2 Korintinko 5

Baawo o wa a tu nan ti o yonkinun gaa fate ke be yi duna yi yere, a na xo kuunaare ya yi, a gaa riini bono. O wa a tu xa nan ti o yonkinun wa riini kuunaari ti kuunaare tana yi Alla ga da a taga, ken gaa duumene ma abada. Sere kitte ma ken taga. 2 O wa guutumene saasa, baawo ke be ga ni o hanmi xoten ŋa, ken ni ya ma o yonkinun na feetufate ti kuunaare ke be gaa Alla noqu kanmun ŋa. 3 Ken ŋa, o yonkinun ga na kuunaari kurunbo kita, o fataduuru ntaxa toqo. 4 Kuunaare ke be gaa o yi duna yi yere, a na xo likki xoore ya yi o kanma, o gaa guutumene a wure. Fate ke be gaa o yi duna yi, o nta a mulla na a boora de. Xa fata kurunba ke be gaa kanmun ŋa, o na a mulla na ken ya xufu, kuudo fate be gaa kalla, a na yoole ŋalintaaxun faten noxon ŋa. 5 Alla ya n da o tagexannen ɲa ken ŋa, na Fanka Sennen kini o yi daliilu, ken gaa a koyini nan ti taqe tana wa o da kaane.

6 Ken kuŋa, o buttun xoton ya ni. O wa a tu xa nan ti na o yonkinun toxo ke kuunaare noxo, o dunadunkanfate ke yi, o do Kamanen laaten ya ni. 7 O bireene ti danqanaaxun ya yi, o nta bireene ti o yaaxen gaa ke be yi. 8 Ken kuŋa, o buttun xoton ya ni. Ayiwa nan bogu ke dunadunkanfate yi nan ɲa o kuunaaren noxo Kamanen noqu, ken ya n liŋi o da. 9 Ken ya saabu da, o wa ke dunadunkanfate yi wo, o wa kuunaare yi Kamanen noqun ŋa wo, o na duruxotoyen ya dabarini ma o na liŋo Kamanen da. 10 Baawo o su n xawa sikki Sugandiyenmen jon ŋa ya kuudo a na o kiiti. Sere su ga da golli sire ma golli bure be golli i dunadunkanfate ke noxon ŋa, an na ken muson kita.

[Naxansironden golle]

11 Ken kuŋa, nan kanu Kamanen ŋa o gaa ken tu saabu da ya ni, o gaa a muurunu na seron faamundi. Alla wa o tu, n wa a jikki nan ti axa xa wa o tu ti axa sondomun ŋa. 12 A feti xo o gaa du maxankutunu axa danŋa xadi de, xa o na a mulla axa na axa kunkun wutu ti o yi ya. Ken ŋa, ku be gaa duukoyintaaxun ŋa seron jon ŋa, na a ɲi i sondomun xullu ga fe, axa na katu i jaabini. 13 Selli o ga na ɲa tuurinto, o ɲa tuurinto Alla ya da. Selli o ga na ɲa haqilanto, o ɲa haqilanto axa ya da. 14 Sugandiyenmen xanuyen wa o kandana, baawo o saxunten wa a yi nan ti : Sere baane kara seren su da, ken kuŋa, seren su ya n kara. 15 A kara seren su danŋa ya, kuudo sere su gaa bireene, an nan maxa bire an yinme baane danŋa keeta. Xa ke be ga kara nan wundi seron su da, a su nan bire ken ya da.

16 Ken ya ni, saasa o ga ntaxa sere su jaatene xo dunadunkon gaa seron jaatene moxo be yi. O ɲi Sugandiyenmen jaatene xo dunadunko gaa a jaatene moxo be ya yi, xa saasa o ntaxa a jaatene kundun ŋa. 17 Ken moxo, sere wo sere do Sugandiyenmen gaa kapanlenmaaxun ŋa, an ɲa tagayi kurunba ya yi. Tagayi xasen ken dangi, an faayi tagayi kurunban ya yi keeta. 18 Alla ke be ga da o do i naxan sirondi ti Sugandiyenmen ŋa, ke su giri a ya yi. A da ken naxansironde ya sigan xaliifa o yi. 19 Alla yinme ya n da i do seron naxan sirondi ti Sugandiyenmen ŋa, a ma hari i futuxiyun jaate. A da ke naxansironde ya faaren xaliifa o yi. 20 Ken kuŋa, Sugandiyenmen faaritaaxunton ya ni o yi, a na xo Alla gaa axa gangunu ti oku ya yi. O wa axa xanjono ti Sugandiyenmen toxon ŋa : « Xa duŋe axa do Alla naxan nan siro. » 21 Junuubu su ma ɲi Sugandiyenmen ŋa, xa Alla da o junuubunun su tiŋandi a yi, kuudo o na baariyen kita Alla maxa ti a sababun ŋa.