[Pawulu duufaasande]
9
N nta ti in sagon ya yi ba ? Isanfaaren ya feti in ŋa ba ? N ma kamane Isa wari ya ba ? Xoyi in golle Kamanen da ma saare ti axakun toŋondiyen ŋa ? 2 Selli seron kuttun duŋanto ga nta ti in isanfaarannaaxun ŋa, axakun kun duŋanton ya ni a yi. Baawo in gaa in faarannaaxun golle be yi Kamanen da, axakun yinmenu ya ni ken daliilun ŋa.3 N gaa du faasana in jalagindaano jon ŋa ti ke be yi, ken ni ya : 4 Yaala oku ma xawa yigeene nan mini ti o gollen ŋa ya ba ? 5 Na isanwaaxi yaxi, do a nan daga doome in terendun ŋa xo faarun kuttun moxo, Kamane Isa waaxinun do Piyeerinu, oku do ken ma xawa ya ba ? 6 Ma gollen waajibi inke do Barinaabu baane ya kanma na du birandi ? 7 Ko baane nan ɲaana sorodaasaaxun ŋa, a yinme gaa sikki ti i fiinun ŋa ? Ma ko baane na reesente soxono, a ga nta a yittirenmun yigana ? Ma ko baane na naaburu goyimene, a ga nta kun naaburu xattin yigana ?
8 N gaa ke be koono, haadamarenmun baane ya dagamoxo ni ken ŋa ba ? Ma annabi Muusa Sariyan xa ma ken ya ko ? 9 Baawo, a safanten wa annabi Muusa sariyan ŋa nan ti :
« Na be gaa yillikatini, maxa a kaba yillen yigana.* »
Xoyi Alla faasandi naanun danŋa ya ba ? 10 A ma ke safa ti oku du ya yi ba ? Yabo, a da a safa ti oku ya yi, baawo seren gaa soxono, a nan xawa i jikken roono a yi ya nan ti i wa i naxafan kitta. Sere be gaa yillikatini, a xa nan xawa i jikken roono a yi nan ti i wa i taqen kitta. 11 Ayiwa, o da allanfin tifi axa naxan ŋa xoyi soxante. O ga na o biraadon fata bakka axa yi xo soxante, ken nan fuŋu o yi ya ba ? 12 Selli seron tananun do fo ga n xawa axa maxa, oku ya do fo nta xawa nan xoto kun ŋa ba ?
Ken do i fi su, oku ma golli ti ken ŋa. Xa o du da a su muɲi ya, kuudo o nan maxa xota ro Sugandiyenmen Xibaari Liŋe kiɲanden ŋa. 13 Keti axa ma a tu nan ti ku be gaa gollini Allanbatikan noxon ŋa, Allanbatika ke gollen ya na i birandini ga ni, ma nan ti ku be gaa gollini sadaxindinoqun ŋa, i xa na i taqun kitta sadaxindinoqu ke gollen ya yi ? 14 Ken moxo baane ya ni, sero be gaa Xibaari Liŋen kiɲandini, Kamanen ga ɲaamarindi* ti i nan bire ti Xibaari Liŋen kiɲanden ŋa.
15 Xa inke do ke be ga n xawa, n ma ken muuru axa maxa lewu. Ke bataaxe xa safanden wure feti in da in taqen muurunu axa yi. Hari in nan kara ya n fasu ken ŋa ! Sere xa su ra nta inke ken yinmarawutte ɲaana xafu yi. 16 Xibaari Liŋen kiɲanden feti inke maxa buga, a waajibi in kanma ya. Bone wa in da, n ga ma a kiɲandi ! 17 A gan n ɲi inke yinme ya ga da ke golle sugandi, n do tugaaden nan xawa. Xa in sugande fe, Alla ya n da ke siga xaliifa in ŋa. 18 N tugaaden ni manne yi kuŋa ? N tugaaden ni na Xibaari Liŋen gangu xafu ya. Xibaari Liŋen ga da taqe be ɲaŋi in da, n buru a yi.
19 Sere su kome feti in ŋa, xa in da du komaaxu seren su da kuudo in na seren fo gabe kita Sugandiyenmen da. 20 N do Yehuudiyanun ga na ɲi doome, n na ɲa xo Yehuudiya, kuudo in na Yehuudiyanun kita. Ku be gaa sariyan kandan wure, n do i ga na ɲi doome, n na ɲa xo i moxo, na a ɲi in nta sariya kanda wure. N na ken ɲaana ya kuudo in na i kita. 21 Ku be ga nta sariyan kandan wure, n do i ga na ɲi doome, n na ɲa xo i moxo kuudo in na i kita, na a ɲi in nta Alla sariya kandan wure, n na Sugandiyenmen sariyan ya kandan wure. 22 Ku be haqilun lanpunton ga ni, n do i ga na ɲi doome, n na ɲa xo haqili lanpunte, kuudo in na i kita. N da du ɲa fon su yi seren su da, kuudo kitte su kanma, n na yogonu kisi. 23 N na ke su ɲaana ti Xibaari Liŋen ya yi, kuudo in na taqe kita a yi.
[Wuraanon duuxaayande]
24 Keti axa ma a tu nan ti ku be gaa wurunu me firindibaran ŋa, baane ya na waalen wuttu ? Ken kuŋa, xa wuru wurumoxo be axa gaa waalen wuttu. 25 Wuraanan su na i du koroosini moxo ke danben su ya yi, kuudo i nan katu waalen tooren wuttu. Ken toore ken xa riini bono ya, xa oku toore ke nta bonno. 26 Ken ya ni, nke xa gaa wurunu, xa in nta wurunu do xafun ŋa. Nke kutupondini ya, xa in nta kutupe sedde do fanken ŋa. 27 Xa ganta, n wa in du toorono na in faten komaaxu, baawo in wa kanna in be ga da kuttun waaju, nke yinme nan maxa kume.