[Alla Fanka Sennen kuyu]
12
Ayiwa, n waaxinu, fi be gaa taŋene Alla Fanka Sennen fiinun ŋa, n nta a mulla na a toxo axa da sankon ŋa. 2 Axa wa a tu nan ti axa gaa kaafiraaxun ŋa bire be, axa ɲi sukkene do munonun ya batten ŋa xo finkinto, fo beenu ra nta hari sefene. 3 Ayiwa in wa a tuyindini axa yi nan ti Fanka Sennen gaa sere wo sere yi, ken ra nta a koono i raqen ŋa nan ti : « Isa langanten ya ni. » Sere xa su ra nta a koono i raqen ŋa nan ti : « Isa ni Kamanen ya yi, » a ga ma ɲa ti Fanka Sennen deemanden ya yi.4 Neeman kuyen danben su wa du yi, xa Fanka Senni baananne ke ya ni. 5 Xidimemoxon danben su wa du yi, xa Kaman baananne ke ya ni. 6 Gollimoxon danben su wa du yi, xa Alla baananne ke ya ni, aken be gaa ke su walla ta yi. 7 Fanka Sennen banganten na sere su yi a su xeerin ya da. 8 Alla ya na fontuwaaxun sefen kinni yogo yi ti Fanka Sennen ŋa, a na tuwaaxun sefen kini yogo tana yi ti ken Fanka Senni baananne yi. 9 A na danqanaaxu xooren kini yogo yi ti ken Fanka Senni baananne yi, a na jaaranden seyen kini yogo tana yi ti ken Fanka Senni baananne yi. 10 A na kaawafiinun dabarinden seyen kini yogo yi, na allanxibaarinden seyen kini yogo yi. A na seyen kini yogo yi, ken ra gaa Alla Ruuhun do ruuhu tana bakka me yi. A na xan danbun ro yogo raqen ŋa, na xanfasarinden seyen kini yogo tana yi. 11 Xa Fanka Senni baananne ke ya na ke su walla ta yi, na be su taqen kini an ŋa xo a gaa gemme a yi moxo be.
[Fata baane, suufu gabu]
12 O ga na faten misaalen faayi, baane ya ni, xa suufu gabe ya na a yi. Suufun do i gaboye su ni fata baane ke ya yi. Sugandiyenmen xa na ken moxo ya yi. 13 O su wanqi Fanka Senni baananne ke ya yi, kuudo nan ɲa fata baane yi. An ga ɲa Yehuudiya ma an ga ɲa Gereesinke yi, ma kome, walla hoore, o su mini ken Fanka Senni baananne ya yi.
14 Ayiwa faten feti suufu baane, suufun gaben ya na a yi. 15 Saasa, tan ga na ti : « Nke feti faten yogo yi, baawo kitte feti in ŋa, » xoyi ken ra wa a fatana ɲaana faten yogo yi ba ? 16 Walla taron ga na ti : « Nke feti faten yogo yi, baawo yaaxe feti in ŋa, » xoyi ken ra wa a fatana ɲaana faten yogo yi ba ? 17 Faten su gan ɲi yaaxe ya yi, a na fo mukku kan moxo ? Ma a su gan ɲi taro yi, a na timen ragana kan moxo ? 18 Xa Alla da suufunun baananbe su ro faten ŋa moxo be ga n liŋi a danŋa ya. 19 A su gan ɲi suufu baane ya yi tan, faten ɲaana minne yi ? 20 Aayi ! Suufun gaben ya ni, xa fata baane ya ni. 21 Yaaxen ra nta tini kitten da : « N haajun nta an ŋa. » Yinkollan xa ra nta tini tannun da : « N haajun nta axa yi. » 22 Xa suufunu ku be gaa faten ŋa xo i lanpunton ya ga ni de, xiiman wa i ya. 23 Xa ku suufunu be fin ga n roxa o maxa de, kun ya darontansuturinton ni diinanta kuttun ŋa. Hayibeyen gaa suufunu ku be yi, kun ya suturinton ni diinanta kuttun ŋa, 24 na a ɲi ku be ga nta suturini, kun haajun nta ke su yi. Xa suufunu be roxon ga ni faten ŋa, Alla da kun ya daro nan xoto kuttun ŋa, 25 kuudo taxandiye nan maxa ro faten ŋa, xa suufu baane su na hanmi do i kapanlenman ŋa. 26 Toora ga na suufu baane kita, a da a su kita. Suufu baane ga na daroye kita, i su na ɲaxali doome.
27 Ayiwa, axakun ni Sugandiyenmen faten ya, axa dubaananbe su na a suufu yogo ya. 28 Alla ga da Isa yinmotoonun taaxundi do me yi moxo be, a faayi : fana, a da faarun taaxundi ; filla, allanxibaarindaanon taaxu ; sikka, xaranmoxonun taaxu. Ken falle, kaawafi dabaraano, ken do jaaranden kuyen gaa ku be maxa, a do deemandaano, a do jaman kandandaano, a do xan tanan konŋen xa kuyen gaa ku maxa. 29 Yaala seren su ni faaren ya yi ba ? Ma seren su ni allanxibaarindaanan ya yi ? Ma seren su ni xaranmoxon ya yi ? A su ni kaawafi dabaraanan ya yi ba ? 30 Jaaranden kuyen ya na sere ke su maxa ba ? Ma a su ni xan tana konŋaanan ya yi ? A su ni xanfasarindaanan ya yi ba ? 31 Alla kuyi neemanton be ga n xoora, xa da kun muuru. Xa kille be ga n wuruginta a su yi, n wa a koyini axa yi.