11
Ken kuŋa, xa da in seera xoyi in gaa Sugandiyenmen seerana moxo be.[Yugon do yaxare Kamanen jon ŋa]
2 Ayiwa, n wa axa tiigana, na a sababun ɲa axa gaa axa kiilun toqo do in ŋa fon su yi. A do in gaa kille su xaranŋundini axa yi, axa ga da a raga axa kittun filli yi xoyi in ga da a kini axa yi moxo be. 3 Ganta, n wa a mulla axa na fi baane tu, ken ga ni : Sugandiyenmen ya ni yugon su yinmanken ŋa, yugon ya ni yaxaren yinmanken ŋa, Alla ya ni Sugandiyenmen xa yinmanken ŋa. 4 Yugo wo yugo an yinmen xufaarinten ga na Alla ɲaaga ma an ga na allanxibaarindi, an da an yinmanken roxo. 5 Xa, yaxare wo yaxare yinduuron ga na Alla ɲaaga ma an ga na allanxibaarindi, an xa da an yinmanken roxo, baawo ken na xo an yinmen ga siyi ya. 6 Selli yaxare be ga ma xufaare ro i yinmen ŋa, a nta xosini a xece dubaane ! Xa selli xesunden do siyinden yaagun gaa yaxare be yi, xufaaren ro a yi sa. 7 Yugon ma xawa xufaare roono i yinmen ŋa, baawo yugon ni Alla sawuran do a nooron ya yi. Xa yaxare ken ni yugon ya nooro yi. 8 Yugon ma tage bakka yaxaren ŋa, yaxaren ya n tage bakka yugon ŋa. 9 A do xadi, yugon ma tage yaxaren da, xa yaxaren ya n tage yugon da. 10 Ken ya saabu da, yaxaren ga n xawa kandan taagumansen roono i yinmen ŋa maliikannun saabu da. 11 Xa ken do i fi su, Kamanen jon me naxa, yaxare nta fateene bakka yugo yi, yugo xa nta fateene bakka yaxare yi. 12 Baawo yaxaren ga bagu yugon ŋa moxo be, yaxaren xa ya n da yugon bangandi, fon ken su giri Alla ya yi.
13 Axakun yinmenu n kiiti axa du maxa : Yaala yaxaren yinduuron nan allanɲaage, a wa gemme ba ? 14 Yugon na i yinmanyinten giilen toxo, keti axa ma a tu nan ti haadamarenmaaxun taben ŋa, ken ni yaagun ya ? 15 Xa yaxaren ken darontaaxun na a yinten giiloyen ya yi, baawo Alla da yinti giilen kini yaxaren ŋa xo yinxufaare ya. 16 Selli sere be ga na ti i wa kutandini, oku wa tini a kaman da, oku laada fe, Alla batijamon xa laada fe.
[Kamanen Yigande]
17 Ayiwa, n gaa riini ɲaamarindixannu be ko axa da, n ra nta axa tiigana. Baawo axa gaa meeɲiyu beenu ɲaana, i nta fo siroono axa yi, i du na fo ya tallan bonondini axa yi. 18 N da a mugu yinme du nan ti : axa ga na me ɲi, gemme nta axa yogonu do me naxa. N wa a sinmana xa nan ti a yogo ni tonŋun ya yi. 19 Waajibin ya ni ku do i meenu nan ɲa, kuudo duntenŋaaxun gaa ku be maxa, i na tuyi bakka axa noxon ŋa. 20 Axa su kafumanton ga na me ɲi, axa gaa ke be yigana doome, ken ken feti Kamanen Yiganden yi. 21 Baawo axa ga na me ɲi nan yige doome, baane su yinme ya na i yiganden yigana, na a ɲi dullen wa yogo yi, yogo mini nan mande. 22 Kaanu nta axa maxa ya ba, axa ra gaa yigene nan mini non ŋa ? Axa na a mulla na misikiinun ya yaagundi ba, na Alla jaman roxo ? N na manne koono axa da ? Na axa tiiga ba ? Aayi, n nta axa tiigana ke ken ŋa.
23 N ga da ke be kita Kamanen ŋa, n da a xaranŋundi axa yi, ken ni ya : I ga da Kamane Isa ro kittu yi wuro be kuudo na a kari, a da buurun ya wutu, 24 na Alla tiiga, na a kutu-kutu. A ti : « Ke ni in fatantiyen ya yi axa da. Axa na toxo a dabarini na in sinma ti a yi.* » 25 Yigeyen falle, a da jiranxollen wutu ken moxo yi nan ti : « Ke ni in foren ya, sarati kurunban ga tafi ti fore ke be yi. Axa ga na mini ke jiranxolle yi ta su, axa na sinme do in ŋa. » 26 Baawo, axa ga na ke buuru yiga ta su, nan mini jiranxolle yi, axa na Kamanen kallen ya gangunu. Ken ya ni tan, ma a ga n ri.
27 Ken ya ni, sere wo sere ga da ke buuru roxomaxantanyiga, ma an ga na roxomaxantanmini ke jiranxolle yi, an da Kamanen fatantiyen do a foren likken tiŋa. 28 Ken kuŋa, sere su n xawa i du segesekke, saado an gaa ke buuru yigana nan mini ke jiranxolle yi. 29 Baawo sere wo sere gaa ke buuru yigana nan mini ke jiranxolle yi, na a ɲi wure be gaa Kamanen fatantiyen yigeyen ŋa, a nta ken jaaten ragana fo yi, a kaman da du kiiti ti buuru ke yigeyen do ji ke minnen ŋa. 30 Ken ya saabu da, jangiranton do watunton ga n gaba axa noxon ŋa, fo gabe yinme kara. 31 Selli o yinmenu ga na o du kiiti su, o nta kiitini. 32 Xa Kamanen wa o kiitini na o xaranŋundi, kuudo o nan maxa halaki do duna batten ŋa.