[Korinti isanjama]
5
Ayiwa, a wa mugiini do noqun su yi nan ti jeeniyen wa axa jaman ŋa, jeeniye be xa ga ni, hari allankannanbalinun nta ken me dabarini : axa du baananbe do hari i faaba yaqen wa doome. 2 Axakun da axa kunkun wutu ti ken ya yi ! Axa ɲi xawa wuunu ya ken kaman na a wuti bakka axa naxan ŋa. 3 Nke ken do axa nta me kanma, xa in kiilun ken wa axa yi. Sere ke be ga da golle ke dabari, n da a kiiti nan duguta xo in gaa axa noxon ya yi. 4 Ayiwa axa ga na me kafu ti Kamane Isa toxon ŋa, n kiilun wa ɲaana axa kanma, Kamane Isa senben xa wa ɲaana axa kanma. 5 Xa da ku seran meenu ro Ibiliisa kittun ŋa, a haadamarenfate ke na halaki, a yonkin na kisi Kamanen riikoota.6 Axa ma xawa axa du koono ti ke fi yi lewu ! Keti axa ma a tu nan ti lewiiri lamaane ra wa jura xootinten su buukundini ? 7 Ken kuŋa, fo wo fo ga ni lewiiri xase ya, xa da ken su laatondi bakka axa du yi. Ken ŋa, axa na ɲa sere kurunbo yi xo jura xootinta kurunba, na a sababun ɲa lewiirintanŋun ya ga ni axa yi. Baawo Pesaxansallinjaxen sadaxi o da, ken ga ni Sugandiyenmen yinme yi. 8 Ken saabu da, o na Pesaxansallen ɲaxa, na a ɲi o ma a ɲaxa ti lewiiri xase, ken ga ni xonnaaxun do fi buren ŋa. O na a ɲaxa ti buurunxecan ya yi, ken ga ni sondonlaabantaaxun do tonŋu.
9 N bataaxi lagarinte ke noxon ŋa, n da a ko axa da nan ti axa do jeenaana nan maxa ɲa fi yi. 10 N ga da ken ko, n nta do duna jeenaanan su yi de, ma a natanto, ma a nanbaranto do a munubattaanon ŋa. Ken ŋa, axa na duna ya walla. 11 Aayi, n da a ko do ku be waaxaaxun toxon gaa i yi ya, i ga ɲa jeenaano, ma natanto, walla munubattaano do kayindaano, ma dolominnaano, do nanbaranto, n ti axa do kun me ya nan maxa hari yige doome. 12 Xoyi inke ya na duna kutten kiitini ba ? Xoyi ku be gaa kafiini axa yi, axa ya ma xawa kun kiitini ba ? 13 Alla ya na duna kutten kiitini. Xoyi a ga safe Tawureetan ŋa nan ti :
« Xa da fooburiɲaŋaanan buruxa bakka axa noxon ŋa*. »