[Pawulu do i kapanlenmon tooreyu]
4
Ayiwa Alla da ken siga xaliifa o yi ti i hinneyen ya yi, ken saabu da o nta lanpunu. 2 Xa seron gaa yaaguntafiinu be dabarini biten ŋa, oku bara kun ŋa. O nta sere su haqile fayini, o nta Alla digaame xa su faraaxunu. O na Alla tonŋu ke du ya bangandini, na du maxankutu seren su da Alla jon ŋa, i na a tu i yonkinun ŋa. 3 Xa, o gaa Xibaari Liŋe ke be gangunu, bite ga na toxo a yi, a toxo a yi halakinton ya da. 4 Kun allankannanbalinu, dunadunkamane Ibiliisa ya n da i haqilun finkindi, kuudo i nan maxa Xibaari Liŋen xurayen wari. Ken Xibaari Liŋe ken xa ya na Sugandiyenmen nooron koyini, Sugandiyenme ke be ga ni Alla xawaaran ŋa. 5 Ken kuŋa, o nta waajundini o yinmenu kanma de, o na a koyini ya nan ti Isa Alimasiiwun ya ni Kamanen ŋa. Oku ni xidimaano ya yi axa danŋa ti Isa yi. 6 Baawo Alla ke be ga ti : « Xurayen nan bange biten noxon ŋa,* » aken ya n da i xurayen bangandi o sondomun ŋa, kuudo o na a nooron tuwaaxun kita Sugandiyenmen yeeson ŋa.7 Oku na xo doorinlallu ya yi, ken kuye gaa taaxini o noxon ŋa, kuudo a na tuyi nan ti ke senbe xoore giri Alla ya yi, oku yinmenu fe. 8 O wa toora ke danben su noxon ŋa, xa o ma lanpu nan dangi haqen ŋa. O wa xotan danben su noxon ŋa, xa o ma jikkirankuti. 9 O wa yanganxatan danben su yi, xa Alla nta o walla. I da o fanqa na o katu, xa o nta halakini. 10 Isa karamoxon ya na do o batten ŋa abada, kuudo a ŋalintaaxun na tuyi o faton ŋa. 11 O biranton ya ni de, xa kallen ya na do o batten ŋa koota su do Isa sababun ŋa, kuudo a ŋalintaaxun na tuyi o fato ku be gaa riini kara. 12 Ken moxo, kallen ya na oku kanma, xa bireyen ya na axakun kanma.
13 Jabuurin ti :
« N danqanaaxu, ken ya ni in ga sefe.* »
Ken danqanaaxu baane ya na o yonkinun ŋa : O danqanaaxu, ken ya ni o xa gaa sefene. 14 O wa a tu nan ti ke be ga da Kamane Isa wundu gilli furun naxan ŋa, ken ya na o xa wundunu do a batten ŋa, na o do axa su sigindi a jon ŋa. 15 Ayiwa ke su da o kita do axa ya batten ŋa, kuudo Alla neeman na tallan jiidi seren gaben kanma. Ken moxo, allantiigeyen na gabo, ken ŋa darontaaxun na saage Alla yi.
16 Ken saabu da, o nta lanpunu. Hari o suufun gaa lanpunu fonne fonne, yonki be gaa o yi, ken kurunbaaxunu ya koota su. 17 Toora lamaane ke be gaa o kanma saasa, ken wa saarene o da ti nooro xoore yi, abadan nooro be, xenpa ga nta yi. 18 Baawo ke be gaa wariini, oku yaaxen nta ken ŋa, xa ke be ga nta wariini, oku yaaxen na ken ya yi. Baawo ke be gaa wariini, ken na waxati lamaane ya ɲaana, xa ke be ga nta wariini, ken ya n duumene ma abada.