2
Ken saabu da, n ga kande ke be yi, ken ni ya : n nan maxa ri axa sunondi xadi. 2 Baawo, selli nke ga na axa sunondi, ko na in sewondini, n ga da ku be sunondi ya ga fe ? 3 N da ke bataaxe xa safa katta axa yi xo ken ta in ga safandi¤ katta axa yi moxo be ya yi, kuudo, n ga na ri katta axa yi kundu, axa nan maxa daga in sunondi ya, baawo inke na sewoyen kitta ti axa ya yi. N saxunten wa a yi nan ti inke sewoyen ni axa su sewoyen ya yi. 4 Tonŋu, n gaa ken bataaxe safana, n na toora xoore ya noxon ŋa, n buttunbuyinte, ken do yaaxanjin gabe. N nta a mulla na axa sondonjoxi de, n na mulla xanuyi xoore be ga in maxa katta axa yi, axa na ken ya tu.[Yanpayen xibaare]
5 Yabo ke, sere be ga na sunondigolle dabari, a ma in baane sunondi, a da in do axa su ya sunondi, xa kuudo in nan maxa xenperandangi, n na ti a da gabe ya sunondi. 6 Jaman gaa ke be saqa ken kanman ŋa, ken wase. 7 Ken saabu da, axa nan xawa yanpana ken kaman maxa yinme du ya, na a kiilun taaxundi, kuudo sunon nan maxa dangi haqen ŋa, a senben gaa roxono. 8 Ken kuŋa, n wa a muurunu axa maxa nan ti axa na xanuyen koyi a yi. 9 Baawo in ga safandi katta axa yi, n na a mulla na axa xenpe ya na a tu selli axa gaa in ɲaamarindixannen xa su batta. 10 Axa ga na yanpa sere be maxa, n xa wa yanpana a kaman maxa. N ga n xawa yanpana fi su yi, n yanpana a yi ti axa ya yi, Sugandiyenmen wa in seeda. 11 Ken moxo, o nta xenne Ibiliisa janbayen noxon ŋa, baawo tuwanbalinu feti o yi, o gaa korini a ŋanniyen tuunu.
[Pawulu jootiye]
12 N ga kiɲe Tooro deben ŋa bire be kuudo in na Sugandiyenmen Xibaari liŋen gangu, n da a tu nan ti Kamanen da killen wuɲi in da. 13 Xa ken do i fi su, n kiilen ma taaxu, baawo in ma in waaxin wari, ken ga ni Tiito yi. Ken saabu da, n da killen muuru i maxa nan daga Maxidoona yi.
[Pawulu gollimoxo]
14 Tiigeyen wa Alla da, aken be ga da o kafu waaliwutaanon jaman ŋa waxatin su ti Sugandiyenmen kapanlenmaaxun ŋa. Aken ya n da o ɲa Sugandiyenmen xibaaren gangundaano yi do noqun su yi xo misikinjin time. 15 Ken ni o ga ɲa Sugandiyenmen misikinjin timi liŋu yi Alla danŋa ya. Ken misikinji timi liŋe wa do kisinten do halakinten su yi. 16 Kallen timen ya ni yogonu da, a gaa kallen joofana i ya. Ŋaliyen timen ya ni yogonu da, a gaa ŋaliyen joofana i ya. Ken ŋa, ko baane n katta ke golle da ? 17 Ganta, seren fo gabe gaa moxo be, oku nta xo kundun ŋa, o gaa jaagundini ti Alla sefen ŋa. Xa, oku sefene ti sondon laabanten ya yi, o kun sefo gilli Alla ya yi, ti Sugandiyenmen kapanlenmaaxun ŋa Alla jon ŋa.