun da, xa toŋondinton danŋa fe. Xa allanxibaarinde, ken ni taagumanse yi toŋondinton ya da, xa toŋondintanbalinun danŋa fe. 23 Ayiwa misaale : isanjaman su ga na me ɲi, a su ga sefe ti xan tananun ŋa, sere kundu, walla toŋondintanbalinu ku be ga na ri, xoyi i nta axa ragana tuurinton ya yi ba ? 24 Xa, axa su ga na allanxibaarindi, toŋondintanbali, walla sere kundun ga na ri, a wa danqanaaxunu ti i junuubuntaaxun ŋa, ti a ga da ke be su mugu axa yi, kun na a kiiti xa. 25 Gundarafiinu be gaa a sondomen ŋa, i na bange. Ken ŋa, a na sujudi na Alla batu, a xan xooren na a ko nan ti : « Tonŋun-tonŋu, Alla wa kafiini axa yi. »
[Batiyen ɲanmoxo sire]
26 N waaxinu, manne nan xawa ɲaana kuŋa ? Axa ga na me ɲi ti allanbatten ŋa, axa dubaananbe ra wa xasiida koono, baane ra wa xaranŋundindini, yogo tana ra wa fo koono Alla ga da a tuyindi a yi, yogo tana ra wa sefene ti xan tanan ŋa, yogo ra wa ken fasari. Xa ken su n xawa ɲaana kuudo na Alla jaman ya taga de. 27 Selli sero gaa sefene xan tanan ŋa, i nan maxa dangi sero filli ma sikko, ke ga na a wara, ke na a wutu. Xa a nan ɲi sero gaa non ŋa, i ra ga kun xannu fasarini. 28 Selli fasarindaana ga ma kite, sefaana ke nan kuuru, a na gunda i yinme baane do Alla naxan ŋa. 29 Sero beenu ga na ɲi allanxibaarindini, a nan ɲa sero filli ma sikko, kuttun na jaatirage i sefon kanma. 30 Xa ken noxon ŋa, Alla ga na sere tana be taaxunten xibaari, sefaana fana ke nan kuuru ken da. 31 Axa su ra wa allanxibaarindini baane ti baane, kuudo seron su na xara, na duuruxotoyen kita. 32 Ku be gaa allanxibaarindini, i kandan wa allanxibaarinden kanma. 33 Baawo Alla feti ɲaxamiye kaman ŋa xa xeerin kaman ya ni, xoyi seri sennun isanjamon su gaa moxo be.
34 Yaxarun nan xawa kuurunu isanjaman ŋa ya. A ma daga yaxarun gaa sefene, i dumaxayanqanton nan toxo, xo annabi Muusa Sariyan ga da a ko moxo be. 35 I ga na ɲi a mulla na fi be tu, i na i kiinanu tirindi kaanun noxon ŋa. Yaxarun nan sefe isanjaman ŋa, ken ni yaagun ya yi.
36 Yaala Alla daalen giri axakun ya yi ba ? Ma a kini axakun baane ya yi ? 37 Sere be ga na a sinma nan ti ike ni allanxibaarindaanan ya yi, walla nan ti Fanka Sennen wa ike yi, a na a tu nan ti in da Kamanen ɲaamarindixannen ya safa katta axa yi. 38 Sere be ga ma ken tu, Alla xa nta a kaman tuunu.