[Yaxun xibaare]
7
Fi be gaa taŋene axa ga da bataaxe be xayi in ŋa : yugon nan toxo yaxanbali, ken ya siren ni. 2 Xa, kuudo nan kisi jeeniyen ŋa, yugo su nan xawa futtanyaqe kitta ya, yaxare xa su nan xawa futtankiine kitta. 3 Yugon na sunnan do farilan sigindi i yaqen da ya, yaxaren xa ken moxo baane. 4 Yaxaren kanda nta i faten kanma, a kiina ya kanda na a kanma. Ken moxo baane ya ni, yugon xa kanda nta i faten kanma, a yaqen ya kanda na a kanma. 5 Xa maxa bara me danŋa, ganta axa ra wa gemme waxati kanma kuudo nan allanbati. Ken falle, axa na sukke do axa yaxun ŋa, kuudo Ibiliisa nan maxa axa gaata nan ti axa kori du da. 6 N ga da ke be ko, axa ga na katu a yi, a siren ya ni, xa waajibi fe. 7 N liŋun ni, seren su nan ɲa xoyi in moxo ke ya yi. Xa Alla da duran kuye ya kini sere su yi : a da yaxun ɲa yogo da, na yaxanbalaaxun ɲa yogo da.8 N wa tini yaxanbalinun do kiinakariidonun kun nan siri toqo yaxanbalinu ya yi xoyi inke yinme moxo. 9 Xa selli i ra ga nta i du da, i nan yaxi, baawo an ga na yaxi, a n fasu yonkiliŋun ga da an tooro.
10 N wa a ɲaamarini yaxinton da (nke xa fe, Kamanen ya n ti) : Yaxaren ma xawa booxene bakka i kiina yi. 11 A ga na ken dabari, a nan toxo yaxanbali, ma ken ga fe xa, a nan saage katta i kiina yi. Yugon xa ma xawa i yaqen walla*.
12 Fi be gaa taŋene seren kutten ŋa, Kamanen ma fo ko ken ŋa*, xa inke wa tini : Yugo be toŋondi falle, a yaqen ga ma toŋondi, xa a duŋe toqo kiine ke maxa, a n maxa a wara. 13 Yaxare xa be toŋondi falle, a kiina ga ma toŋondi, kiine ke ga duŋe a n toxo i yaxun ŋa, yaxare ke n maxa bagu i kiina maxa. 14 Baawo Alla wa yugu toŋondintanbalin senondini i yaqen saabu da, a wa yaxarin toŋondintanbali xa senondini i kiina saabu da. Ken ga fe, axa renmun sobiini ya, na a ɲi i sennun ya ni saasa. 15 Toŋondintanbalin ga na ti i wa i yaxun bagandini, xa da a wara. Ken moxo, yaxun kacen ntaxa i naxan ŋa. Alla ken da axa xiri katta xeerin ya yi. 16 Yaxare ke, anken wa a tu ma an wa riini an kiinan kisi ba ? Yugo ke, anken wa a tu ma an wa riini an yaqen kisi ba ?
[Alla xirinden falle biremoxo]
17 Ken kuŋa, Alla ga da sere be xiri, a ga da taqe be ɲa an da nan xaso, toxo ti ken ŋa. Baananbe su nan toxo Alla xirinden ga da an ɲi moxo be. N na ke ya xaranŋundini isanjaman su yi. 18 Alla gaa an xilli bire be, an sunnanten ya n ɲi ba ? Maxa ti an wa a saagandini. Alla gaa an xilli bire be, an sunnantanbalin ya n ɲi ba ? Maxa sunne. 19 Sunneyen feti fo wo fo yi, sunnantanbalaaxun xa feti fo wo fo yi. Na Alla ɲaamarindixannun batu, ken ya ni fon ŋa. 20 Alla xirinden ga da baananbe su ɲi moxo be, toxo ken moxo yi. 21 Alla xirinden da an ɲi kome ya yi ba ? Maxa hanmi ti ken ŋa. Xa an ra gaa an du hoorono, an na du hooro. 22 Baawo Kamanen ga da sere be xiri na a ɲi kome, Kamanen hooren ya ni an ŋa. Ken moxo baane ya yi, Kamanen ga da sere be xiri na a ɲi hoore, Sugandiyenmen komen ya ni an ŋa. 23 Alla da axa maxawasa ti jonko xooren ya yi, ken kuŋa xa maxa ɲa sere tana su da kome. 24 N waaxinu, Alla xirinden ga da baananbe su ɲi moxo be, toxo ken moxo yi.
