[Sarati kurunban xidimaano]
3
Ayiwa, yaala o na o du maxankutu axa danŋa ya xadi ba ? Baawo yogonu ga na ɲi riini axa banŋe, i do duumaxankutundibataaxen ya n riini katta axa yi, ma i na ri duumaxankutundibataaxe muuru axa ya yi. O xa nan xawa ken me ya dabarini ba ? 2 Oku duumaxankutundibataaxen ni axa ya yi, a safanten gaa o sondomun ŋa. Seren su ra wa a xaranŋa na a tu. 3 Ke be xullen ga ni, o duumaxankutundibataaxen ni axakun yinme ya yi, Sugandiyenmen ga da a safa na a xaliifa o yi. A ma safe ti dawa yi, a safe ti Alla ŋalinten Fanka Sennen ya yi. A ma safe gidinwallaha kanma*, a safanten na seren sondonwallahon ya yi*.4 Alla jon ŋa, ke danqanaaxu ya na oku maxa ti Sugandiyenmen horoman ŋa. 5 A feti xo katudanŋe gaa o danŋa, o ra gaa fo wo fo ɲaana ti o du yi de, aayi. O gaa fo wo fo ɲaana, a katudanŋen giri Alla ya yi. 6 A ya n da katudanŋen ɲa o da, o ga ɲa sarati kurunban xa xidimaano yi. Ken sarati tuugante nta annabi Muusa sariya safanten kanma de, a tuuganten na Fanka Sennen ya kanma. Baawo sariya safanten karindini ya, Fanka Sennen ken xa ŋalindindini ya.
7 Ayiwa, sariya ke xidimeyen be gaa seren kiitini kallaana yi, a safanten na gidinwallahon ya kanma xotte ti xotte. A riyinten nooron xoore, Isirayilagankon ra ma ɲi hari i yaaxon taaxunu Muusa yeeson ŋa nooron saabu da*. Ken nooro ken xa ma hari dalla du. 8 Sariyan xidimeyen nooron ga xooro ke moxo yi, xoyi Fanka Sennen xidimeyen nooro nta fuŋu ken ŋa ba ? 9 Baawo sariyan xidimeyen be gaa seren kiitini kallaana yi, ken ga nooro ; Fanka Sennen xidimeyen be gaa seren baarini, xenpa wa ken yinme nooron ŋa ba ? 10 Nooro fana ke, nafa su nta a yi ke baane kaaran ŋa, baawo nooro be ga ni ke yi, katanlenma su nta a yi. 11 Baawo ke be ga ni ɲamefon ŋa, Alla ga da ken nooro, ke be ga ni ɲamanbalin ŋa, a nta ken ya noorono diinanta a yi ba ?
12 Ken ya ni, o jikken xoten ga ni o gaa sefene ti saakoye. 13 Muusa ga ɲi a ɲaana moxo be, oku nta a ɲaana xo kundun ŋa. Aken ɲi xufan ya roono i yeeson ŋa kuudo nooro ke be gaa a yi, Isirayilagankon nan maxa a daganten wari*. 14 Xa i bara faamini. Ayiwa hari ke lenki, i ga na sarati xasen kitaaben xara ta su, ken xufa ya n finna i yaaxon ŋa. Xa nan danqanaaxu ti Sugandiyenmen ŋa, ken baanen ya n katta xufa ke girindini. 15 Tonŋu, hari ke lenki, i ga na annabi Muusa Sariyan xara, ken xufa ya n finna i haqilun ŋa. 16 Xa sere su ga saage katta Kamanen ŋa, ken xufa wa bakka an ŋa. 17 Kamane ke ya ni Fanka Senne ke yi. Kamanen Fanka Sennen gaa noqu be, hooraaxun na non ya yi. 18 Oku beenu ga ni ku, xufa nta o yaaxon ŋa. Kamanen nooron tuyini oku yeeson ya yi xo dunŋare. Aken be ga ni Fanka Sennen ŋa, a ya na o bakka o moxon ŋa, na o nooro xo i yinme moxo, nooro gaa nooro kanma.