[Sugandiyenmen xidimaano]
4
Ken kuŋa, axa nan xawa o ragana xo Sugandiyenmen xidimaanon ya yi, a sikkaanon ya ni o yi ti Alla gundon tuyinden ŋa. 2 Ayiwa, manne muurunten ni sikkaana maxa, a ga feti duntenŋaaxu ? 3 Nke ken yinme ke, axa na in kiiti, ma lenki kiyen kiitaanon na in kiiti, ken feti fo wo fo yi nke maxa. Nke yinme ken nta du kiitini. 4 Nan ti in nta du kiitini do i fi su, a wure feti in baarinte ni. Kamanen ya na in kiitini. 5 Ken saabu da, xa maxa sere su kiiti saado waxati rakutunten gaa tinmeene, xa dugu Kamanen nan ri. Fo muxunto be gaa biten ŋa, a wa riini a su wara xurayen ŋa, na seron ŋanniyun bangandi. Ken bire, sere su do tiigande be ga n xawa Alla maxa, a na ken kita.6 N waaxinu, nke yinme do Hapoolu misaale ke, n da axa ro ken xolle ya noxon ŋa, kuudo na axa xaranŋundi ke taali yi : « Safandun ga da gingu be sigindi, axa nan xawa toqo kun gingu ya noxon ŋa.¤ » Ken moxo, axa du baananbe ntaxa i kunkun wuttu baanen kanma ti sere tana fasanŋuntaaxu yi. 7 Ken kuŋa, ko n da an faso kuttun ŋa ? Manne ni an maxa kuye ga fe ? Ken ya ga ni, manne ni an gaa du koono ti a yi xo kuye fe ?
8 Axa kato keeta mene ! Axa fagu keeta mene ! Axa ɲa tunkanyugu, na a ɲi oku ma ken kita. Yelli axa gan n ɲaana tunkanyugu, o xa na ɲa tunkanyugu do axa batte. 9 Nke maxa, Alla da yaaxo sigindi oku faaru ya yi seren su falle, xo sere be ga kiiti kallaana yi. O ɲa faayifoonu duna da, o ɲa faayifoonu maliikannun do haadamarenmun da. 10 Tuurinton ya ni oku yi do Sugandiyenmen ŋa, xa axaku, fontuwaanon ya ni axa yi ti Sugandiyenmen ŋa mene ! Oku ya ni senberanloxon ŋa, xa axakun kun ni senbenton ya yi mene ! Oku ya roxonton ni, xa axakun daronton ya ni. 11 Hari saasa, dullen do daqun wa oku yi, feeton wa o yi, o kati, o ɲa giringirindaano yi. 12 O golli ti o kittun filli ya yi nan tanpi*. I wa o kaana, o wa duwanŋa i da. I wa o toorono, o wa i muɲini. 13 I wa o diganburunu, o wa i jaabini ti digansirun ŋa. O ɲa xo duna fo sedinto, na o ɲa fo su fo ɲexunto ma ke lenki.
14 N nta ku safana katta axa yi na yaagu wara axa yi de, aayi, n na axa xaranŋundini xo in renxano ya. 15 Baawo hari wujuunu tanmi isanxaranmoxo ya gaa axa maxa, faabanu filli kun nta axa maxa. Isa Alimasiiwu killen ŋa, nke ya n da axa saara ti Xibaari Liŋen kiɲanden ŋa axa yi. 16 Ken kuŋa, n wa axa ɲaagana, axa nan yaaxe do in batten ŋa. 17 Ken ya saabu da, n ga da Timoote wara katta axa yi, n renxana, n ren duntenŋe Kamanen killen kanma, kuudo a na axa sinmandi do in biremoxon ŋa Sugandiyenmen killen kanma, ken ga ni in gaa ke be xaranŋundini noqun su do isanjaman su yi.
18 Sero wa kapa axa yi, kun da a sinma in ntaxa saagene katta axa yi ya, ken ya sigi i ga da du xoorondi. 19 Xa, Kamane Isa ga na duŋe, a nta dallana, n wa riini axa fiitu. Ku be ga da du xoorondi, n nta riini do i sefo ku yi de, n riini na i senben ya tu. 20 Baawo Allantunkaaxun nta tuyini ti sefe yi, a tuyini ti senben ya yi. 21 Ayiwa, axakun na manne mulla saasa ? N do guman ya nan ri katta axa yi ba, ma in do xanuyen do nooxaaxun ya nan ri ?