[Dukonŋe ti seron ŋa]
3
N waaxinu, nke yinme ma katu sefene axa da xo Alla Fanka Sennen gaa sero be yi. N sefe axa da xo fateganko ya yi. N sefe axa da xo leminu ya yi, Sugandiyenmen killen ŋa. 2 N da konbojixattin ya kini axa yi. N ma yigandi xote kini axa yi, baawo axa ra ma ɲi a wuttu. Hari ke saasa, axa ra nta a wuttu. 3 Baawo axa faayi finna xo fateganko ya yi. Suuxuyen do manqanŋun ya gaa finna axa naxan ŋa, fategankanmoxon ya nta axa maxa ba ? Haadamarenmoxon ya nta finna axa maxa ba ? 4 Axa yogo gaa tini : « Nke ni Pawulu ya xaranlenma yi », yogo tana na ti : « Nke ni Hapoolu ya xaranlenma yi », ken ŋa, axa nta finna xo haadamarenmu ya yi ba ?5 Ken kuŋa, ko ni Hapoolu yi ? Pawulu ni ko yi ? Alla xidimaano ya ni tan, i ya n ɲa sababu yi axa ga saxu Kamane Isa yi. I baananbe su golli ti kamanen ga da kuye be ya kini i ya. 6 Nke lorindi, Hapoolu xomindi, xa Alla ya ni birandindaanan ŋa de. 7 Lorindaana wo, xomindaana wo, ku su nta jaateene, xa Alla be gaa birandindini, a ya n jaateene. 8 Loridaanan do xomindaanan su nan baana, i baananbe ga na golle be dabari, Alla na ken ya muson kinni a yi. 9 Baawo oku ni golliɲanlenmon ŋa Alla ya da, axakun ni Alla soxanten ya, Alla kan xa ya ni axa yi.
10 Alla ga da neema ke be kini in ŋa, n golli ti ken ya yi xo tagandaana haqilante, n da kan tuufankaci fanan saxundi, sere tana jokki do a taganden ŋa. Xa sere su nan xawa i kiilun toqo i tagandimoxon ya yi. 11 Ayiwa, tuufankaci fana ke saxu nan duguta, ken ni Isa Alimasiiwu yinme ya yi, sere su ra ntaxa tuufankaci fana tana saxundini. 12 Sere be ga na a taga ti kantuufa ya yi, ma i be n da a taga ti xaalisixulle ya yi, ma gidi kallanke, walla i be ga na a taga ti solle ya yi, ma mane, ma sokke, 13 kiiten kootan ŋa, sere su gollen wa bangeene. Baawo ken koota na xo yinben ya, a gaa be su gollen laabandini kuudo na a xiiman bangandi, xo yinben gaa kanŋen laabandini moxo be. 14 Yinben ga na kori sere be taganden buyini, a kaman wa i muson kitta. 15 Xa yinben ga na sere be taganden buyi, ken kaman nta muso kitta. A yinme wa kisiini de, xa a na xo a ga bogu ti yinbinkuman noxon ya yi.
16 Keti axa ma a tu nan ti Alla batikan ya ni axa yi, a Fanka Sennen hadarinten gaa axa yi ? 17 Sere wo sere ga na Alla batikan bonondi, Alla xa na a kaman bonondini ya, baawo Alla batikan sennen ya ni, axakun ya ni ken batika yi.
18 Sere su n maxa du neene de ! Axa du baananbe su ga na du raga ke duna fontuwaana yi, an ɲaana tuurinte ya yi kuudo an na ɲa fontuwaana haxiixa yi. 19 Baawo Alla maxa, ke duna fontuwaaxun ni tuurintaaxun ya yi. Baawo Safandi Sennun ti :
« Alla wa duna fontuwaanon ragana ti i yinmenu jala tugunton ŋa*. »
20 A ti xadi :
« Tunka Duumanten wa ke duna fontuwaanon sinmeyun tu, sinmeyi xafunun ya ni*. »