Yefeesinko 1

Bataaxe katta

Yefeesinko

[Bataaxen jopaadi]

Ke bataaxe wa gilli inke yi, Isa ga ni in ŋa, na a saxu Alla ramuuriyen kanma. Bataaxe ke wa katta Alla seron ŋa Yefeesi yi, kun ga toŋondi ti Isa Alimasiiwu yi xa. 2 O faaba Alla do o kaman Isa Alimasiiwu neeman do i xeerin gan na ɲa axa kanma.

[Alla tiigeye]

3 Tiigeyen wa Alla da, o kaman Isa Alimasiiwu faaba. A da Fanka Sennen xeerin danben su ɲaŋi o da kanmun dingiron ŋa ti o do Alimasiiwu kapanlenmaaxun ŋa. 4 Na a toxo ti gelli duna ga ma tage, Alla da o sugandi Isa Alimasiiwu kapanlenmaaxu ya da, kuudo o n seno, o n maxa jalagi ike Alla jon me naxa. Na a saxu Alla ga da o xanu, 5 a da a rakutu gelli fu, nan ti i wa o renmaaxunu ti Isa Alimasiiwu yi. A da ken rakutu ti i fonnansiraaxun ya yi. 6 Ken ɲa ya, kuudo a neema xoore ke be a ga da a kini o yi ti i Renxanan ŋa, o na a tiiga ken neema kanma. 7 O da maxawasayen kita ti a ken renme foron joqen ya yi. O junuubunun yanpe ti a ya yi, na a saxu a neema xooren kanma, 8 ken neema be a ga da o xumaari ti a yi ti fontuwaaxun do faamuyen danma su yi. 9 A da i ramuuriyen gundon tuyindi o yi. A da ken rakutu ti Isa Alimasiiwu ya yi, na a saxu i yinme fonnansiraaxun kanma. 10 Ke rakuto kundu, a waxatin ga na tinme, a wa yaaxen bagandini : fo wo fo gaa kanmun do ɲiiɲen ŋa, a wa riini a su kafu me yi Alimasiiwu kandan noxon ŋa. 11 Aken Alimasiiwu kapanlenmaaxun ya n sigi xadi, oku ga da o taqixeyen kita. Alla be gaa fo wo fo dabarini ti i ramuuriyen ŋa, a ya n da ken rakutu gelli waxati laate. 12 Ken kuŋa, oku Yehuudiyanu beenu finanu ga da o jikken saxu Alimasiiwu kanma, o na Alla tiiga ti i darontaaxun ŋa. 13 Axakun beenu xa ga feti Yehuudiyanu yi, axa xa da tonŋun xibaaren mugu ti aken ya sababun ŋa, ken ga ni ke be gaa axa kisini. Axa danqanaaxu ti aken ya yi xadi, ke be laayidun ga wuti, Alla xosi axa taagumansa ti a yi, kuudo na a koyi ti axa na ike ya foyaaxun ŋa. 14 Xeye ke be Alla ga da a laayidun wutu i komon da, a daliilun ni ke Fanka Senne be a ga da a kini o yi ya, ma o ga n n maxawase bogo-bogo bire be. Ken kuŋa, o na Alla tiiga ti i darontaaxun ŋa.

[Pawulu allanɲaageye Yefeesinkon da]

15 Liimaanagankaaxu ke be gaa axa maxa ti Kamane Isa yi, a do xanuye be gaa axa maxa katta Alla seron su yi, n ga da ken mugu koŋiini, 16 ken ya n sigi in gaa Alla ɲaagana na a tiiga axa da waxatin su yi. 17 Yelli o Kaman Isa Alimasiiwu Faaba Alla, ken ga ni faaba daren ŋa, a gan na axa ŋalindi ti Fanka Sennen fontuwaaxun ŋa, a do bangande, kuudo axa na Alla tu. 18 A gan na axa sondomun ŋalindi, kuudo a ga da axa xiri ti jikke be ke yi, axa na ken tu. A xeyi xoore ke xa be a gaa a kinni Alla seron ŋa, yelli a gan na ken xa tuyindi axa yi. 19 Alla ga da senbe xoore be koyi kuudo na oku danqanaaxuntayenmu deema, yelli o gan na ken xa tu. 20 A da Isa Alimasiiwu wullu bakka furun naxa ti ken senbe xoore ya, nan daga a taaxundi i tayen ŋa kanmun dingiron noxo. 21 Aken Isa Alimasiiwu wa mareyen su kanma non ŋa, a wa kandan su kanma, a wa senben su kanma, a wa yinmanken su kanma, a wa toxon su kanma, ken feti duna ku kiyu baane yi de, hari kiyu beenu gaa falle yi riini, a na ken su ya kanma. 22 A da fon su ya ro a tanbekkon wure, a da a ya sugandi fon su kanma, na a sugandi ti i yinmotoonun fiinun su yinmankaaxun ŋa. 23 Kun yinmotoonu ni aken Alimasiiwu suufunun ya, a hadariyen tinmanten ya na i yinmotoonun ŋa. A wa duna noqun do a dingiran danma-danmon su muuduxensene.