Yefeesinko 2

[Nan giri furaaxun ŋa katta bireyen ŋa]

Axakun kuŋa, axa ɲi furaaxun ya yi ti axa junuubunun do axa allankuteyun saabu da, 2 ken waxati, axa ɲi bireene do lenki duna ke dagamoxon ya yi, ken ga ni Ibiliisa fankan ke be gaa banbene kanmun ŋa. Ku yenmu beenu gaa Alla kutana, Ibiliisa ken fanka ya na kun kandana. 3 Oku xa su ɲi kafiini kun sero ya yi. Gannin ŋa, o ɲi do yonkiliŋun ya batte. O ɲi ken yonkiliŋu do sinmayi burun ya maxa. Oku xa ni yenmun ya, o do Alla butten yanganxatan ga n xawa, xo seron kuttun su moxo, ken ni haadamarenmaaxun taben ya. 4 Xa, Alla hinneyen xooren ga ni moxo be, a do xanuyi xoore be gaa a maxa katta o yi, 5 ken ya n sigi, o ga ɲi furaaxun ŋa o allankuteyun saabu da, a ga da bireyen kini o yi do batten ŋa. Axa da kisiyen kita ti Alla neeman baane ya yi. 6 A da o wundu kallen ŋa do Isa Alimasiiwu batten ŋa, na o taaxundi kafiini a yi kanmun dingiron ŋa. 7 Ken moxo, a da a xanu i ga da i siroye do i neema guujinte be kini o yi ti Isa Alimasiiwu yi, i na ken ya bangandi duna koota riyinton ŋa. 8 Baawo axa ga da kisiyen kita ti Alla neeman ya yi danqanaaxun saabu da, ayiwa ken ma giri axakun ŋa de, Alla kuyen ya ni. 9 Ɲangolle ma ken sababu de ! Ken kuŋa, sere su ra nta i kunkun wuttu. 10 Baawo oku ni Alla tagefoonun ya, a da o taga Isa Alimasiiwu kapanlenmaaxun ya yi, kuudo aken Alla yinme ga da golli siru beenu moxon gemundi o kaane, o na golli ti i ya.

[O su n baana Isa Alimasiiwu yi]

11 Axakun beenu ga feti Yehuudiyanu yi, axa sinme do waxatin be axa ga ɲi sankuntaaxun ŋa, Yehuudiyanun ga ɲi axa xilli murunto, na i du xiri sunnanto, ken sunnande ni kittibatte ya yi seron faton ŋa tannu. 12 Ken waxati, axa do ma ɲi fi ya, axa ma ɲi jaateene kafiini jaman ŋa, saratinu ku ga siiti Alla laayidu be kanma, axakun taqe ma ɲi ken ŋa. Jikke ma ɲi axa yi duna noxo ke yi, Alla ma ɲi axa maxa xa. 13 Xa saasa, axakun beenu laatun ga ɲi, axa do Alla naxan tinko ti axa do Isa Alimasiiwu kapanlenmaaxun ya yi, na a sababun ɲa aken Alimasiiwu foren ya yi. 14 Aken ya n ɲaŋi oku xeerin ŋa mene, na Yehuudiyan do Yehuudiyan tanan su ɲa jama baanen ŋa, na xonnaaxun tageyen guruja bakka i naxa ti i yonkin kuyinden ŋa. 15 Sariyan do i ɲaamarixannu, a da i saaru, kuudo na seranjamo filli kurunbaaxu ti me yi, nan ɲa jama baane yi a kapanlenmaaxun noxon ŋa, xeerin ri. 16 A da kun jamo filli su do Alla naxa gemundi, na i ɲa baane yi ti ike yinme yonkin sadaxinden ŋa sallibinsollen kanma, na xonnaaxun buruxa ti ken ŋa. 17 Ayiwa axakun beenu laatun ga ɲi Alla yi, Alimasiiwu ri xeerin xibaaren kiɲandi axa yi ; ku beenu tinkun ga ɲi a yi, na xeerin xibaaren kiɲandi i ya. 18 Ayiwa aken Alimasiiwu sababun ya ni, jamo ku filli su ga da killen kita katta Baaba Alla yi ti Fanka Senni baane ke yi.

19 Ken kuŋa, axakun beenu ga feti Yehuudiyanu yi, mukkunu do riyaano feti axa yi keeta de, xa saaridonun ya ni axa yi kafiini Alla seron do a koren ŋa. 20 Axa xa tuufasaxu kafiini tageyen tuufa fanon ŋa, kun ga ni do ŋa, Isa Alimasiiwu yinme ya ni gonbontuufan ŋa. 21 Aken ya n sikki tageyen tuufon su gaa me ragana, tageyen gaa gilli, nan ɲa allanbatika sennen ŋa da. 22 Aken ya n ɲaana sababu yi xadi, axakun xa gaa ɲaana tageyi baanen ŋa, nan ɲa Alla danŋa ka yi, a gaa hadarini a yi ti i ŋa.