[Xanuye]
13
Ayiwa, a ga n ɲi in gaa sere ke su xannen koono, na maliikannun xanne ko, xanuye ga nta in maxa, n na xo gulanŋe ya tan a gaa katiini, ma mexe kundu a gaa manqanŋa. 2 Hari allanxibaarinden ya ga n ɲi in raqen ŋa, n gaa gundonun do fontuwaaxun su tu, danqanaaxun gaa in maxa in ra gaa gidun girindini i batten ŋa, xa xanuye ga nta in maxa, n feti fo yi. 3 Hari in ga na in kiteyun su taxandi dullunton ŋa, nan buru in yonkin ŋa do Alla xibaaren ŋa dukoyiye saabu da, xanuye ga nta in maxa, nafa su nta ken ŋa.4 Xanuyen ya toxon ni muɲiye, a ya ni siroye, a nta suuxunu, a nta du koono, dundare fe. 5 Xanuyen nta yaaguntafi dabarini, besenxonne fe, a nta buttu, xuutu nta a yi. 6 Xanuyen gaa sere be yi, a nta sewoono ti teleŋontanbalaaxu yi, a sewoono ti tonŋun ya yi. 7 Xanuyen gaa sere be yi, a wa fon su muɲini, a saxunten wa fon su yi, a wa fo wo fo su jikki, fo wo fo wa toŋono a yi.
8 Xanuyen nta ɲameene abada, xa allanxibaarindu ku ba ? I ɲamene ya. Xannun ba ? I xa ɲamene ya. Tuwaaxun ba ? A ɲamene ya. 9 Baawo, o tuwaaxun kontonten ya ni, o allanxibaarinden xa kontonten ya ni. 10 Xa tinmeyen ga na ri koota be, kontoyen sankunu ya a koota. 11 N ga ɲi leminaaxun ŋa, n ɲi sefene xo lemine ya, n ɲi sinmene xo lemine ya, n ɲi jaatiragene xo lemine ya. Xa in ga xooro, fo wo fo ga ni leminanfi, n laato bakka a yi. 12 Saasa, a na xo o gaa fon su faayini dunŋaren ya yi, a laabante ga fe. Xa tinmeyen koota, o na fon su walla yaaxe ti yaaxen ya. Lenki, xenpan wa in tuwaaxun ŋa. Xa ken koota, n na fon su tu, xo Alla gaa in tu moxo be.
13 Fiinu sikki ya na du yi keeta, kun ga ni : danqanaaxu, jikke, a do xanuye. Xa xanuyen ya n xoora ke su yi.