[Isanxaranlenmon meekiitinde]
6
Genmanbalaaxu ga na ro axa do me naxa, axa katta wakkilene ken kiitini allankannanbalinun noqun ŋa kan moxo, axa ga nta kiitini axa maaren sennun noqun ŋa ? 2 Keti axa nta a tu nan ti Alla seron ya na dunadunko kiitini ? Axa ga na dunadunkon kiiti, axa wa kontono xibaari lamaanun kiitini ba ? 3 Keti axa ma a tu nan ti oku ya na hari maliikannun kiitini gani ? Xoyi o korini duna ku xibaari lamaanu ya kiitiini ? 4 Ku me xibaaru ga na ɲi axa maxa, isanjaman nexunten gaa sero be yi, axakun na kun ya ragana kiitaano yi ? 5 Xoyi hari sere baane nta kafiini axa yi tuwaana ga ni, a ra gaa kiitini i waaxinun naxa ? Ken feti axa da yaagun ya yi ba ? 6 Xa, waaxi na waaxi xiri kiite, sakkati allankannanbalinun noqun ŋa !7 A ga ɲa moxo su yi, axakun duurun na me xiri kiite, ken ni axa da kontontaaxun ya yi. Manne ni axa ga nta baqallaaxun muɲini ? Manne ni an xallen ga na fayi, an ga nta burunu a yi ? 8 Xa, axa yinmenu ya ni baqallon ŋa, axa ya na seron fayini, axa na a ɲaana axa waaxinun xa ya yi. 9 Keti axa ma a tu nan ti teleŋontanbalinun nta taqe kitta Allantunkaaxun ŋa gani ? Xa maxa du sankundi de ! Jeenaano wo, munubattaanon wo, kafiini sunkandaano, ken do sangaana yugu, luutiganko, 10 fayaano wo, katta natanto, ken do minnaano, kayindaano wo, kafiini nanbaranto, ku su nta taqe kitta Allantunkaaxun noxon ŋa. 11 Axakun yinme yogonu ɲi ken ya yi ! Xa ken do i fi su, Alla da axa junuubunun wanqi bakka axa yi, na axa sugandi i du da, na axa ɲa sere baarinto yi ti Kamane Isa Alimasiiwu toxon do o Alla Fanka Sennen ŋa.
[Alla daronde ti faten ŋa]
12 Yabo, yogo ra wa tini : « Fon su daganten ya ni in da », xa fon su sire fe. « Fon su daganten ya ni in da », xa inke ken nta ɲaana fo wo fo danŋa kome yi ! 13 Axa yogonu wa tini xadi : « Yiganden ya fo ni noxon ŋa, noxon ya fo ni yiganden ŋa. » Tonŋu, xa koota wa riini, Alla gaa ku filli su halakini. Xa o faten ma dabari jeeniye da. Faten ni Kamanen ya xalle yi, Kamanen xa ni faten ya xalle yi. 14 Alla da Kamanen wundu bakka furun naxa, a na o xa wundunu ti i senben ŋa ya.
15 Keti axa ma a tu nan ti axa fato ku ni Sugandiyenmen suufun ya yi gani ? Xoyi in wa Sugandiyenmen suufun yogo wuttu na ken kafu sangaana yaxare suufun ŋa ba ? Ken fe wala ! 16 Keti axa ma a tu nan ti sere be do sangaana yaxare ga na kafi, axa ɲa fate baanen ya yi gani ? Baawo a safanten wa Tawureeta noxon ŋa nan ti :
« I filli na ɲa seri baane yi*. »
17 Xa sere su do Kamanen ga na kafi, an do a ɲa yonki baane.
18 Ken kuŋa, xa wuru nan laato bakka jeeniyen ŋa. Seren ga da junuubu su dabari, ken xenpene faten sellan ya yi. Xa sere su ga jeeni, an da an faten yinme junuubun tiŋa. 19 Keti axa ma a tu nan ti axa faton ni Fanka Sennen batikan ya yi, Alla ga da Fanka Senne ke be kini axa yi, a gaa axa maxa ? Axa fo feti axa yinmenu yi. 20 Alla da axa maxawasa ti jonko xooren ya yi, xa da a daro ti axa faton ŋa kuŋa.