Bataaxe katta
Filipinko
[Kuuɲinden do duwanŋe]
1
Ke bataaxe wa gilli inke Pawulu do Timoote yi, Isa Alimasiiwu komo ga ni. A wa katta ku beenu su ga ni allanbattaanon ŋa Isa Alimasiiwu kapanlenmaaxun noxo, i gaa Filipo yi, ken do isanjaman koroosindaanon do a xidimaano. 2 O faaba Alla, do o kama Isa Alimasiiwu neeman do i xeerin gan na ɲa axa kanma.3 N sinmeta su do axa batten ŋa, n wa in Alla tiigana. 4 Waxati su, n sewonten ya n allanɲaagene axa danŋa, 5 na a sababun ɲa, axa ga da siga be wutu waajunden ŋa ti Xibaari Liŋe ke yi gelli a mugikoota fanan ŋa nan ri a wara ma in ke sefexanne. 6 N saxunten ya na a yi nan ti, ke Alla be ga da golli siren jopa axa yonkinun ŋa, a jokkini do a yi ya ma a ga n'n tinme Isa Alimasiiwu rikoota. 7 Nke n siri sinmene ken moxo ya yi axa su kafumanton da, sabu axa fin wa in yonkin ŋa. Baawo Alla ga da neema ke be kini in ŋa, axa su da axa taqun wutu bakka a yi. Waxati be xarun ga ɲi in ŋa kason noxo, ma waxati be in ga ɲi Xibaari Liŋen faasana na a tonŋuntaaxu, axa ɲi do in batten ya yi kun waxatinu su yi. 8 Alla yinme wa seedene in da, nan ti in wa axa su mulla moxosiri ti Isa Alimasiiwu nuxudunxullaaxun ŋa. 9 N gaa Alla ɲaagana ke be yi, ken ni ya axa xanuyen nan toxo jiidini telle tuwaaxun do haqilisirigumaaxun noxon ŋa, 10 kuudo axa na katu fo siren tuunu, ken ŋa, Alimasiiwun rikoota, axa na seno, kuralle xa nta axa kitta. 11 Axa na kuure xa ti teleŋontaaxun nafa be ga giri Isa Alimasiiwu yi, na darontaaxun do tiigandun saaga Alla yi.
[Biremoxo do Alimasiiwu yi]
12 N maarenmu, n wa a mulla axa na a tu, nan ti ke be ga da in kita, ken da Xibaari Liŋen tallan deni kaane yi ya du. 13 Na a toxo ti a tuyinten ya ni tunkankan tangandaanon do seri tananu su maxa keeta, nan ti in na kason ŋa do Alimasiiwu xibaaren ya batte. 14 N kasonroye ke saabuda, n maarenmun xa fo gabe da butten tallan wutu ti Kamanen ŋa, nan gangundi ti saakoyen ŋa.
15 Yabo, yogonu na ken dabarini ti natan ya yi, a do haasidaaxu, xa yogonu gangundini Alimasiiwun fin kanma ti ŋanniyi siren ya yi. 16 Kun gollini ti xanuyen ya yi, baawo i wa a tu nan ti in na yere yi ti Xibaari Liŋen faasanden ya. 17 Kuttu ku kun na Alimasiiwun fin koono ti haasidaaxun ya yi, i sinmeyun xullu fe, i na a walla ken na inke kaso ke tallan xotondini ya. 18 Ken kuŋa i ŋanniyun siru ni wo, i buru ni wo, ken ken ni ken ya ! A ga ɲa moxo su ken ŋa, Alimasiiwu ken xibaaren gangi xooni, ken ya n da inke sewondi, ayiwa in sewono ya xa. 19 Baawo inke wa a tu nan ti ken yillakarene ti inke kisiyen ya yi, na a sababun ɲa axa allanɲaageyun ŋa, a do Isa Alimasiiwu Fanka Sennen¤ deemande. 20 Nke natan do in jikken gaa ke be yi, ken ni ya, n ga nta riini yaaguntaaxunu ti fo wo fo yi. Xa ganta, n jikken nan xoto ya ni. A ɲa lenki wo, a ɲa xunbane wo, Alimasiiwun ken fin wurugini in maxa ya, a na ɲa in furen ŋa, ma a na ɲa in biranten ŋa. 21 Baawo inke ken maxa, an ga na a mugu nan ti bireye, ken ni Alimasiiwun ya ; nan kara xa, ken ni nafan ya. 22 Xa selli na in toxo bireene ya ga ni nafan gaa in gollen ŋa, ken ken ŋa in nta a tu in gaa ke be sugandini keeta. 23 N na ku sinmayu filli ya naxa : n nan kara, nan daga ɲa do Alimasiiwu batten ŋa, ken ya ni in liŋun ŋa, ayiwa ken ya siren ni moxosiri xa. 24 Xa, nan toxo bireene axa xa saabuda, ken xa n xawa ya. 25 N wa a tu, n saxunten ya na a yi xa, nan ti in wa toqo hadariyen ŋa do axa su batte, kuudo na axa deema ti kaanadagayen do ɲaxaliyen ŋa danqanaaxun noxo. 26 Ken ni ya, kuudo axa na wurugi ti in ŋa, na a sababun ɲa in saageyen ŋa katta axa yi, ken ya n riini ɲa axa da kunkuwutten ŋa ti Isa Alimasiiwu kapanlenmaaxun ŋa.
27 Iyo, axa biremoxon nan ɲa do Alimasiiwun Xibaari Liŋen killen ŋa tannu. Ken ŋa, in ri axa wari wo, n bante wo, n wa axa xibaaren mukku koniini, n wa a mukku nan ti axa sabatinton na ŋanniyi baane ya kanma, nan gaja ti haqilila baane yi, ken ya ni danqanaaxu ti Xibaari Liŋen ŋa. 28 Xa maxa du toxo axa xonnon maxa ti xaaxantaaxu su yi. Ken ni ikun halakiyen taagumansen ya, xa, axakun kisiyen taagumansen ya ni ken ŋa nan giri Alla yi. 29 Na a toxo ti, a da neeman ɲa axakun da kuudo axa n danqanaaxu ti Alimasiiwun ŋa, do axa n toore a danŋa xa. 30 Baawo axa gaa fanqe ke be yi kundu, n xa ɲi ken fanqi baane ya yi, ayiwa axa da a mugu xa nan ti in finna ken ya yi.