[O kisimanu misaale gunjuran ŋa]
10
N waaxinu, o kisimanu ga ɲi gunjuran ŋa moxo be, n nta a mulla na a toxo axa da sankon ŋa. Xaban ya n ɲi xufiini i kanma a gaa killen koyini i ya*, i su da geejin kutu ya*. 2 I su tuubiyinwanqi xaba ke do geeji ke ya wure, i gaa do annabi Muusa batten ŋa. 3 A su da allanyigandi baane ke ya yiga*, 4 a su da allanji baane ke ya mini*, baawo i gaa minni bakka gidindunga ke be yi, allangiden ya ni, a sukkene do i batten ya yi. Gidindunga ke ni Sugandiyenmen ya yi. 5 Ken do i fi su, Alla da i fo gabe faatindi ken gunjura ya yi*, baawo a ma sewo ti i ya.6 Ku fiinu ɲaŋi o da misaalen ya yi na o gongo kuudo yonkiliŋun nan maxa o wutu xoyi yonkiliŋun ga da i wutu moxo be. 7 O n maxa ɲa munubattaano yi xoyi i yogonu ga ɲi moxo be, baawo a safanten ŋa nan ti :
« Jaman taaxu, i yige nan mini, i giri nan fesexi.* »
8 O n maxa jeeni xoyi i yogonu ga jeeni moxo be, Alla ga da tanpille do wujuunu sikki kari bakka i ya koota baane yi.* 9 O nan maxa Sugandiyenmen gaata xoyi i yogonu ga da a gaata moxo be, samaqun ga da i kari*. 10 O nan maxa xuumu-xuumu xoyi i yogonu ga ɲi xuumu-xuumunu moxo be, kallemaliika ga da i buruxa*.
11 Ku fiinu ɲaŋi i yi ya kuudo i na ɲa o da misaalu yi, i safe, oku be ga ni dunanlagaren seron ŋa, i na ɲa o xa da gongonde. 12 Ken kuŋa, a gaa sere maxa nan ti i siginten ya ni, a kaman na du koroosi a n maxa xenu. 13 Axa ga jaarabi ti fo wo fo yi, a me da sere tana kita. Xa Alla ni duntenŋen ya. Jaaraben bire, a nta duŋene fo gaa axa jaarabini na axa dangindi axa xenpan ŋa. Axa ga jaarabi moxo su, ma Alla ga da boguraqe kini axa yi kuudo axa na katu jaaraben muɲini.
14 N maaren liŋu, ku saabu da, xa wuru munubatten ŋa. 15 N sefene axa da xo haqilanton ya ga ni axa yi, axa yinmenu nan jaatirage in sefo ku kanma. 16 Allantiigejiranxolle ke be o gaa Alla tiigana a kanma, xoyi ken ya feti o do Sugandiyenmen foren kapanlenmaaxun ŋa ba ? O gaa buuru ke be kuttu me naxan ŋa, xoyi ken ya feti o do Sugandiyenmen fatantiyen kapanlenmaaxun ŋa ba ? 17 Buuruyin baane ke ya ga ni, o xa do o gaboye su, o su ni fati baane ya yi, baawo o su na buuruyin baane ke ya kuttu me naxan ŋa.
18 Banisirayilankon ga ɲi ke be ɲaana, axa ma a tu ? Sadaxanu be ga ɲi bakka sadaxindinoqun ŋa, i ɲi kun ya yigana doome, ken wa a koyini nan ti i do Alla wa kapanlenmaaxun ŋa, baawo sadaxindinoqu ke na Alla ya da. 19 Ken wure ni manne yi ? Nan ti tiye be ga xurusi munon da, xiima wa a yi ba ? Ma xiima wa muno ke yi ? 20 Aayi, xa na a toxo ti ikun gaa ke be sadaxindini, i na a sadaxindini jinnanun ya da, i nta a sadaxindini Alla da. Nke xa nta a mulla axa do jinna nan ɲa kapanlenmo yi. 21 Axa ra nta minni Kamanen jiranxollen ŋa, nan mini jinnan xa jiranxollen ŋa. Axa ra nta Kamanen yiganden yigana na jinnan xa yiganden yiga. 22 Ma o na a mulla na Kamanen wara suuxen ya yi ? O na a sinmana o ya n senbenta a yi ba ?
[Fon su ɲanŋe Alla darontaaxun da]
23 Yabo ke : « Fon su daganten ya ni », xa fon su sire fe. « Fon su daganten ya ni », xa fon su nta danqanaaxun tagana de. 24 Sere su n maxa i yinme baane nafan muuru, xa da nafan muuru seren tanan xa da. 25 Tiye su gaa gaagene waayindiran ŋa, xa da a su yiga. Axa maxa a girinoqun tirindi, axa haqilun taaxunton nan yige. 26 Baawo,
« Ɲiiɲen do fo wo fo gaa ɲiiɲen ŋa, i na Tunka Duumanten ya da*. »
27 Selli toŋondintanbali ga na axa xiri yigeyen ŋa, axa ga duŋe dagana, a ga na fo wo fo kini axa yi, xa da a yiga. Maxa a tirindi, an haqilitaaxunten na a yiga. 28 Xa selli sere ga na ti axa da : « Mununsadaxan ya ni », xa maxa a yiga, na a sababun ɲa ke be ga da axa tuyindi, ken ŋa haqilun na taaxu. 29 N ma ti axakun haqilun de, n na do ken kaman haqilen ya yi. Sugandiyenmen ga da in kini in yinme yi, manne ni sere tana ga in jalagini ti i haqililan ŋa ? 30 N ga na ɲi yigene in gaa Alla tiigana, manne ni in gaa jalagiini do fo be in gaa Alla tiigana ti a yi ?
31 Axa gaa fo wo fo yigana, ma axa gaa fo wo fo minni, ma axa gaa fo wo fo dabarini, xa da a su dabari ti Alla darontaaxun ŋa. 32 Axa biremoxo nan maxa ɲa sababu yi a gaa sere su sankundini, a Yehuudiyan do a Gereesinken do a allanbatijaman su. 33 Xa ɲa xoyi in moxo, n na in duuruxotoyen su ya dabarini in ra gaa liŋoono a su da moxo be fo wo fo yi. N nta nafa muurunu in baane danŋa de, n na nafan muurunu seren gaben ya da, kuudo i na kisi.