[Mununtiyun xibaare]
8
Fi be gaa taŋene mununsadaxantiyen ŋa, o su wa a tu nan ti : « Tuwaaxun wa o maxa. » Tuwaaxun riini ti dundaraaxun ya yi, xa xanuyen riini ti jiidiyen ya yi. 2 Sere be gaa a sinmana nan ti i wa fo yogo tu, a ga n xawa fo tuunu moxo be, a ma ken tu fina. 3 Xa sere be ga na Alla xanu, Alla wa a kaman tu.4 Ayiwa, fi be gaa taŋene mununsadaxantiyen yigeyen ŋa, o wa a tu nan ti batifo tana su nta duna noxo ke yi, Alla baane ya ga fe. 5 Tonŋun ya ni ke, fo gabe wa kanmun do ɲiiɲen ŋa, seron gaa i ragana allanu yi, yabo alla gabun do kaman gabun wa seron maxa. 6 Xa oku maxa, Alla ni baane ke ya yi, ken ga ni Baaba yi. Fo wo fo giri a ya yi, o na ti a ya yi. Kaman baane xa ya ni, ken ga ni Isa Alimasiiwu yi. Fo wo fo tage ti a ya yi, o bireene ti a ya yi.
7 Xa, ken tuwaaxun nta isaganken su maxa. Munubatten ga da i batten toxo ku be haqilun ŋa, i wa finna kun tiyu yigana. I maxa, mununsadaxan ya ni, ken ya ni, i haqilun sobi lanpuyen saabu da. 8 Logoma ra nta o tinkondini Alla yi de. O ga ma yige, ken nta fo wo fo bakka o yi. O ga na yige, ken xa nta fo wo fo kapa o yi.
9 Nan ti axa wa ti axa sagon ŋa do i fi su, xa da du koroosi de ! Ken ga fe, ku be haqilun lanpunton ga ni, a ra wa ɲaana sababu yi i ga xenne. 10 Misaale : anken be ga ni tuwaanan ŋa, kun sero ga na an wari yigene munubatiran ŋa, xoyi i haqili lanpunton nta i yontono roono mununsadaxantiyen yigeyen ŋa ba ? 11 Ayiwa Sugandiyenmen ga kara an waaxi lanpunte ke be da, an ke tuwaaxu na xosi ɲa sababu na a halaki. 12 I be ga na ken junuubungolle dabari katti i waaxin ŋa, na tugon ro a haqili lanpunten ŋa, an da junuubungolle dabari katti Sugandiyenmen yinme ya yi. 13 Ken ya saabu da, logoma be gaa in waaxin sankundini, n na a yigeyen toxo no lewu, kuudo in waaxi ke nan maxa sanku.