Bataaxe katta
Galacanko
[Kuuɲinde]
1
Ke bataaxe giri inke Pawulu ya yi, Isa faare ga ni in ŋa. Ke faarannaaxun ma giri sere yi, a ma sababu ti sere xa yi. Xa a kitte Isa Alimasiiwu do Baaba Alla ya yi, Baaba ke be ga da aken Isa wullu gilli furun naxa. 2 N do maaren danqanaaxunto ku beenu gaa doome yi, bataaxe ke gilli o su ya yi katta Galaca¤ isanjamon ŋa. 3 O faaba Alla do o kama Isa Alimasiiwu neeman do i xeerin gan na ɲa axa kanma. 4 Aken Isa Alimasiiwu da i yonkin ya kuyi ti o junuubunun buruxanden ŋa, kuudo na o bogu ke duna bure kittun ŋa, o faaba Alla liŋun kanma. 5 Nooron na aken Alla ya da abada-abada ! Anmiina.[Bataaxe ke Sababu]
6 Ke Alla be ga da axa xiri ti Alimasiiwu neeman ŋa, axakun ga da axa falle koyi ken Alla yi ke wucu lamaane noxo, nan bati do du-xibaari liŋe batten ŋa, ah, ken da inke dabarun ɲama de ! 7 Xibaari Liŋe tana nta du yi mene, xa in da ken ko ya baawo sero tananu ya na du yi, i gaa axa tilimintalamana tannu, i gaa a mulla xa na Alimasiiwu Xibaari Liŋe ke faraaxu. 8 Xa in na a koni axa da nan ti : hari a ga na ɲa oku yinmenu ya yi, ma hari kanmun maliikan ya ga ni, i be nda waajundi ti Xibaari Liŋe tana yi, o ga joŋa ke be koono axa danŋa, a do ken ga nta baana, Alla gan na a kaman taqen bonondi. 9 O da a ko axa danŋa ta fana, ayiwa saasa xadi, n na saaga a yi : Sere wo sere ga na axa waaju ti Xibaari Liŋe yi, axa ga duŋe ti ke be yi a do ken ga nta baana, yelli a kaman taqe gan bonno. 10 Yaala saasa kuŋa wo, n na Alla liŋun ya kanma ba, ma seron liŋun ya ni ? Inke da seron liŋun ya muuru ba ? N gan ɲi seron liŋun ya muurunu, ganpinsa in ma ɲi ɲaana Alimasiiwu da xidimaana yi.
[Pawulu Faarannaaxu]
11 N wa a faamundini axa yi in maarenmu, nan ti ke Xibaari Liŋe be in gaa digaamunu ti a yi, a ma giri sere yi de ! 12 N ma a kita yonkinte su ya yi yinme, sere su xa ma in xaranŋundi a yi. Ganta Isa Alimasiiwu ya n da a yanqandi in ŋa.
13 Bire be in ga ɲi yehuudiyaaxun killen ŋa, axa da in ɲangollun mugu, n ga ɲi Alla Isanjamon kasaarana moxo be, na a tilifini, nan ti in wa a gurujana. 14 O xille ke noxo, n da in joota gabe firi yehuudiyandiinan killen kanma ; n ɲi in faabanu laadanun batta soobaaxu yaaxe maxa. 15 Xa ganta gelli in gaa in saaxa furaasen noxo, Alla da in sugandi, na in xiri ti i neeman ŋa. 16 A waxati rakutunten ga ri bire be, a da i renmen tuyindi in ŋa, kuudo ku beenu ga feti Yehuudiyanu, n na i waaju ti Xibaari Liŋen ŋa. Ayiwa in ma daga toŋonde muuru innatagante su yi. 17 Ku beenu ga da in saama faarannaaxun ŋa, n ma daga i noqun ŋa Yerusalaamu yi xa. Xa, n daga Araabi ya yi ken batte su, ken falle nan yille katta Damaasi yi. 18 Siino sikki ken falle, n daga tuwanlenmaaxun bagandi in do Piyeeri¤ naxa Yerusalaamu yi, na bito tanmi do karago ɲa a noqu. 19 N ma faare tana su wari, a ga ma ɲa Yaaxuba yi, Kamane Isa waaxi ke. 20 N gaa ke be safana katta axa yi, Alla wa seedene ti a yi nan ti gaare fe. 21 Ken falle, n daga Siiri maran do Kiliiki maran ŋa. 22 Ken waxati, isanjamo beenu ga ɲi Yehuuda, i ma ɲi in warinten tu. 23 A wa mugiini tannu nan ti : « Yugo ke be ga ɲi o tilifini, a ga ɲi a mulla na o danqanaaxu ke be guruja de, saasa a yinme saage waajundini kapa o yi ti Xibaari Liŋen ŋa ken danqanaaxu baananne ya kanma. » 24 I da Alla tiiga ti in ŋa kuŋa.