2
N waaxinu, nke yinme ga daga Alla gundon kiɲandi axa yi kooto be, n ma a kiɲandi axa yi ti sefantuwaaxu yi, walla xa fontuwaaxu xoore. 2 Baawo, n ga ɲi axa noxo ke yi, n ma a xanu na fo tana su tu, a ga feti Isa Alimasiiwu ya yi, xerexereye maxa a gengeye. 3 Nke yinme ga ɲi axa noxon ŋa, senbe ma ɲi in ŋa, n kanunta xoore ma in ga toxo sarallene. 4 N sefon do in waajunden ma ɲi haadamarenfontuwaaxu kanma kuudo na seron duŋandi, xa Fanka Sennen senben ya na a bangandini nan ti in sefo ku do in waajundu ku ni tonŋu ya yi. 5 Ken moxo, axa danqanaaxun na saxu Alla senben kanma, a nta saqa haadamarenmun fontuwaaxun kanma.[Alla fontuwaaxu]
6 A xa de, ku be danqanaaxun ga moyi, o na fontuwaaxun xaranŋundini kun ya yi. Xa ke duna fontuwaaxu fe, dunadunkamanun xa fontuwaaxun fe, ikun be gaa lagarini sankunu. 7 Aayi, o na Alla fontuwaaxun gundo muxunton ya xaranŋundini, a ga da ken be rakutu gelli duna ga ma sigi, kuudo o na ro i nooron noxon ŋa. 8 Dunadunkamanun ma ken fontuwaaxu tu. I gan n da a tu, i ma ɲi kaman nooronten gengene do sallibinsollen ŋa. 9 Xa, a safe Safandi Sennun ŋa kundu ya yi nan ti :
« Yaaxe ga ma ke be wari, taro ga ma ke be mugu,
Sondome ga ma ke be sinma, Alla da i xannaanon kaane taaxu ti ken ya yi*. »
10 Na a tuguti, Alla da fontuwaaxu muxunte ke tuyindi oku ya yi ti Fanka Sennen ŋa, baawo Fanka Sennen wa fo wo fo jagana na a tu, hari Alla gundo jupu ku, a wa i tu. 11 Ko na haadamarenmen fiinun tu, a ga feti haadamarenmen yonkin ya yi ? Ken moxo baane ya ni, ko na Alla xa fiinun tu a ga feti Alla Fanka Sennen ya yi. 12 Xa, oku ku, o ma dunadunkansinmeye kita. Xa o da Alla Fanka Sennen ya kita, kuudo Alla ga da ke be kini o yi ti i fonnansiraaxun ŋa, o na ken tu. 13 O wa sefene ti a yi xa, xa o nta sefene ti dunadunko fontuwaaxun gaa sefo be xaranŋundini. Xa Alla Fanka Sennen gaa ke be xaranŋundini, o sefene ti ken ya yi, na Fanka Sennen fin xaranŋundi ti Fanka Sennen tuwaaxun ŋa. 14 Sere kundu, ken nta duŋene Alla Fanka Sennen fiinun ŋa. A danŋa, kun ni tuurintanfiinun ya yi, a ra nta i faamunu, baawo kun segesegeene ti Fanka Sennen ya yi. 15 Xa Fanka Sennen gaa sere be yi, ken wa fon su segesekke, sere su nta aken segesekke. 16 A safe Safandi Sennun ŋa nan ti :
« Ko xa na Tunka Duumanten sinmeyen tu, sakkati an na a toŋo* ? »
Sugandiyenmen sinmeyen ya na oku kun xa maxa.