[Yaxanbalinun do kiinakariidonun xibaare]
25 Ayiwa fi be gaa taŋene yaxannun xibaaren ŋa, n ma ɲaamarindixanne kita Kamanen ŋa, xa in ra wa in sinmeyen koono xo sere be ga ni duntenŋe ti Kamanen hinneyen ŋa. 26 N sinmeyen faayi : duna xotoyen saabu da, sere su nan siri toqo i moxon ya yi. 27 Yaqe wa an maxa ba ? Maxa a wara. An ma yaxi ? Maxa yaxi. 28 Xa an ga na yaxi, an ma junuubungolle dabari. Yaxanne xa be ga na yaxi, a xa ma junuubungolle dabari. Xa, toora be gaa do yaxun batten ŋa, nke ɲi a mulla axa nan kisi ken toora ya yi.
29 N waaxinu, n wa a koono axa da nan ti waxatin defo. Ayiwa gelli saasa, yaxaren gaa ku be maxa, i nan ɲa xo yaxare nta i maxa. 30 Ku be gaa wuunu, i nan ɲa xo i nta wuunu. Ku be gaa sewoyen ŋa, i nan ɲa xo i nta sewoye yi. Ku be gaa xobene, i nan ɲa xo fo nta i maxa. 31 Duna nafan gaa ku be da, i nan ɲa xo fo wo fo nta i maxa, baawo lenki ke duna ɲameene ya.
32 N na a mulla axa nan maxa hanmi ya. Yaxare ga nta yugo su maxa, aken hanmin na Kamanen gollun ya yi. A hanmin ni i ra gaa liŋoono Kamanen da moxo be ya yi. 33 Xa yugo be yaxinten ya ga ni, ken hanmi na dunadunkan xibaarun ya yi. A hanmin ni i ra gaa liŋoono i yaqen danŋa moxo be ya yi. 34 Ken kuŋa, a kaman haqilen taxandinten ya ni. Ayiwa yaxare be ma yaxanne be kiine ga nta a maxa, ken hanmin na Kamanen ya yi, kuudo i faten do i yonkin na seno. Xa yaxare be yaxinten ya ga ni, ken hanmin na do dunadunkanxibaarun ya yi. A hanmin ni i ra gaa liŋoono i kiina danŋa moxo be ya yi. 35 Ke be ga n siri ti axa yi, n da ken ya ko axa da, n ma a ko axa da kuudo na axa bese, n na a mulla axa na fo siren ya sugandi, ken do nan sukke do Kamanen ŋa ti axa sondomen su yi.
36 Sere be ga na a sinma nan ti i na fo buren ya wuttu katta i yaxannanxanan ŋa, xanuyen xa kasafo a maxa, fiinun ga ɲa kundun ya yi, a gaa ke be mulla, a na ken dabari. I nan yaxi me yi, junuubu fe. 37 Xa yugo ke ga da a tafu i sondomen ŋa, na a ɲi a ma waajibi a kanma, a ra wa i du danŋa xa, a yinme ya ga wakkile ti ken ŋa, a na darontaaxun toxo yaxannanxana ke kanma, a nan maxa a yaxi, ken ni fo sire ya yi. 38 Ken ŋa, sere be ga na i yaxannanxanan yaxi, an da fo sire dabari. Xa sere be ga ma i yaxannanxanan yaxi, ken ya n fasu.
39 Na yaxaren kiina toxo birene, a kacen ya na yi. Xa kiinen ga na kara, a xannen duuraaxu, a ra wa yaxini yugo be ga n liŋi a da, xa a nan yaxi isaganke ya yi. 40 Xa yaxaren kiina kara falle, a nan toxo yaxanbali, ken ya ni a wulluliŋontaaxun ŋa. Nke ken sinmeyen ŋa de, Alla Fanka Sennen wa in xa yi.